«កតញ្ញូរាត្រី» ធ្វើឱ្យសិល្បករជើងចាស់ស្រក់ទឹកភ្នែក
រាជធានីភ្នំពេញ ៖ កម្មវិធីដែលរៀបចំឡើងដោយសមាគមមិត្តសិល្បៈស្ម័គ្រចិត្តជួយសង្គមមានឈ្មោះថា «កតញ្ញូរាត្រី» បានរៀបចំធ្វើឡើងកាលពីរាត្រីថ្ងៃទី៦ មេសា ឆ្នាំ២០១៧ នៅ
រាជធានីភ្នំពេញ ៖ កម្មវិធីដែលរៀបចំឡើងដោយសមាគមមិត្តសិល្បៈស្ម័គ្រចិត្តជួយសង្គមមានឈ្មោះថា «កតញ្ញូរាត្រី» បានរៀបចំធ្វើឡើងកាលពីរាត្រីថ្ងៃទី៦ មេសា ឆ្នាំ២០១៧ នៅសណ្ឋាគារសុខាភ្នំពេញ ។ កម្មវិធីក្នុងន័យសម្តែងការដឹងគុណចំពោះសិល្បករជើងចាស់ ដែលបាត់បង់សមត្ថភាពសម្តែង ព្រោះមានជំងឺនិងភាពជរា ។
នារាត្រីនោះមានវត្តមានមន្ត្រី អ្នកជំនួញ ព្រមទាំងសិល្បករចាស់ថ្មីច្រើនកុះករ ។
លោកហ៊ុន ម៉ាណែត ដែលចូលរួមក្នុងកម្មវិធី«កតញ្ញូរាត្រី» បានថ្លែងថា «ពិតជាមានអត្ថន័យវិសេសវិលាសណាស់ ដែល សមាគមមិត្តសិល្បៈស្ម័គ្រចិត្តជួយសង្គមរៀបចំកម្មវិធីនេះឡើងក្នុងគោលបំណងស្វែងរកមូលនិធិសម្រាប់គាំពារជួយដល់សិល្បករចាស់ជរា ។ ជាពិសេសខ្ញុំពិតជាមានចិត្តសប្បាយរីករាយដែលបានជួបជាមួយសិល្បករជើងចាស់ក្នុងរាត្រីនេះ និងកោតសរសើរដល់សមាគមមួយនេះដែលរំលេចកម្មវិធីកតញ្ញូដ៏ល្អនេះឡើងជូនអ្នកសិល្បៈជើងចាស់ដែលនៅមានជីវិតធ្វើបុណ្យទាន់ខែភ្លឺ ។
សូមសម្តែងនូវទឹកចិត្តកតញ្ញូចំពោះដូនតាយើងដែលបានបង្កើត និងបន្សល់ទុកនូវមរតកសិល្បៈខ្មែរដ៏សម្បូរបែបសម្រាប់បម្រើឲ្យកូនខ្មែរគ្រប់រូប គ្រប់ពេលវេលាគ្រប់មនោសញ្ចេតនា»។
អ្នកនាងចន ច័ន្ទលក្ខិណា ប្រធានសមាគមមិត្តសិល្បៈជួយសង្គមលើកឡើងថា សមាគមបានបង្កើតឡើង និងទទួលស្គាល់ដោយក្រសួងមហាផ្ទៃនាថ្ងៃទី១៧ សីហា ឆ្នាំ២០១៦ ដែលធ្វើសកម្មភាពជាច្រើន ដូចជាការចែកមួកសុវត្ថិភាពជូនដល់ប្រជាពលរដ្ឋក្នុងរាជធានីភ្នំពេញ ដូចជានៅខណ្ឌជ្រោយចង្វា ខណ្ឌពោធិ៍សែនជ័យ និងមានផលិតវីដេអូឃ្លីបអប់រំដូចជា ការពង្រឹង និងការអនុវត្តច្បាប់ចរាចរណ៍ ក្នុងន័យកាត់បន្ថយគ្រោះថ្នាក់ចរាចរណ៍ ។ សមាគមយើងក៏បានជួយសម្រាលទុក្ខមួយចំនួនតូចរបស់សិល្បករសិល្បការិនីចាស់ជរា ក្រីក្រ មានដូចជាលោកតាផ្លុង មឿក, លោកតាប៉ិគក់, នាយគ្រៀវ, លោកនូ ស៊ិប និងភរិយារបស់តារាចម្រៀងរិន សាវ៉េតជាដើម ។ ក្រៅពីនេះមានរៀបចំជាបណ្ណាល័យ តូចៗសម្រាប់ សិស្សក្នុងខេត្តព្រៃវែង និងនៅសង្កាត់កោះដាច់ខណ្ឌជ្រោយចង្វា ។ រៀបចំបាយសាមគ្គីជាមួយកីឡាករបាល់ទាត់ កីឡាករប្រដាល់ ដើម្បីបង្កើតមិត្តភាពជាមួយសិល្បករ ។
សមាគមក៏បានជួយជាមេធាវីដល់សិល្បការិនីមួយចំនួនក្នុងកិច្ចការពារតាមផ្លូវតុលាការ ។
អ្នកនាងយុគ ចិន្តា បានសម្តែងក្តីសប្បាយរីករាយដែលសមាគម រៀបចំកម្មវិធីនេះដើម្បីតបស្នងសងគុណដល់សិល្បករជើងចាស់ ។ កម្មវិធីនេះធ្វើឲ្យវីរសិល្បករជាច្រើន រំជួលចិត្តស្ទើរតែស្រក់ទឹកភ្នែក ដ្បិតឃើញសិល្បករ រួបរួមគ្នាជួយដល់ពួកគាត់ ។
លោកព្រហ្ម ម៉ាញ ថ្លែងថា «ខ្ញុំសូមថ្លែងអំណរគុណចំពោះសមាគមរបស់អ្នកនាងចន ច័ន្ទលក្ខិណា និងរាជរដ្ឋាភិបាលដែលគិតគូរជួយដល់សិល្បករយើងទាំងចាស់និងថ្មី រហូតមកមិនធ្វើឲ្យអ្នកសិល្បៈនៅកម្សត់ ភ័យព្រួយនោះឡើយ ។
សូមឲ្យប្អូនៗជំនាន់នេះ ឬតទៅមុខទៀតចេះស្រឡាញ់គ្នា រួបរួមគ្នាលើកស្ទួយសិល្បៈ និងដឹងគុណដល់រៀមច្បង គោរពរៀមច្បង នេះជាគុណធម៌មួយមានតម្លៃណាស់» ។
តារាកំប្លែងនាយក្រឹម លើកឡើងថា «នេះជាការជួយដល់អ្នកសិល្បៈជើងចាស់ដែលគាត់ភ្លេចភ្លាំង ឬធ្វើការលែងបាន មានតែពឹងលើអ្នកមានកម្លាំង ហើយរូបភាពទាំងនេះពិតជាបានជួយឲ្យពួកគាត់រំភើប ។ ជាក់ស្តែងអ្នកមកទទួល ពិសេសតារាជើងចាស់គាត់ស្ទើរតែមិនគិតសោះថា មានឱកាសដល់រូបពួកគាត់នៅពេលអាយុច្រើននេះ ពិតជាកម្មវិធីមួយដ៏ល្អមិនចោលរៀមច្បងដែលចាស់ជរា » ៕
ចែករំលែកព័តមាននេះ