វាយប្រហារព្រះវិហារគ្រឹស្ត2ស្លា.ប់44នាក់
ការវាយប្រហារដោយគ្រឿងផ្ទុះ២ប្រកាសទទួលខុសត្រូវដោយក្រុមរដ្ឋអ៊ិស្លាមកាលពីថ្ងៃទី៩ មេសា ប្រឆាំងព្រះវិហារគ្រឹស្ត២នៅអេហ្ស៊ីប បណ្តាលឱ្យ
ការវាយប្រហារដោយគ្រឿងផ្ទុះ២ប្រកាសទទួលខុសត្រូវដោយក្រុមរដ្ឋអ៊ិស្លាមកាលពីថ្ងៃទី៩ មេសា ប្រឆាំងព្រះវិហារគ្រឹស្ត២នៅអេហ្ស៊ីប បណ្តាលឱ្យមនុស្សស្លាប់យ៉ាងតិច៤៤នាក់ និងរបួសប្រមាណជា១០០នាក់ ។
ការផ្ទុះលើកដំបូងគឺក្នុងព្រះវិហារគ្រឹស្ត TANTA នៅតំបន់ដីសណ្តទន្លេនីល ហើយការផ្ទុះទី២នៅមុខព្រះវិហារគ្រឹស្តមួយនាទីក្រុងអាឡិចសាន់ឌ្រី ។ ការវាយប្រហារសំដៅព្រះវិហារ SAINT MARC ក្រុងអាឡិចសាន់ឌ្រី ជាទីតាំងប្រវត្តិសាស្ត្ររបស់សាសនាគ្រឹស្តអ័រតូដុក ត្រូវបានទូរទស្សន៍រដ្ឋអេហ្ស៊ីបរាយការណ៍ថា ជាស្នាដៃរបស់ជនអត្តឃាតម្នាក់ ។ ចំណែកប្រភពនៃការផ្ទុះក្នុងព្រះវិហារ TANTA នៅពុំទាន់បញ្ជាក់នៅឡើយ ។ ការវាយប្រហារភេរវកម្មទាំង២នេះប្រកាសទទួលខុសត្រូវដោយពួកជីហាដក្រុមរដ្ឋអ៊ិស្លាមតាមរយៈទីភ្នាក់ងារព័ត៌មានរបស់គេ AMAQ ។
សាក្សីម្នាក់ លោកស្រី VIVIANE FARIG ដែលមានវត្តមានក្នុងព្រះវិហារ SAINT GEORGES ក្រុង TANTA និយាយថា មានការផ្ទុះយ៉ាងខ្លាំងមួយរួចមានអណ្តាតភ្លើង ព្រមទាំងផ្សែងពាសពេញ ហើយបណ្តាអ្នករបួសសុទ្ធតែធ្ងន់ធ្ងរ ។ ខ្ញុំឃើញពោះវៀនរបស់បណ្តាអ្នករបួស ហើយមនុស្សមួយចំនួនត្រូវដាច់ដៃដាច់ជើង ។
ក្រសួងសុខាភិបាលអេហ្ស៊ីបរៀបរាប់ពីតុល្យការបណ្តោះអាសន្នពីអ្នកស្លាប់២៧នាក់ និងរបួស៧៨នាក់នៅក្រុង TANTA ។ រួចការផ្ទុះនៅទីក្រុងអាឡិចសាន់ឌ្រី ដែលកើតមានច្រើនម៉ោងបន្ទាប់ពីការផ្ទុះដំបូង បណ្តាលឱ្យមនុស្សស្លាប់យ៉ាងតិច១៧នាក់ ក្នុងនោះមានប៉ូលិស៣នាក់ និងរបួស៤៨នាក់ ។
ការផ្ទុះទាំងនេះពេលកំពុងមានការសូត្រធម៌កើតមានមួយសប្តាហ៍មុនបុណ្យគ្រឹស្ត PÂQUE ។ សម្តេចប៉ាបហ្វ្រង់ស្វ័រ ដែលត្រូវទៅកាន់អេហ្ស៊ីបចុងខែនេះ បានបរិហារការវាយប្រហារទាំងនេះថា ជាអំពើភេរវកម្ម ។
ប្រធានាធិបតីអេហ្ស៊ីប លោកអាប់ដែលហ្វាតាហ៍ អាល់ស៊ីសស៊ី បានកោះប្រជុំបន្ទាន់ក្រុមប្រឹក្សាការពារជាតិ ចំណែកបណ្តាភ្នាក់ងាររបស់លោកប្រកាសថា កងទ័ពទទួលបញ្ជាឱ្យដាក់ពង្រាយនៅតំបន់វាយប្រហារដើម្បីជួយប៉ូលិស ហើយការពារបណ្តាទីតាំងយុទ្ធសាស្ត្រ ។ ក្នុងសេចក្តីប្រកាសមួយលោកអះអាងថា ការវាយប្រហារនេះនឹងកាន់តែពង្រឹងថែមទៀតការប្តេជ្ញាចិត្តរបស់ពលរដ្ឋអេហ្ស៊ីប ដើម្បីបោះជំហានឆ្ពោះទៅរកសន្តិសុខ ស្ថេរភាព និងការអភិវឌ្ឍន៍ ។
ប្រធានាធិបតីអេហ្ស៊ីបនាថ្ងៃទី៩ មេសា នោះបានប្រកាសភាពអាសន្ននៅអេហ្ស៊ីបក្រោយការវាយប្រហារទាំង២នេះ ។ ការប្រកាសជាមហោឡារិកនេះរបស់ប្រមុខរដ្ឋអេហ្ស៊ីបតាមទូរទស្សន៍នៅត្រូវអនុម័តដោយសភា ។ ការប្រកាសអាសន្ននេះ មានរយៈពេល៣ខែ ហើយលោកបញ្ជាក់ថា នេះជាវិធានការដើម្បីការពារ និងថែរក្សាប្រទេស ។
សាសនិកគ្រឹស្តអ័រតូដុកអេហ្ស៊ីបតំណាងឱ្យប្រមាណជា១០% នៃប្រជាជនអេហ្ស៊ីបជាប្រទេសមានប្រជាជនសរុប៩០លាននាក់ ។ រយៈពេលប៉ុន្មានឆ្នាំចុងក្រោយនេះ ពួកគ្រឹស្តជាគោលដៅនៃការវាយប្រហារភេរវកម្មជាច្រើនដូចជាការវាយប្រហារអត្តឃាតក្នុងព្រះវិហារគ្រឹស្តក្រុងគែរកាលពីខែធ្នូ បណ្តាលឱ្យមនុស្សស្លាប់២៥នាក់ និងរបួស៤៩នាក់ ហើយប្រកាសទទួលខុសត្រូវដោយក្រុមរដ្ឋអ៊ិស្លាមដែរ ៕
ចែករំលែកព័តមាននេះ