គ្រោះបាក់ច្រាំងទន្លេមេគង្គក្រោម នៅតែបន្តគំរាមកំហែងក្នុងស្រុកលើកដែក
ខេត្តកណ្តាល ៖ ផ្ទះប្រជាពលរដ្ឋរស់នៅតាមដងទន្លេមេគង្គក្រោមចំណុចឃុំព្រែកទន្លាប់ ឃុំព្រែកដាច់ ឃុំពាមរាំង ឃុំខ្ពបអាទាវ និងឃុំសណ្តារ ស្រុកលើកដែក
ខេត្តកណ្តាល ៖ ផ្ទះប្រជាពលរដ្ឋរស់នៅតាមដងទន្លេមេគង្គក្រោមចំណុចឃុំព្រែកទន្លាប់ ឃុំព្រែកដាច់ ឃុំពាមរាំង ឃុំខ្ពបអាទាវ និងឃុំសណ្តារ ស្រុកលើកដែក ខេត្តកណ្តាលជាច្រើនគ្រួសារ បានបង្ខំចិត្តរុះរើខ្លះរត់ទៅសុំដីបងប្អូនអ្នកស្រុកសង់កូនខ្ទមប្រក់តង់ស្នាក់នៅបណ្តោះអាសន្ន ហើយក៏មានការដាច់ផ្លូវថ្នល់ជាតិលេខ១៤ចូលទៅកាន់ច្រកទ្វារព្រំដែនអន្តរជាតិ(កម្ពុជា.វៀតណាម) ក្អមសំណមួយកន្លែងក្នុងឃុំខ្ពបអាទាវជួសជុលរយៈពេល៣-៤ឆ្នាំមិនទាន់ហើយ ឥឡូវលែងឃើញធ្វើ ទុកចោលបណ្តាលឲ្យច្រកទ្វារអន្តរជាតិមួយនេះមានសភាពស្ងប់ស្ងាត់បាត់បង់សេដ្ឋកិច្ចយ៉ាងធ្ងន់ធ្ងរ។
ទោះយ៉ាងណាច្រាំទន្លេនៅតែបន្តបាក់ធ្វើឲ្យផ្ទះពលរដ្ធជាច្រើនគ្រួសារទៀតកំពុងមានការព្រួយបារម្ភ ជាពិសេសផ្លូវថ្នល់ជាតិលេខ១៤មួយកន្លែងទៀតត្រង់ចំណុចភូមិព្រែកដាច់ ឃុំព្រែកទម្លាប់ក៏កំពុងរងការគំរាមកំហែងនៃគ្រោះបាក់ច្រាំងទន្លេ ដោយបានបាក់ដល់ចិញ្ចើមថ្នល់ដែរ។ ប្រជាពលរដ្ឋដែលរស់នៅតាមដងទន្លេមេគង្គក្រោមប្រឈមនឹងគ្រោះបាក់ច្រាំងទន្លេបានលើកឡើងដូចៗគ្នាថា គ្រោះបាក់ច្រាំងទន្លេនេះកើតឡើងរយៈពេលប្រហែល៥ឆ្នាំហើយ បានធ្វើឲ្យផ្ទះពលរដ្ឋរាប់រយគ្រួសារត្រូវបង្ខំចិត្តរុះរើជាបន្តបន្ទាប់ និងដីស្រែចម្ការបូករួមទាំងដីលំនៅឋានម្នាក់ៗ៥០០-៦០០ម៉ែត្រ បានបាក់ធ្លាក់ចូលទៅក្នុងបាតទន្លេអស់។
ពលរដ្ឋបន្តទៀតថា បើអ្នកមានដីខ្លួនឯងស្រួលទេ តែបើអ្នកគ្មានដីជួបការលំបាកខ្លាំងណាស់ ខ្លះទៅសុំដីគេសង់កូនខ្ទមនៅបណ្តោះអាសន្ន ហើយខ្លះទៀតក៏ស៊ូទ្រាំរស់នៅផ្សងនឹងគ្រោះថ្នាក់ទោះបីគ្រោះបាក់ច្រាំងទន្លេបានបាក់ជិតដល់ជើងសរសរផ្ទះបាយក៏ដោយ ព្រោះពួកគាត់ខ្លះលើកឡើងថា បើរុះរើទៅមិនដឹងជាទៅនៅទីណាបើគ្មានបងប្អូនមានដីនឹងគេផង។ លោក នូវ សំណាង អភិបាលស្រុកលើកដែកបានឲ្យដឹងតាមទូរស័ព្ទនៅសៀលថ្ងៃទី១០ ខែមេសានេះថា អាជ្ញាធរតែងតែយកចិត្តទុកដាក់ចុះជួយរុះរើផ្ទះពលរដ្ឋរងគ្រោះបាក់ច្រាំងទន្លេជាបន្តបន្ទាប់ ហើយចំពោះចំណុចបាក់ច្រាំងទន្លេដល់ចិញ្ចើមថ្នល់ជាតិលេខ១៤ត្រង់ភូមិព្រែកដាច់ ឃុំព្រែកទម្លាប់នេះគឺខាងមន្ត្រីជំនាញចុះសិក្សាចំនួន២ដងហើយ។
ចំណែកបាក់ដាច់ដល់ថ្នល់ជាតិត្រង់ចំណុចឃុំខ្ពបអាទាវ ខាងជំនាញសិក្សាថាចាំធ្វើផ្លូវវាងវិញ។ រីឯពលរដ្ឋដែលទ្រាំរស់នៅចំណុចបាក់ច្រាំងដោយសារពួកគាត់គ្មានដីនៅ ដូច្នេះទ្រាំរស់ផ្សងនឹងគ្រោះថ្នាក់ទៅ។ ចំពោះបញ្ហានេះអាជ្ញាធរស្រុកបានធ្វើរបាយការណ៍ទៅខេត្តរួចហើយ ព្រោះលើសសមត្ថភាពស្រុកដោះស្រាយជូនពួកគាត់៕
ចែករំលែកព័តមាននេះ