ទីក្រុងប៉ារីស ៖ យោងតាមសេចក្តីរាយការណ៍គាំទ្រពីអង្គការសហប្រជាជាតិ ដែលបាន ចេញកាលពីថ្ងៃព្រហស្បតិ៍សប្ដាហ៍កន្លងទៅឲ្យដឹងថា ការវិនិយោគពិភពលោកលើថាមពលបៃតងបានធ្លាក់ចុះជិត១ភាគ៣ ក្នុងឆ្នាំ២០១៦ ខណៈតម្លៃ និងការចំណាយធ្លាក់ចុះក្នុងទីផ្សារមួយចំនួន ។
កម្មវិធីបរិស្ថានអង្គការសហប្រជាជាតិឲ្យដឹងថា ការវិនិយោគសរុបស្មើនឹង២៤១,៦ប៊ីលានដុល្លារកាលពីឆ្នាំមុន ឬតិចជាងឆ្នាំ២០១៥ ដែលស្មើនឹង៣១២,២ប៊ីលានដុល្លារ ។
ប៉ុន្តែលទ្ធផលដែលវិនិយោគិនទទួលបាន គឺច្រើនជាងប្រាក់ដែលពួកគេវិនិយោគ។ សមត្ថភាពផលិតថាមពលបៃតងបានកើនឡើង ១៣៨.៥ជីហ្គាវ៉ាត់ ឬកើន៨% ពី១២៧.៥ជីហ្គាវ៉ាត់ ដែលបានបន្ថែមក្នុងឆ្នាំ២០១៥ ។
នេះគឺមកពីការដាក់ប្រព័ន្ធសូឡា វាយោអគ្គិសនី និងប្រព័ន្ធដទៃទៀតសម្រាប់ផលិតថាមពលបៃតង ត្រូវចំណាយតិចជាងមុន ។ ប្រទេសចិនបានវិនិយោគប្រាក់៧៨,៣ប៊ីលានដុល្លារ តិចជាងឆ្នាំ២០១៥ គឺ១ភាគ៣ ។
ការវិនិយោគរបស់សហរដ្ឋអាមេរិកបានធ្លាក់ចុះ១០% មកត្រឹម៤៦,៤ប៊ីលានដុល្លារផងដែរ។ ឯការវិនិយោគរបស់ប្រទេសជប៉ុនបានធ្លាក់ចុះច្រើនជាងពាក់កណ្តាលទៀត មកត្រឹម១៤,៤ប៊ីលានដុល្លារកាលពីឆ្នាំមុន ។
ការចំណាយលើថាមពលបៃតងនៅអឺរ៉ុបបានកើនឡើងបន្តិចមកត្រឹម៥៩,៨ប៊ីលានដុល្លារ ដែលជំរុញដោយគម្រោងថាមពលវាយោអគ្គិសនីធំៗនៅអង់គ្លេស និងអាល្លឺម៉ង់ ។
ប្រទេសឥណ្ឌាមើលឃើញការបញ្ចប់ការសាងសង់គម្រោងអគ្គិសនីសូឡាដ៏ធំក្នុងរដ្ឋ Tamil Nadu នាឆ្នាំ២០១៦ ។ វាគឺជាគម្រោងធំជាងគេរបស់ពិភពលោក ខណៈប្រទេសចិនបញ្ចប់ការពង្រីកគម្រោង Longyangxia Dam ក្នុងឆ្នាំនេះ ។
ប្រទេសជាច្រើនគិតថា ថាមពលបៃតងអាចកាត់បន្ថយការបញ្ចេញកាបូនឌីអុកស៊ីត ដែលជំរុញបម្រែបម្រួលបរិយាកាស ។
យោងតាមសេចក្តីរាយការណ៍ខាងលើឲ្យដឹងទៀតថា ការវិនិយោគលើថាមពលដែលទាញចេញពីធនធានក្នុងដី គឺស្មើតែពាក់កណ្តាលនៃការវិនិយោគលើថាមពលបៃតងប៉ុណ្ណោះកាលពីឆ្នាំមុន ។
អគ្គិសនីទាញចេញពីប្រភពបៃតង ដោយមិនរួមផ្សំទាំងវាយោអគ្គិសនីធំៗ បានកើនពី១០,៣%ទៅ១១,៣% ក្នុងឆ្នាំ២០១៦ផងដែរ ៕
ចែករំលែកព័តមាននេះ