ខេត្តសៀមរាប ៖ «សំណង់ភូមិខ្ញុំ» ស្ថិតនៅពីខាងជើងប្រាសាទបាយ័ន ជាផ្នែកមួយនៃហេដ្ឋារចនាសម្ព័ន្ធព្រឹត្តិការណ៍អង្គរសង្ក្រាន្ត កសាងបានជាង៩០%ហើយ ។
លោកសោម រតនា ប្រធានក្រុមការងារទំនាក់ទំនងសាធារណៈនៃព្រឹត្តិការណ៍អង្គរសង្ក្រាន្ត ឱ្យដឹងថា សំណង់ «និមិត្តកម្មភូមិខ្ញុំ» ចាប់ផ្តើមសាងសង់កាលពីថ្ងៃទី១៣ ខែមីនា ឆ្នាំ២០១៧ ហើយគ្រោងនឹងបញ្ចប់ឱ្យរួចរាល់ជាស្ថាពរមុន១សប្តាហ៍នៃការចូលមកដល់ព្រឹត្តិការណ៍អង្គរសង្ក្រាន្ត ថ្ងៃទី១៣ ខែមេសា ឆ្នាំ២០១៧ ។ កិច្ចកាទាំងនេះបានដាក់បន្ទុកទទួលខុសត្រូវសាងសង់ ដោយអាជ្ញាធរជាតិអប្សរា ។
សំណង់នានាដែលមាននៅក្នុងនិមិត្តដ្ឋានភូមិខ្ញុំរួមមាន ៖ ផ្ទះសេដ្ឋី លំនៅឋានប្រពៃណី អ្នកនេសាទ ផ្ទះព្នង រោងសិប្បកម្ម ឆាកសម្តែងសិល្បៈ ផ្ទះលំហែកាយរបស់មន្ត្រីអ្នកមុខអ្នកការនាសម័យដើម ល្ខោនខោល សម្តែងជាលើកទី១ របាំព្រះរាជទ្រព្យខ្មែរសម្តែងដឹកនាំដោយសម្តេចព្រះរៀបនរោត្តមបុប្ផាទេវី យកទៅបង្ហាញពីប្រវត្តិ១០០ឆ្នាំនៃរបាំព្រះរាជទ្រព្យខ្មែរ ការតាំងពងមាន់យក្ស ចាប៉ីដងវែងយក្ស ដែលដាក់ចូលជាសម្បត្តិបេតិកភណ្ឌពិភពលោក ។ ក្រៅពីនេះមានការតុបតែងលម្អនៅតាមកន្លែង ផ្សេងៗមួយចំនួនទៀត និងមានតូបផ្សារលក់ដូរជាដើម ។
ចំណែកផ្ទះកូនកំលោះកូនក្រមុំនៃជនជាតិភាគតិច(គ្រឹង) នឹងនាំពីខេត្តរតនគិរីកសាងនៅក្នុងភូមិខ្ញុំ ហើយជនជាតិគ្រឹងប្រមាណជាង១០នាក់ នឹងមានវត្តមានបង្ហាញប្រពៃណីរស់នៅរបស់ពួកគេនៅក្នុងព្រឹត្តិការណ៍អង្គរសង្ក្រាន្ត ។
នេះគឺជាលើទី៥ហើយ ដែលសហភាពសហព័ន្ធយុវជនកម្ពុជា សហការជាមួយអាជ្ញាធរជាតិអប្សរា និងអាជ្ញាធរពាក់ព័ន្ធរួមគ្នារៀបចំព្រឹត្តិការណ៍អង្គរសង្ក្រាន្តនៅលើទឹកដីដ៏ពិសិដ្ឋនៃខេត្តសៀមរាប ។
មរតកជោគជ័យជាប្រវត្តិសាស្ត្រនៃព្រឹត្តិការណ៍អង្គរសង្ក្រាន្តទាំង៤លើកកន្លងទៅ ញ៉ាំងឱ្យព្រឹត្តិការណ៍នេះបន្តសម្រេចគោលដៅចម្បងៗជាច្រើន ក្នុងនោះព្រឹត្តិការណ៍នេះក៏បានផ្តល់ឱកាសឱ្យកម្ពុជាផ្សព្វផ្សាយ និងលើកតម្កើងពីអរិយធម៌ វប្បធម៌ ព្រមទាំងស្នាដៃដ៏វិសេសវិសាលរបស់ខ្លួននៅលើឆាកអន្តរជាតិ ។
ព្រឹត្តិការណ៍អង្គរសង្ក្រាន្តរៀបចំជាថ្មីម្តងទៀតដោយផ្អែកទៅលើភាពជោគជ័យដ៏ត្រចះត្រចង់ នៃព្រឹត្តិការណ៍នេះនាបណ្តាឆ្នាំកន្លងទៅ ៕
ចែករំលែកព័តមាននេះ