ទីក្រុងសាន់ហ្វ្រានស៊ីស្កូ ៖ បើទោះជាសេដ្ឋកិច្ចរបស់សហរដ្ឋអាមេរិកជំរុញការបង្កើតការងារ ហើយទីផ្សារក្នុងស្រុកបានបង្ហាញពីការធ្លាក់ចុះនៃឱនភាពពាណិជ្ជកម្មក្តី ប៉ុន្តែរដ្ឋជាច្រើនទៀតនៅតែជួបប្រទះនឹងការលំបាកក្នុងការងើបឡើងវិញ បន្ទាប់ពីវិបត្តិហិរញ្ញវត្ថុនៅឆ្នាំ២០០៨ ។
ភ្នាក់ងារវាយតម្លៃនិយាយថា រដ្ឋដូចជា California និង Texas ទទួលបានការលូតលាស់ខ្ពស់ ខណៈរដ្ឋដែលពឹងផ្អែកលើប្រាក់ចំណូលពីប្រេងដូចជា North Dakota និង Alaska ក៏ដូចជា Illinois កំពុងតែជួបប្រទះនឹងបញ្ហាខ្វះថវិកាសម្រាប់ប្រាក់ចូលនិវត្តន៍ និងកង្វះខាតថវិការដ្ឋ ។
រដ្ឋទាំងនោះត្រូវជ្រើសរើសកាត់បន្ថយការចំណាយនិងបង្កើនពន្ធ ហើយធ្វើឲ្យរដ្ឋទាំងនោះពិបាករៀបចំខ្លួនដើម្បីទប់ទល់នឹងវិបត្តិសេដ្ឋកិច្ចមួយទៀត ឬទប់ទល់នឹងការកាត់បន្ថយប្រាក់រដ្ឋកណ្តាលទាក់ទិននឹងកម្មវិធីសុខាភិបាល ។
អ្នកវិភាគនិយាយថា ការងើបឡើងវិញដោយមិនស្មើគ្នាតាមរដ្ឋនេះ គឺគ្មានអ្វីចម្លែកទេក្នុងប្រវត្តិសាស្ត្ររបស់សហរដ្ឋអាមេរិក ។
លោក Gabe Petek អ្នកវិភាគមកពី S&P Global និយាយថា ៖ « សេដ្ឋកិច្ចកំពុងតែបង្ហាញសញ្ញាថា រឹងមាំឡើងវិញ ។ ទីផ្សារភាគហ៊ុនបានកើនដល់កម្រិតខ្ពស់ជាងគេ ធនាគារជាតិបានបង្កើនអត្រាការប្រាក់ ហើយសេដ្ឋវិទូព្យាករថា ការលូតលាស់នឹងបន្ត » ។
លោកបន្តថា ៖ « ប៉ុន្តែប្រសិនបើអ្នកមើលទៅផ្នែករដ្ឋវិញ មានរដ្ឋជាច្រើនធ្វើមិនបានល្អដូចការព្យាករ និងមានការគិតថា នឹងមានចន្លោះថវិកាផងដែរ » ។
យោងតាមសេចក្តីរាយការណ៍ពីមជ្ឈមណ្ឌលអាទិភាពថវិកា និងគោលនយោបាយឲ្យដឹងថា ពាក់កណ្តាលនៃរដ្ឋទាំងអស់បានជួបប្រទះនឹងកង្វះថវិកា បើទោះជាសេដ្ឋកិច្ចលូតលាស់ក្តី ហើយកង្វះខាតនេះ គឺចាំបាច់ណាស់ក្នុងការរក្សាការផ្តល់សេវាកម្មកម្រិតបច្ចុប្បន្ននាឆ្នាំ២០១៨ ។
ទោះជាអត្រាគ្មានការងារធ្វើរបស់ប្រទេស នៅត្រឹម៤,៩%ក្តី ប៉ុន្តែការបង្កើតការងារថ្មីភាគច្រើនមិនអាចជំរុញដល់ប្រាក់ចំណូលរដ្ឋដែលពឹងផ្អែកលើប្រាក់បៀវត្សខ្ពស់ និងការយកពន្ធពីការលក់ទេ ៕
ចែករំលែកព័តមាននេះ