បន្ទាប់ពីការស្ទង់មតិ និងសម្រេចចិត្តថា ចូលចិត្តផ្ទះណាហើយ តិចនិកមួយទៀតដែលអ្នកទិញគ្រប់រូបគួរមានជាប់ខ្លួន គឺ «ការចរចាតម្លៃ» ។ ពិតណាស់ អ្នកណាៗក៏ចង់ទិញផ្ទះដែលត្រូវចិត្តក្នុងតម្លៃថោក ឬបើការត្រៀមប្រាក់ទុកហើយ ប៉ុន្តែផ្ទះដែលចង់បានបែរជាមានតម្លៃខ្ពស់លើសទឹកប្រាក់បន្តិច យើងអាចប្រើប្រាស់តិចនិកទាំងនេះសម្រាប់ចរចាតម្លៃឲ្យធ្លាក់ចុះក្នុងកម្រិតពេញចិត្តបាន ។
អ្នកទើបទិញផ្ទះថ្មីទាំងឡាយ យើងមករៀនពីការចរចាតម្លៃសិន មុននឹងយកទៅអនុវត្ត ។
១-ដឹងច្រើន កាន់តែមានប្រៀប ៖
កាន់តែដឹងពីតម្លៃលក់ក្នុងតំបន់នោះច្រើន យើងអាចប៉ាន់ស្មានថា ផ្ទះដែលចាប់អារម្មណ៍មានតម្លៃខ្ពស់ជាង ឬទាបជាងតម្លៃទីផ្សារ ដោយប្រើប្រាស់ទិន្នន័យនោះសម្រាប់ចរចា ព្រោះបើយកតួលេខមកនិយាយ អ្នកណាក៏មិនព្រមដែរ ប៉ុន្តែបើចរចាដោយកយកផ្ទះផ្សេងទៀតមកប្រៀបធៀប នឹងធ្វើឲ្យមើលទៅអាចជឿទុកចិត្តច្រើនជាង ។
២-ជួសជុលច្រើន ចរចាច្រើន ៖
សាកល្បងមើលថា ផ្ទះនឹងទិញមានចំណុចណាត្រូវជួសជុលខ្លះ បើអាចទៅរួច គួរប៉ាន់ស្មានត្រួសៗថា បើអ្នកទិញទៅហើយ ដោយត្រូវជួសជុលជាក់ស្តែង តើនឹងចំណាយលើការជួសជុលប៉ុន្មាន ហើយយកចំនួននោះមកចរចាបញ្ចុះតម្លៃ ។
៣-កុំបង្ហាញចេញថា «ចង់បាន» ៖
ប្រសិនបើកំពុងបញ្ចុះបញ្ចូលអ្នកលក់ឲ្យចុះថ្លៃ កុំបង្ហាញចេញឲ្យឃើញថា យើងចង់បានខ្លាំង ព្រោះវានឹងធ្វើឲ្យអំណាចនៃការចរចារបស់យើងថយចុះភ្លាមៗ ។
៤-អ្នកណា គឺជាអ្នកលក់ ៖
នៅពេលទាក់ទងជាមួយអ្នកប្រកាសហើយ គួរតែសួរថា ជាឈ្មួញកណ្តាល ឬម្ចាស់លំនៅឋាន ? ព្រោះអំណាចក្នុងការសម្រេចចិត្តមិនដូចគ្នាទេ ប្រសិនបើឈ្មួញកណ្តាល នឹងតថ្លៃលំបាកជាងម្ចាស់លំនៅឋាន និងគ្មានអំណាចសម្រេចចិត្ត ប៉ុន្តែបើជាម្ចាស់លំនៅឋានវិញ នឹងធ្វើឲ្យការជជែកគ្នាងាយជាង ។
៥-សួរហេតុផលក្នុងការលក់ ៖
ម្ចាស់ផ្ទះម្នាក់ៗតែងមានហេតុផលក្នុងការលក់ខុសៗគ្នា យើងអាចសួរដល់ហេតុផលដែលចង់លក់ និងមើលថា គាត់ប្រញាប់លក់ឬទេ? ដូចជា ប្រញាប់លក់ព្រោះត្រូវទៅស្រុកក្រៅ បែបនេះយើងអាចតថ្លៃបានច្រើនជាងម្ចាស់ផ្ទះដែលមិនប្រញាប់លក់ ។
៦-តថ្លៃទាបជាងតម្លៃចង់បាន ៖
នៅពេលប្រាប់ពីតម្លៃចង់បានក្នុងគ្រាដំបូង គួរប្រាប់តួលេខដែលទាបជាងតម្លៃយើងកំណត់ ព្រោះដើម្បីឲ្យអ្នកលក់ទទួលយកនូវតម្លៃប្រហាក់ប្រហែលនឹងចំនួនដែលយើងត្រូវការ ។
៧-ស្គាល់អ្នកលក់ ស្គាល់ខ្លួនឯង ៖
រកទិន្នន័យពីផ្ទះនេះ ដែលនឹងជួយឲ្យយើងស្គាល់ខ្លួនឯងថា អាចចរចាបានច្រើនតិចប៉ុនណា។ ទិន្នន័យគោលៗដែលគួរដឹងដូចជា ផ្ទះនេះប្រកាសលក់មកយូរហើយឬនៅ ? បើសិនជាប្រកាសលក់យូរឆ្នាំហើយ ម្ចាស់ផ្ទះក៏គង់ចង់លក់យ៉ាងពេញទំហឹង និងពួកគេទិញមកក្នុងតម្លៃប៉ុន្មាន ? ព័ត៌មាននេះត្រូវព្យាយាមរកច្រើនតិច សំដៅលើព័ត៌មានប្រកាសលក់ពីអតីតកាល តាំងពីពេលម្ចាស់ផ្ទះទិញមក វានឹងជួយឲ្យដឹងថា គាត់បូកប្រាក់ចំណេញប៉ុន្មាន ហើយទីតាំងនេះមានអត្រាកើនឡើងប៉ុន្មានភាគរយ ។
ក្រៅពីនេះ ការចរចាតម្លៃមិនបានធ្វើត្រឹមតែផ្ទះចាស់ប៉ុណ្ណោះទេ ជាមួយគម្រោងថ្មី អ្នកក៏អាចធ្វើបានដូចគ្នា ដោយជជែកជាមួយខាងគម្រោងពីតម្លៃដែលចង់បាន ព្រោះគម្រោងទាំងនេះតែងមានប្រូម៉ូសិនផ្ទាល់ខ្លួន ។ បើសិនជាលើសពីនោះ ការសម្រេចចិត្តនឹងអាស្រ័យលើអ្នកគ្រប់គ្រងផ្នែកលក់ (Sale Manager) ។
វិធីសាស្ត្រមួយទៀតសម្រាប់ការតថ្លៃក្នុងគម្រោងថ្មី បើគម្រោងនោះមានប្រូម៉ូសិនជាសម្ភារថែមដូចជា គ្រឿងសង្ហារិម ឧបករណ៍អគ្គិសនី ប៉ុន្តែការពិត យើងមិនត្រូវការសម្ភារទាំងនេះប៉ុន្មានទេ ព្រោះមានខ្លួនឯងរួចហើយ គឺអាចសុំប្តូរការបញ្ចុះតម្លៃជាប្រាក់សុទ្ធច្រើនជាងបាន (ជាទូទៅ គម្រោងទាំងនេះទិញគ្រឿងសង្ហារិមមកក្នុងតម្លៃថោកជាង បើប្តូរជាប្រាក់សុទ្ធ គឺអាចសុំប្រាក់សុទ្ធក្នុងតម្លៃខ្ពស់ជាងបាន) ។
មិនថានឹងតថ្លៃប៉ុន្មានក្តី រឿងមួយដែលមិនគួរធ្វើជាដាច់ខាត គឺតថ្លៃទាបជ្រុលពេករហូតគួរឲ្យស្អប់ ។ កុំភ្លេចថា ម្ចាស់ផ្ទះក៏ចង់លក់ក្នុងតម្លៃល្អដើម្បីឲ្យបានប្រាក់ចំណេញ ចំណែកអ្នកទិញក៏ចង់ទិញក្នុងតម្លៃថោក ។ ផ្លូវដ៏ល្អ គួរតែនៅចំណុចកណ្តាលសម្រាប់ការពេញចិត្តទាំងសងខាង ៕
ចែករំលែកព័តមាននេះ