ការសាងសង់រោងការ រោងបុណ្យ និងរោងពិធីនៅតាមដងផ្លូវ មិនគោរពតាមការណែនាំ
រាជធានីភ្នំពេញ ៖ ជាទូទៅគេសង្កេតឃើញថា បងប្អូនប្រជាពលរដ្ឋយើងដែលរស់នៅក្នុងរាជធានីភ្នំពេញ ភាគច្រើនរាល់ពេលមានពិធីរៀបមង្គលការ ពិធីបុណ្យ
រាជធានីភ្នំពេញ ៖ ជាទូទៅគេសង្កេតឃើញថា បងប្អូនប្រជាពលរដ្ឋយើងដែលរស់នៅក្នុងរាជធានីភ្នំពេញ ភាគច្រើនរាល់ពេលមានពិធីរៀបមង្គលការ ពិធីបុណ្យ ខួបកំណើត ពិធីឡើងផ្ទះ។ល។ តែងតែធ្វើរោងនៅលើផ្លូវ ឬក៏ធ្វើឡើងដោយបិទផ្លូវទាំងស្រុងតែម្តងក៏មាន និងមិនបានគោរពទៅតាមការណែនាំរបស់អាជ្ញាធរមូលដ្ឋានឡើយ ។
លោកកែវ សារុន អធិការរងនគរបាលខណ្ឌចំការមន ថ្លែងថា រាល់ការធ្វើរោងមង្គលការ រោងបុណ្យ ឬពិធីផ្សេងៗនៅក្នុងមូលដ្ឋានរបស់លោក គឺលោកតែងតែធ្វើការណែនាំទៅដល់ម្ចាស់កម្មវិធីទាំងនោះ ឱ្យធ្វើទៅតាមច្បាប់ដើម្បីបញ្ចៀសការប៉ះពាល់ដល់សណ្តាប់ធ្នាប់សាធារណៈ ឬស្ទះចរាចរណ៍ជាដើម ។ លោកតម្រូវឱ្យធ្វើត្រឹមតែ១ភាគ៣នៃផ្លូវតែប៉ុណ្ណោះ និងទុក២ភាគនៃផ្លូវសម្រាប់ឱ្យអ្នកធ្វើដំណើរឆ្លងកាត់ ។
លោកអធិការរងបញ្ជាក់ថា ប្រសិនបើមានអ្នកណាធ្វើរំលោភទៅលើទ្រូងផ្លូវ ឬបិទផ្លូវទាំងស្រុងនោះ គឺធ្វើនោះខុសច្បាប់ហើយ ។ លោកបន្តថា រាល់ការសុំច្បាប់សម្រាប់បងប្អូនប្រជាពលរដ្ឋ ជាទូទៅនៅក្នុងភូមិសាស្ត្រខណ្ឌចំការមនគឺធ្វើឡើងដោយមានការសុំអនុញ្ញាតត្រឹមត្រូវ ពោលគឺចាប់ផ្តើមពីប៉ុស្តិ៍នគរបាលមូលដ្ឋានសង្កាត់ និងអធិការដ្ឋាននគរបាលខណ្ឌ។ ការសុំច្បាប់អនុញ្ញាតសាងសង់រោងនេះដែរ គឺដើម្បីឱ្យកម្លាំងអាជ្ញាធរមូលដ្ឋានគ្រប់លំដាប់ថ្នាក់ទាំងនោះ ទទួលខុសត្រូវរាល់បញ្ហាដែលកើតមានឡើង ដូចជាការស្ទះចរាចរណ៍ជាដើម ដោយចុះទៅធ្វើចរាចរណ៍ ឬក៏ពង្វាងផ្លូវដល់អ្នកដែលធ្វើដំណើរតាមផ្លូវនោះផងដែរ ។
លោក កែវ សំណាង អភិបាលរងខណ្ឌចំការមន ថ្លែងថា ពាក់ព័ន្ធទៅនឹងការសាងសង់រោងមង្គលការ រោងបុណ្យ របស់បងប្អូនប្រជាពលរដ្ឋនៅក្នុងមូលដ្ឋាន គឺសុំត្រឹមតែនគរបាលប៉ុស្តិ៍ និងសង្កាត់ប៉ុណ្ណោះ មិនដែលមានអ្នកណាម្នាក់ឡើងមកសុំដល់សាលាខណ្ឌឡើយ។ ការសាងសង់រោងមង្គលការ រោងបុណ្យនេះដែរ បងប្អូនតែងតែធ្វើរំលោភទៅលើទ្រូងផ្លូវ ឬក៏បិទផ្លូវទាំងស្រុងតែម្តងក៏មាន ដោយមិនខ្លាចក្រែងប៉ះពាល់ដល់សណ្តាប់ធ្នាប់សាធារណៈ ឬកកស្ទះចរាចរណ៍ឡើយ សូម្បីតែរូបលោកក៏ធ្លាប់ធ្វើដំណើរជាប់ម្តងម្កាលដែរ ។
លោកអភិបាលរងខណ្ឌបន្តទៀតថា ពាក់ព័ន្ធទៅនឹងច្បាប់សាងសង់រោងមង្គលការ រោងបុណ្យ ឬពិធីផ្សេងៗនេះដែរ លោកនឹងលើកយកទៅប្រជុំពិភាក្សាជាមួយនឹងអាជ្ញាធរមូលដ្ឋានគ្រប់លំដាប់ថ្នាក់ម្តង ដើម្បីចៀសវាងកុំឱ្យមានការប៉ះពាល់ដល់សណ្តាប់ធ្នាប់សាធារណៈ បង្កឱ្យមានការស្ទះចរាចរណ៍លើដងផ្លូវ ។
ថ្វីបើមានការណែនាំអំពីច្បាប់សាងសង់រោងមង្គលការ រោងបុណ្យ ឬពិធីផ្សេងៗដល់បងប្អូនប្រជាពលរដ្ឋពីសំណាក់អាជ្ញាធរមូលដ្ឋានឱ្យធ្វើឡើងត្រឹមត្រូវទៅតាមច្បាប់ក៏ដោយ ក៏គេសង្កេតឃើញថា ការសាងសង់រោងមង្គលការ រោងបុណ្យ ឬពិធីផ្សេងៗ គឺធ្វើឡើងដោយមិនគោរពច្បាប់ឡើយ និងប៉ះពាល់ទៅដល់សណ្តាប់ធ្នាប់សាធារណៈ ជាពិសេសការកកស្ទះចរាចរណ៍ ឬធ្វើឱ្យមានការរំខានយ៉ាងខ្លាំងទៅដល់អ្នកធ្វើដំណើរតាមដងផ្លូវ ៕
ចែករំលែកព័តមាននេះ