រាជធានីភ្នំពេញ ៖ តំណាងក្រុមហ៊ុនផ្តល់សេវា និងដឹកជញ្ជូនអ្នកដំណើរចំនួន១៣ អះអាងថា ក្នុងឱកាសបុណ្យចូលឆ្នាំថ្មីប្រពៃណីជាតិខាងមុខនេះ នៅតែរក្សាតម្លៃសំបុត្រដដែល គឺមិនឡើង ហើយ
រាជធានីភ្នំពេញ ៖ តំណាងក្រុមហ៊ុនផ្តល់សេវា និងដឹកជញ្ជូនអ្នកដំណើរចំនួន១៣ អះអាងថា ក្នុងឱកាសបុណ្យចូលឆ្នាំថ្មីប្រពៃណីជាតិខាងមុខនេះ នៅតែរក្សាតម្លៃសំបុត្រដដែល គឺមិនឡើង ហើយក៏មិនចុះថ្លៃដែរ ។ ការអះអាងនេះលើកឡើងក្នុងជំនួបពិភាក្សាជាមួយលោក តូច ចាន់កុសល រដ្ឋលេខាធិការក្រសួងសាធារណការ និងដឹកជញ្ជូន នៅទីស្តីការក្រសួង កាលពីថ្ងៃទី១០ មេសា ម្សិលមិញ ។
ក្រុមហ៊ុនទាំង១៣ រួមមាន ក្រុមហ៊ុន Yello Stone Express, PSD Express, ម៉ិហុង, វ៉ាប៊ុនត្រា, ឡាវីតា, វ៉ាងម៉ិច, យូហ៊ីក, រស្មីសាមគ្គី, Giant Ibis Transport, វីរៈប៊ុនថាំ, ពន្លឺអង្គរខ្មែរដឹកជញ្ជូន, Mekong Express និងភ្នំពេញ អូថូម៉ូបល ត្រេនស្ព័ត ។
អ្នកស្រី សំដ្ឋា ហាវិសី ជំនួយការអគ្គនាយកក្រុមហ៊ុន Mekong Express និយាយថា ៖ «ក្រុមហ៊ុនយើងបែងចែករថយន្តដឹកអ្នកដំណើរជាពីរផ្នែក គឺមានរថយន្តប៊ឺស និងវីអាយភី ហ្វេន ។ រថយន្តប៊ឺសនេះមានទិសដៅពីភ្នំពេញទៅសៀមរាប និងហូជីមិញ ។ ចំណែករថយន្តវីអាយភី ផ្តល់សេវាទៅប៉ោយប៉ែត ថៃ បាត់ដំបង ពោធិ៍សាត់ និងកំពង់សោមជាដើម» ។
អ្នកស្រីបញ្ជាក់ថា ៖ « ចំពោះក្រុមហ៊ុនយើងនៅក្នុងឱកាសបុណ្យចូលឆ្នាំថ្មីប្រពៃណីជាតិខាងមុខនេះ លក់សំបុត្រមិនឡើងថ្លៃទេ គឺនៅរក្សាតម្លៃដដែល ហើយក្រុមហ៊ុនតែងតែសហការជាមួយក្រសួងសាធារណការ ក្នុងការអនុវត្តតម្លៃសំបុត្ររថយន្ត ដោយមិនអាចចេះតែកែប្រែនោះទេ » ។
លោក តូច ចាន់កុសល រដ្ឋលេខាធិការក្រសួងសាធារណការ និងដឹកជញ្ជូន មានប្រសាសន៍ថា ៖ « គ្រប់ក្រុមហ៊ុនទាំងអស់អះអាងថា មិនឡើងថ្លៃទេ ដោយគាត់ឯកភាពរក្សាតម្លៃលក់សំបុត្រនៅដដែល ក្នុងនោះមានក្រុមហ៊ុនខ្លះបានសហការជាមួយដៃគូ ចេញសំបុត្រធ្វើដំណើរដោយឥតគិតថ្លៃ តាមរយៈការចូលលេងក្នុងហ្វេសប៊ុករបស់ក្រុមហ៊ុន ។ ក្រុមហ៊ុនផ្សេងទៀតអះអាងថា ផ្តល់អាទិភាពជូនជនពិការ ដោយមិនគិតថ្លៃទាំងទៅ និងមក ជារៀងរហូត » ។
លោកបញ្ជាក់ថា ៖ « នៅឆ្នាំនេះ ក្រុមហ៊ុនមានស្មារតីភ្ញាក់រលឹក គាត់មិនចង់ឱ្យរាជរដ្ឋាភិបាលសំណូមពរដល់ពួកគាត់ទៀតទេ កុំឱ្យតែដល់ពេលបុណ្យទាន រាជរដ្ឋាភិបាលសំណូមពរទៅដល់ពួកគាត់ » ។
ទោះបីមានការអះអាងពីតំណាងក្រុមហ៊ុនថា មិនឡើងថ្លៃលក់សំបុត្ររថយន្តនាថ្ងៃបុណ្យចូលឆ្នាំថ្មីក្តី ប៉ុន្តែបើសិនដល់ពេលនោះរកឃើញថា មានក្រុមហ៊ុនណាមួយលក់សំបុត្រឡើងថ្លៃ លោក តូច ចាន់កុសល ថ្លែងថា ៖ « ក្នុងនាមក្រសួង យើងនឹងពិចារណាបញ្ហានេះ ។ លើសពីនេះ បើសិនក្រុមហ៊ុនផ្តល់សេវាដឹកជញ្ជូនអ្នកដំណើរណា ដែលតែងតែបង្កគ្រោះថ្នាក់ចរាចរណ៍ញឹកញាប់ ក្រសួងនឹងចេញលិខិតព្រមានទៅក្រុមហ៊ុននោះ ប៉ុន្តែផ្ទុយមកវិញ បើក្រុមហ៊ុនណាមួយព្យាយាមផ្តល់សេវាដឹកជញ្ជូនអ្នកដំណើរបានល្អ ក្រសួងនឹងរៀបចំលិខិតសរសើរ និងប្រកាសជាសាធារណៈ ដើម្បីឱ្យប្រជាពលរដ្ឋទូទៅបានដឹង ក្នុងការជ្រើសរើសយកក្រុមហ៊ុនមួយដែលផ្តល់សេវាល្អ និងមិនធ្វើឱ្យអ្នកដំណើរព្រួយបារម្ភ » ៕
ចែករំលែកព័តមាននេះ