ភ្នំពេញ៖ រាជរដ្ឋាភិបាល បានប្រកាសការរំពឹងទុកថា ពលរដ្ឋកម្ពុជាម្នាក់ នៅឆ្នាំ២០២៣ ប្រាក់ចំណូលនឹងកើនឡើងដល់ ១៩២៤ដុល្លារអាម៉េរិក ខណៈនៅឆ្នាំ២០២២ នេះ ប្រាក់ចំណូលពលរដ្ឋកម្ពុជាម្នាក់ មានត្រឹមតែ ១៧៨៥ដុល្លារអាម៉េរិកប៉ុណ្ណោះ។
នៅឆ្នាំ២០២៣ សេដ្ឋកិច្ចកម្ពុជា ក៏ត្រូវបានរាជរដ្ឋាភិបាល ព្យាករថា នឹងសម្រេចបានអត្រាកំណើន ក្នុងរង្វង់ ៦,៦% ខណៈដែលកំណើនសេដ្ឋកិច្ចកម្ពុជា ក្នុងឆ្នាំ២០២២ នេះ ត្រូវបានរាយតម្លៃថា នឹងបន្តនិន្នាការកើនឡើងធៀបនឹងកំណើននៅឆ្នាំ២០២១ ដោយសម្រេចកំណើនក្នុងអត្រាប្រមាណ ៥,៤%។
រាជរដ្ឋាភិបាល កត់សម្គាល់ថា ទោះបីជាទទួលរងផលប៉ះពាល់ពីវិបត្តិសង្គ្រាមរុស្ស៊ី និងអ៊ុយក្រែនយ៉ាងណាក្តី ប៉ុន្តែសេដ្ឋកិច្ចកម្ពុជា នៅតែបន្តកើនឡើង ដោយសារតែការបន្តភាពល្អប្រសើរនៃតម្រូវការខាងក្រៅ និងស្របពេល ដែលសកម្មភាពសេដ្ឋកិច្ចក្នុងស្រុក បានវិលត្រឡប់មករកប្រក្រតីភាពវិញ បន្ទាប់ពីការប្រកាសបើកប្រទេសឡើងវិញ ចាប់ពីខែវិច្ឆិកា ឆ្នាំ២០២១ កន្លងមក។
កំណើនប្រាក់ចំណូលរបស់ពលរដ្ឋកម្ពុជា រួមទាំងកំណើនសេដ្ឋកិច្ចកម្ពុជាខាងលើនេះ ត្រូវបានក្រសួងសេដ្ឋកិច្ច និងហិរញ្ញវត្ថុ លើកឡើងនៅក្នុងខ្លឹមសារសង្ខេបប្រតិបត្តិ ស្តីពី សេចក្តីព្រាងច្បាប់ ស្តីពី ហិរញ្ញវត្ថុសម្រាប់ការគ្រប់គ្រងឆ្នាំ២០២៣។ សេចក្តីព្រាងច្បាប់ថវិកាជាតិឆ្នាំ២០២៣ ត្រូវបានគណៈរដ្ឋមន្ត្រី ប្រជុំអនុម័ត កាលពីព្រឹកថ្ងៃសុក្រ ទី២៨ ខែតុលា ឆ្នាំ២០២២។
សេចក្តីព្រាងច្បាប់ថវិកាជាតិ ឆ្នាំ២០២៣ ត្រូវបានរាជរដ្ឋាភិបាល គ្រោងចំណាយសរុប ចំនួន ៣៩ ២០៦ ២០៥លានរៀល ស្មើប្រមាណ ៩៤០៨លានដុល្លារអាម៉េរិក ស្មើនឹង ២៩,៨៧% នៃផ.ស.ស។ ថវិកជាតិ ឆ្នាំ២០២៣ មានកំណើន ១៣% ធៀបនឹងឆ្នាំ២០២២។
តាមរាជរដ្ឋាភិបាល ថវិកាជាតិ ឆ្នាំ២០២៣ គ្រោងចំណាយច្រើនដូច្នេះ ដោយសារតែនៅឆ្នាំ២០២៣ កម្ពុជាត្រូវរៀបចំការបោះឆ្នោតជាតិផង និងកម្ពុជា ធ្វើជាម្ចាស់ផ្ទះរៀបចំការប្រកួតកីឡាស៊ីហ្គេម ផងដែរ៕
ចែករំលែកព័តមាននេះ