ខេត្តក្រចេះ ៖ ព្រះចៅអធិការវត្តមួយអង្គបានទទួលអនិច្ចធម្មភ្លាមៗនៅក្បែរវត្ត បន្ទាប់ពីរងការបាញ់ប្រហារពីជនល្មើសមួយក្រុម ដោយសមត្ថកិច្ចសន្និដ្ឋានជាជំហានដំបូងថា អំពើបាញ់ប្រហារពីក្រុមជនប្រដាប់អាវុធនេះជាករណីបាញ់ប្លន់យកបដិមាករមានតម្លៃពីក្នុងវត្ត ។
អ្នកភូមិរស់នៅក្បែរទីអារាមដាច់ស្រយាលមួយនេះ បានភ្ញាក់ផ្អើលកាលពីវេលាយប់ថ្ងៃទី៨ មេសា បន្ទាប់ពីពួកគាត់បានឮសម្លេងផ្ទុះអាវុធជាច្រើនគ្រាប់ នៅកុដិចៅអធិការក្នុងវត្តមច្ឆិណារាមភូមិរលៀក ឃុំកំពង់ដំរី ស្រុកឆ្លូង ។
អំពើបាញ់ប្រហារនេះ បង្កឡើងពីជនល្មើសមិនស្គាល់មុខមួយក្រុម មានគ្នាប្រហែល៤នាក់ ប្រដាប់ដោយអាវុធធុនអាកាមួយដើម គឺបានបណ្តាលឲ្យព្រះចៅអធិការវត្ត នាមសុង ស៊ីថា ហៅចាប ព្រះជន្ម៤៨ព្រះវស្សា បានទទួលអនិច្ចធម្មភ្លាមៗនៅក្បែរកុដិ បន្ទាប់ពីរងការបាញ់ពីក្រុមជនល្មើស បណ្តាលឲ្យត្រូវចំព្រះកេស ។ នេះបើតាមការបញ្ជាក់ពីកងកម្លាំងនគរបាលព្រហ្មទណ្ឌ ដែលបានចុះអន្តរាគមន៍នៅកន្លែងកើតហេតុ ។
បើតាមសេចក្តីរាយការណ៍ពីកន្លែងកើតហេតុបានឲ្យដឹងថា នៅថ្ងៃកើតហេតុ វេលាម៉ោង៩យប់ គឺមានមនុស្សមួយក្រុមមានគ្នា៤ទៅ៥នាក់ បានជិះរថយន្តធុនទូរីសមួយគ្រឿងបានមកចតនៅឆ្ងាយពីវត្តប្រហែល ១គីឡូម៉ែត្រ។ ជនប្រដាប់អាវុធមួយក្រុមនោះ បានដើរសំដៅចូលក្នុងវត្ត និងបានបំផ្ទុះអាវុធជាច្រើនគ្រាប់ រួចក៏បានគេចខ្លួន ។ សកម្មភាពរបស់ក្រុមជនល្មើសទាំងនោះ គឺធ្វើឡើងយ៉ាងឆាប់រហ័សបំផុតប្រៀបដូចជាការគិតទុកជាមុន ។
ទោះបីជាបែបណានៅមិនទាន់មានសេចក្តីរាយការណ៍ណាឲ្យច្បាស់ថា មូលហេតុដែលឈានដល់ការបាញ់ប្រហារយ៉ាងព្រៃផ្សៃពីក្រុមជនល្មើស មកលើព្រះសង្ឃបណ្តាលឲ្យអនិច្ចធម្មគួរឲ្យរន្ធត់នេះ ថាផ្តើមចេញពីរឿងអ្វីឲ្យប្រាកដនៅឡើយនោះទេ ។ បើតាមការលើកឡើងពី អ្នកភូមិ បានឲ្យដឹងថា ក្រៅពីបានបាញ់ប្រហារលើព្រះសង្ឃ ជនប្រដាប់អាវុធក៏បានប្រមូល យកបដិមាដែលអ្នកភូមិថា ជារបស់មានតម្លៃដូចជា ព្រះសំរិទ្ឋមុខ៨ទិស១ព្រះអង្គ និងព្រះអង្គតូចៗដែលធ្វើពីលោហៈ ស្ពាន់ ខ្លឹមអំពិលចំនួន៧ព្រះអង្គ និងសម្ភារមានតម្លៃផ្សេងៗទៀត ដែលរក្សាទុកនៅលើកុដិរបស់ព្រះចៅអធិការ ។
ក្រោយពីមានហេតុការណ៍នេះ កម្លាំងនគរបាលព្រហ្មទណ្ឌខេត្ត និងស្រុក ដឹកនាំដោយលោកឧត្តមសេនីយ៍ត្រី អ៊ុំ ភី ស្នងការរងទទួលកិច្ចការងារព្រហ្មទណ្ឌ បានចុះដល់ទីតាំងកើតហេតុ ដើម្បីបើកការស៊ើបអង្កេតលើករណីនេះ ។ បើតាមលោកវរសេនីយ៍ឯក កង វណ្ណី អនុប្រធានការិយាល័យព្រហ្មទណ្ឌ បានឲ្យដឹងនៅថ្ងៃទី១០ មេសា ថា កម្លាំងនគរបាលកំពុងតែដុតដៃដុតជើង បើកការស៊ើបអង្កេតយ៉ាងម៉ត់ចត់លើករណីនេះ និងក៏កំពុងតែមានពន្លឺមួយចំនួនហើយក្នុងការស្រាវជ្រាវ ព្រោះមានតម្រុយគួរឱ្យជឿជាក់ ៕
ចែករំលែកព័តមាននេះ