សហរដ្ឋអាមេរិក ៖ ប្រេងរបស់អាមេរិកបានកើនឡើងច្រើនជាង២%ទៅទៀតកាលពីព្រឹកថ្ងៃសុក្រសប្ដាហ៍មុន បន្ទាប់ពីលោកប្រធានាធិបតី Trump បញ្ជាយោធាអាមេរិកដោយផ្ទាល់ជាលើកដំបូង ដើម្បីប្រឆាំងនឹងរដ្ឋាភិបាលរបស់លោកប្រធានាធិបតី Bashar al-Assad ។
លោក Greg McKenna ប្រធានផ្នែកយុទ្ធសាស្ត្រ ក្នុង AxiTrader និយាយថា ៖ «ភូមិសាស្ត្រនយោបាយភាគច្រើនជាកត្តាជំរុញដល់ទីផ្សារប្រេង ។ ការវាយប្រហាររបស់សហរដ្ឋអាមេរិកលើរដ្ឋាភិបាល ដែលគាំទ្រដោយប្រទេសរុស្ស៊ី និងជនជាតិអុីរ៉ង់គាំទ្ររដ្ឋាភិបាលនេះយ៉ាងសកម្ម អាចនឹងប៉ះពាល់ដល់នយោបាយកាន់តែខ្លាំងឡើង » ។
លោកបន្តថា ៖ « ប្រទេសអុីរ៉ង់ និងរុស្ស៊ីដែលជាអ្នកផលិតប្រេងធំៗអាចនឹងឆ្លើយតបដោយប្រាប់ដល់ពាណិជ្ជករប្រេងឲ្យប្រុងប្រយ័ត្ន ហើយភាគច្រើនធ្វើឲ្យតម្លៃប្រេងកើនឡើងក្នុងរយៈពេលយូរមធ្យម » ។
អ្នកវិភាគក្នុង JBC Energy Research ព្រមានថា តម្លៃប្រេងអាចកើនឡើងលឿនដូចកាលពីចាប់ផ្តើមអីចឹង ។
ស៊ីរីមិនមែនជាប្រទេសផលិតប្រេងធំទេ ប៉ុន្តែប្រទេសនេះនៅជិតច្រកសមុទ្រ Hormuz ដែលជាទីតាំងដ៏សំខាន់សម្រាប់ការដឹកជញ្ជូនប្រេងរាប់លានធុងជារៀងរាល់ថ្ងៃ ។ ភាពតានតឹងកាន់តែខ្លាំងឡើងនៃជម្លោះក្នុងតំបន់ អាចនឹងប៉ះពាល់ដល់ការផ្គត់ផ្គង់ពិភពលោក ។
លោក Trump និយាយថា ការវាយប្រហារនេះ គឺដើម្បីឆ្លើយតបនឹងការប្រើប្រាស់អាវុធគីមីវាយប្រហារលើប្រជាជនកាលពីដើមសប្តាហ៍មុន ដែលសហរដ្ឋអាមេរិកជឿជាក់ថា វាត្រូវបានប្រព្រឹត្តឡើងដោយរដ្ឋាភិបាលស៊ីរី ។
សកម្មភាពយោធារបស់សហរដ្ឋអាមេរិកនេះបានជំរុញវិនិយោគិនឲ្យងាកទៅកាន់ទ្រព្យផ្សេងៗដែលមានសុវត្ថិភាពជាង ខណៈកំពុងមានភាពមិនប្រាកដប្រជា ដូចជាមាស និងប្រាក់យេនរបស់ជប៉ុនជាដើម ។ តម្លៃមាសបានកើនឡើងច្រើនជាង១% មកត្រឹមកម្រិតខ្ពស់ជាងគេក្នុងរយៈពេល៥ខែមកនេះ ខណៈតម្លៃប្រាក់យេនកើនឡើង០,៧% បើធៀបនឹងប្រាក់ដុល្លារ ៕
ចែករំលែកព័តមាននេះ