យុវវ័យសម័យថ្មីមិនសូវចាប់អារម្មណ៍លេងល្បែងប្រជាប្រិយខ្មែរ
រាជធានីភ្នំពេញ ៖ តាមការអង្កេតនៅក្នុងយុគសម័យបច្ចេកវិទ្យាដ៏ទំនើបនេះ យុវវ័យហាក់មិនសូវអើពើលេងល្បែងប្រជាប្រិយខ្មែរ កម្សាន្តក្នុងឱកាសមុនបុណ្យចូលឆ្នាំប្រពៃណីជាតិទេ ។
រាជធានីភ្នំពេញ ៖ តាមការអង្កេតនៅក្នុងយុគសម័យបច្ចេកវិទ្យាដ៏ទំនើបនេះ យុវវ័យហាក់មិនសូវអើពើលេងល្បែងប្រជាប្រិយខ្មែរ កម្សាន្តក្នុងឱកាសមុនបុណ្យចូលឆ្នាំប្រពៃណីជាតិទេ ។
រាជធានីភ្នំពេញ ៖ តាមការអង្កេតនៅក្នុងយុគសម័យបច្ចេកវិទ្យាដ៏ទំនើបនេះ យុវវ័យហាក់មិនសូវអើពើលេងល្បែងប្រជាប្រិយខ្មែរ កម្សាន្តក្នុងឱកាសមុនបុណ្យចូលឆ្នាំប្រពៃណីជាតិទេ ។
ល្បែងប្រជាប្រិយខ្មែរបានថមថយប្រជាប្រិយភាពនៅដំណាក់កាលប៉ុន្មានឆ្នាំចុងក្រោយនេះ ក្នុងពេលបច្ចេកវិទ្យា និងបរិបទសង្គមផ្លាស់ប្តូរ ក្នុងនោះទំនោរចិត្តរបស់យុវវ័យក៏មានការប្រែប្រួលដែរ ។
តាមការតំណាលពីចាស់ៗថា ល្បែងប្រជាប្រិយខ្មែរត្រូវប្រជាពលរដ្ឋខ្មែរលើកយកមកលេងកំម្សាន្តតាំងពីមុនចូលឆ្នាំខ្មែរមកម្ល៉េះ ពោលអាចលេងតាំងពី១ខែ ឬកន្លះខែមុនចូលឆ្នាំខ្មែរមកដល់ ។ ល្បែងប្រជាប្រិយដែលគេនិយមលេងកំម្សាន្តខ្លាំងជាងគេមានចោលឈូង ទាញព្រ័ត្រ លាក់កន្លែង ។ល។ ប៉ុន្តែល្បែងប្រជាប្រិយខ្មែរទាំងនេះ ក្នុងយុគសម័យទំនើប មិនសូវទទួលបានការចាប់អារម្មណ៍លេងពីយុវវ័យឡើយ តែជំនួសមកវិញដោយការលេងល្បែងស៊ីសង ចាក់បាស់រាំលេងយ៉ាងផុសផលនៅតាមភូមិ ឃុំ ទៅវិញ ។
ល្បែងប្រជាប្រិយខ្មែរប្រឈមនឹងការបាត់បង់រូបរាងប្រសិនបើគ្មានការបំផុសឲ្យនាំគ្នាលេងកំម្សាន្តនោះទេ ។
ស្ត្រីវ័យចំណាស់ម្នាក់ឈ្មោះរី សូត្រ រស់នៅក្នុងភូមិក្តីកណ្តាល ស្រុកល្វាឯម ខេត្តកណ្តាល បាននិយាយកាលពីពេល ថ្មីៗកន្លងមកថា ពីអតីតកាលគាត់ធ្លាប់បានលេងល្បែងប្រជាប្រិយសប្បាយណាស់ គឺគាត់លេងតាំងពីមុនចូលឆ្នាំកន្លះខែ និងបាននាំគ្នាលេងនៅថ្ងៃចូលឆ្នាំ៣ថ្ងៃពេញគ្មានធ្វើអីទេដល់ថ្នាក់អត់បាយអត់ទឹកក៏មានដែរ ។
បើតាមអ្នកស្រីរី សូត្រថា ល្បែងប្រជាប្រិយខ្មែរនាពេលបច្ចុប្បន្ននេះ គឺមិនសូវមានការផុលផុសនៅក្នុងការលេងទៀតឡើយ ទាំងមនុស្សចាស់ និងយុវវ័យ ។ កក្តានេះទំនងមកពីយុវវ័យមិនសូវមូលមតិគ្នានៅក្នុងប្រមូលផ្តុំលេង បូករួមមនុស្សចាស់មួយចំនួនមិនសូវជាអើពើនាំយុវវ័យលេង ។
យុវជនឈ្មោះជា ប្រុស ជាបុគ្គលិកបម្រើការនៅភោជនីយដ្ឋានមួយក្នុងរាជធានីភ្នំពេញអះអាងថា ល្បែងប្រជាប្រិយខ្មែររូបគេពុំសូវមានការចាប់អារម្មណ៍នលេងកម្សាន្តឡើយ បើទោះបីជាគេធ្លាប់បានអង្គុយមើលគេលេងក៏ដោយ ។
ពុំមានមូលហេតុវែងឆ្ងាយទេ យុវវ័យរូបនេះបញ្ជាក់ថា គេហាក់មិនចូលចិត្តលេងល្បែងប្រជាប្រិយខ្មែរឡើយ ប៉ុន្តែបើកីឡាផ្សេងវិញដូចជាបាល់ទាត់ និងបាល់ទះចូលចិត្តលេង ។
យុវជនវិច្ចិកា ដែលជាមន្ត្រីប៉ូលិសមួយរូបអះអាងថា ល្បែងប្រជាប្រិយខ្មែរ គឺលោកក៏ចូលចិត្តលេងដែរ នាឱកាសចូលឆ្នាំខ្មែរ ប៉ុន្តែលើកក្តាពេលវេលា ទើបលោកមិនអាចឆ្លៀតពេលបាន។ យ៉ាងណាក៏ដោយ លោកអាចនឹងលេងល្បែងប្រជាប្រិយខ្មែរខណៈដែលមានពេលគ្រប់គ្រាន់ ហើយមានការបបួលនាំលេងពីបណ្តាលមិត្តភក្តិព្រោះលោកក៏ចូលចិត្តដែរ ។
យុវវតីហ៊ិន ម៉ាណែត បុគ្គលិកបម្រើការនៅក្រុមហ៊ុនឯកជនមួយឲ្យដឹងថា នាងពេញចិត្តល្បែងប្រជាប្រិយខ្មែរ ប៉ុន្តែនាងហាក់មានចិត្តអៀនខ្មាស់បន្តិចក្នុងការចូលរួមលេងកម្សាន្ត ។ ប៉ុន្តែនាងអាចនឹងចូលលេងបានក្នុងពេលដែលមានការនាំលេង និងស្រុះស្រួលគ្នាចូលលេងច្រើន ដោយមានការយោគយល់គ្នា និងការសាមគ្គីភាពជាមិត្តភក្តិ ។
មានការលើកឡើងថា មូលហេតុសំខាន់យ៉ាងចំនួន៣ អាចពន្យល់ពីការប្រែប្រួលដែលធ្វើឲ្យមានការថមថយការចូលរួមលេងល្បែងប្រជាប្រិយខ្មែរនាឱកាសចូលឆ្នាំខ្មែរ ក្នុងនោះទី១៖ គឺកត្តាសេដ្ឋកិច្ច ទី២៖ គឺការហូរចូលនៃវប្បធម៌បរទេស និងទី៣៖ គឺការរីកចម្រើននៃបច្ចេកវិទ្យា ។
ដំបូងនិយាយពីកត្តាសេដ្ឋកិច្ច ។ សព្វថ្ងៃនេះ ដើម្បីទ្រទ្រង់ជីវភាព ប្រជាពលរដ្ឋខ្មែរភាគច្រើនជាយុវជនបានបង្ខំចិត្តធ្វើចំណាកស្រុក ពីជនបទទៅទីក្រុង ឬទៅក្រៅប្រទេស ដើម្បីរកប្រាក់ចំណូល ។ អវត្តមាននៃយុវជនពីស្រុកកំណើតដូច្នេះបានធ្វើឲ្យភូមិឋានស្ងប់ស្ងាត់ គ្មានសកម្មភាពលេងល្បែងប្រជាប្រិយនៅពេលបុណ្យទាន ម្ដងៗ ។
ក្រៅពីចំណាកស្រុក ភាពមមាញឹក និងភាពនឿយហត់ពីការប្រកបរបររកស៊ីប្រចាំថ្ងៃដើម្បីជីវភាព ក៏បង្ខំឲ្យពលរដ្ឋខ្មែរលះបង់ចោលទម្លាប់លេងល្បែងប្រជាប្រិយដើម្បីអបអរសាទរបុណ្យចូលឆ្នាំថ្មី ។ នេះសម្រាប់អ្នកដែលមិនសូវមានជីវភាពធូរធារ ។ ចំណែកអ្នកដែលមានជីវភាពធូរធារ ក៏មិននិយមលេងល្បែងប្រជាប្រិយដែរ ដោយនិយមធ្វើដំណើរកម្សាន្តទៅតាមរមនីយដ្ឋាននានាជំនួសវិញ ។
ខណៈដែលមិនសូវនិយមលេងល្បែងប្រជាប្រិយ យុវជនខ្មែរភាគច្រើននាំគ្នាងាកមករាំបទសម័យទំនើប ញាក់កន្ត្រាក់អារម្មណ៍វិញ ដើម្បីអបអរឆ្នាំថ្មី ។ នេះសរបង្ហាញឲ្យឃើញពីការហូរចូលនៃវប្បធម៌បរទេសមកក្នុងសង្គមខ្មែរ ហើយដែលយុវជនខ្មែរភាគច្រើន ទទួលមកប្រតិបត្តិយ៉ាងគគ្រឹកគគ្រេងជាទីបំផុត ។
ចំណែកពលរដ្ឋមួយចំនួនទៀត ដ្បិតតែមិនភ្លើតភ្លើននឹងវប្បធម៌បរទេសក៏ដោយ ក៏មិនមែនមានន័យថា ពួកគាត់ចាប់អារម្មណ៍ចង់លេងល្បែងប្រជាប្រិយខ្មែរដែរ ខណៈសព្វថ្ងៃនេះបច្ចេកវិទ្យាកាន់តែរីកចម្រើន ហើយពលរដ្ឋមានជម្រើសកាន់តែសម្បូរបែបក្នុងការកំម្សាន្ត ។ មិនដូចពីសម័យមុនដែលគ្មានអ៊ីនធើណែត គ្មានទូរស័ព្ទទំនើប តម្រូវឲ្យពលរដ្ឋនាំគ្នាលេងល្បែងប្រជាប្រិយ ទើបបានសប្បាយនោះឡើយ ។
ល្បែងប្រជាប្រិយខ្មែរ ដែលមានរហូតដល់ទៅជាង២០ទម្រង់ មិនត្រឹមតែមានប្រយោជន៍ពង្រឹងសាមគ្គីភាព ធ្វើឲ្យសប្បាយ មានសុខភាពកម្លាំងកាយ និងស្មារតីរឹងមាំទេ វាក៏ជាអត្តសញ្ញាណមួយរបស់ខ្មែរ ដែលបន្សល់ទុកតាំងពីបុរាណកាលដែរ ។ ការលើកតម្កើងល្បែងប្រជាប្រិយខ្មែរ ចងក្រងជាឯកសារ ឬចាក់បញ្ចាំងការលេងល្បែងនេះនៅតាមកញ្ចក់ទូរទស្សន៍ គឺជារឿងល្អមួយ ប៉ុន្តែប្រសិនបើជាក់ស្ដែង ល្បែងអស់នេះគ្មានសកម្មភាពលេងឲ្យបានផុលផុសទេ នៅទីបំផុតវាអាចនឹងបាត់បង់ជាក់ជាពុំខាន ៕
ចែករំលែកព័តមាននេះ