ផ្ទុះឡស្លា.ប់2នាក់របួស5នាក់ បានដឹងថា សិប្បកម្មពុំមានច្បាប់
រាជធានីភ្នំពេញ ៖ យ៉ាងហោចណាស់ មានមនុស្ស២នាក់បានស្លា.ប់យ៉ាងអាណោចអាធ័ម និង៥នាក់ផ្សេងទៀតរងរបួសធ្ងន់និងស្រាល
រាជធានីភ្នំពេញ ៖ យ៉ាងហោចណាស់ មានមនុស្ស២នាក់បានស្លាប់យ៉ាងអាណោចអាធ័ម និង៥នាក់ផ្សេងទៀតរងរបួសធ្ងន់និងស្រាល ក្នុងហេតុការណ៍ផ្ទុះបំពង់ឡចំហាយដ៏ធំនៅរោងសិប្បកម្មពុម្ពសម្លៀកបំពាក់មួយកន្លែង គ្មានយីហោ ស្ថិតក្នុងភូមិឫស្សី សង្កាត់ស្ទឹងមានជ័យ ខណ្ឌមានជ័យ កាលពីវេលាម៉ោង១០និង៣០នាទីព្រឹកថ្ងៃទី៨ ខែមេសា ។ នេះជាសោកនាដកម្មមួយថ្មីទៀត បន្ទាប់ពីការផ្ទុះឡចំហាយក្នុងរោងចក្រ កាលពីខែមុន ដែលប៉ើងបំពង់ថ្មធ្លាក់សង្កត់លើកម្មការិនីកំពុងអង្គុយហូបបាយថ្ងៃត្រង់ បណ្តាលឲ្យស្លាប់គួរឱ្យសង្វេគ ។
ជនរងគ្រោះដែលស្លាប់ទាំង២នាក់ ម្នាក់ឈ្មោះ សឿត ផល ភេទប្រុស អាយុ២៦ឆ្នាំ ជាសន្តិសុខយាមរោងចក្រ មានស្រុកកំណើត នៅភូមិបឹងខ្នារ ឃុំបឹងខ្នារ ស្រុកបាកាន ខេត្តពោធិ៍សាត់ និងម្នាក់ទៀតឈ្មោះ គង់ ផាន្នី ភេទស្រី អាយុ៦១ឆ្នាំ ជាកម្មករខាងអនាម័យ ។ ដោយឡែកជនរងគ្រោះប្រុសស្រី៥នាក់ទៀត ត្រូវបានបញ្ចូនទៅសង្គ្រោះ
នៅតាមមន្ទីរពេទ្យផ្សេងៗគ្នា និងពុំទាន់បានស្គាល់អត្តសញ្ញាណនៅឡើយ ។
មន្ត្រីសមត្ថកិច្ចឱ្យដឹងថា ម្ចាស់ទីតាំងសិប្បកម្មឈ្មោះ ហៀក ធា ភេទស្រី អាយុ២៩ឆ្នាំ មានទីលំនៅក្នុងសង្កាត់វាលវង់ ខណ្ឌ៧មករា ។ ស្ត្រីជាម្ចាស់ទីតាំងនេះ មានភាគហ៊ុនជាមួយជនជាតិចិនម្នាក់ដែលស្នាក់នៅឯប្រទេសចិន ។
តាមប្រភពព័ត៌មាននៅកន្លែងកើតហេតុឱ្យដឹងថា មុនពេលមានហេតុការណ៍ផ្ទុះនេះ ក្រុមកម្មករដែលធ្វើការសរុបនៅសិប្បកម្មខាងលើមានជាង២០នាក់ បាននាំគ្នាចេញទៅរកហូបបាយទឹកអស់ហើយ នៅសល់តែ៦ទៅ៧នាក់រួមមានទាំងកម្មករអនាម័យ និងសន្តិសុខផងកំពុងបង្ហើយការងារ ។
ខណៈនោះ បំពង់ឡចំហាយទាំង២មិនទាន់ត្រូវបានបន្ថយភ្លើងកម្តៅដោយដុតអុសនៅឡើយទេ ហើយស្រាប់តែឡមួយក្នុងចំណោមឡទាំង២ បានផ្ទុះបណ្តាលឱ្យបញ្ចេញកម្លាំងចំហាយខ្យល់ដ៏ខ្លាំងប៉ើងយុវជនជាសន្តិសុខដែលកំពុងឈរយាមនៅក្បែរឡនោះ ខ្ទាតផ្ទប់ទៅនឹងជញ្ចាំងរបងថ្មបែកក្បាលស្លាប់ភ្លាមៗយ៉ាងអាណោចអាធ័មនៅនឹងកន្លែង ។ ដោយឡែកមនុស្សចំនួន៦នាក់ផ្សេងទៀតដែលនៅក្បែរនោះ ក៏ខ្ទាតបំណែកឡប៉ះចំត្រូវរងរបួសធ្ងន់ ស្រាលដែរ ក្នុងនោះលោកស្ត្រីចំណាស់ម្នាក់ជាកម្មករអនាម័យ រងរបួសខ្ទេចជើងទាំង២ និងបានស្លាប់ពេលបញ្ជូនទៅសង្គ្រោះដល់មន្ទីរពេទ្យមិត្តភាពខ្មែរ-សូវៀត ។ ចំណែករបងថ្ម ដំបូលដែក និងសម្ភារមួយចំនួនធំ បានរងការខូចខាតធ្ងន់ដែរ ។
តាមស្ត្រីម្ចាស់ទីតាំងឱ្យដឹងថា ឡចំហាយនេះគឺប្រើសម្រាប់រំហួតយកកម្តៅខ្យល់ ដើម្បីធ្វើពុម្ពសម្លៀកបំពាក់ឱ្យស្ងួតស្អាត និងខោអាវខ្លះអាចលាយឡំពណ៌ចូលគ្នាបានស្អាតល្អ ។ ឡនេះប្រើប្រាស់កម្តៅភ្លើងអុស លាយឡំជាមួយទឹកបន្តិច និងចរន្តអគ្គិសនីភ្ជាប់ជាមួយកង្ហារ ដើម្បីបក់ភ្លើងឱ្យឆេះខ្លាំងក្នុងការបង្កើនកម្តៅខ្យល់ចំហាយឱ្យកាន់តែខ្លាំង ។
សូមបញ្ជាក់ថា ក្រោយកើតហេតុ ស្ត្រីជាម្ចាស់ទីតាំងត្រូវបានសមត្ថកិច្ចនាំយកទៅកាន់ប៉ុស្តិ៍នគរបាលរដ្ឋបាល ដើម្បីសាកសួរព័ត៌មានបន្ថែម ។
អធិការរងនគរបាលខណ្ឌមានជ័យ លោក ហួរ ម៉េងវ៉ាង ឱ្យដឹងថា កាលពីយប់ថ្ងៃទី៧ ខែមេសា មុនកើតហេតុមួយថ្ងៃ ឡដែលផ្ទុះខាងលើ បានធ្លាយហៀរចំហាយចេញមកក្រៅ បង្កឱ្យមានការភ្ញាក់ផ្អើលដល់ក្រុមកម្មករម្តងមកហើយ ប៉ុន្តែត្រូវបានមេការមកជួសជុលរួចរាល់នៅយប់ថ្ងៃដដែលនោះ ។ លុះព្រឹកឡើង ម៉ោងជាង១០ ឡនោះក៏ស្រាប់តែផ្ទុះបណ្តាលឱ្យមានសោកនាដកម្មស្លាប់និងរបួសមនុស្សបែបនេះតែម្តង ចំណែកបុរសជាមេការ និងជាអ្នកដែលអាចទទួលខុសត្រូវបានរត់គេចខ្លួន ។
ទីតាំងកើតហេតុ ត្រូវបានសមត្ថកិច្ចជំនាញកោសល្យវិច័យចុះពិនិត្យសពនិងកន្លែងខូចខាត ។ ក្រោយពីពិនិត្យរួច សពជនរងគ្រោះទាំង២នាក់ ត្រូវបានប្រគល់ជូនក្រុមគ្រួសារ ដើម្បីយកទៅធ្វើបុណ្យតាមប្រពៃណី ។
ជុំវិញករណីខាងលើនេះ លោក ហ៊ុយ វីរៈ នាយករដ្ឋបាលសាលាខណ្ឌមានជ័យ ឱ្យដឹងថា ក្រោយការពិនិត្យយ៉ាងល្អិតល្អន់មកឃើញថា ទីតាំងសិប្បកម្មនេះ ពុំមានច្បាប់អនុញ្ញាតត្រឹមត្រូវពីមន្ទីរជំនាញ ឬក្រសួងពាក់ព័ន្ធឡើយ។ ដូច្នេះហើយ ក្រោយពីសមត្ថកិច្ចពិនិត្យរួចរាល់អាជ្ញាធរនឹងសម្រេចបិទទីតាំងអាជីវកម្មនេះជាបណ្តោះអាសន្នសិន ។
បើយោងតាមមន្ត្រីសាលាខណ្ឌថា ទីតាំងនេះអត់មានច្បាប់អនុញ្ញាត តែបែរជាគេធ្វើអាជីវកម្មបាន ដែលមិនដឹងថា ជាកំហុសខាងណាទេ លុះដល់ពេលមានគ្រោះថ្នាក់កើតឡើង ទើបដឹងថាពុំមានច្បាប់ ។ ការរងគ្រោះរបស់កម្មករដោយសារការផ្ទុះឡចំហាយ គប្បីជាការដាស់តឿនដល់ស្ថាប័នជំនាញ គួរមានស្មារតីទទួលខុសត្រូវ ដោយមិនមែនចាប់ត្រឹមកម្មករដូចរោងចក្រមុននោះទេ គឺអ្នកទទួលខុសត្រូវ ក៏ត្រូវតែទទួលខុសដូចគ្នា ៕
ចែករំលែកព័តមាននេះ