ខេត្តបន្ទាយមានជ័យ ៖ ករណីផ្ទុះអាវុធវែង-ខ្លីមួយ បង្កការភ្ញាក់ផ្អើលដល់អ្នកដំណើរតាមផ្លូវជាតិ និងអ្នកភូមិយ៉ាងខ្លាំង បន្ទាប់ពីក្មេងទំនើង២ក្រុម ផ្ទុះជម្លោះដោយសារស្រីរបស់ខ្លួន ទើបដេញវាយនិងកាប់រហូតឈានដល់ការបាញ់បោះ បណ្តាលឱ្យរបួស២នាក់ ។
ហេតុការណ៍នេះ កើតឡើងកាលពីវេលាម៉ោងជិត៧យប់ថ្ងៃទី០៧ មេសា ស្ថិតនៅផ្លូវជាតិលេខ៥ ត្រង់ចំណុចផ្លូវបត់ចូលទៅវត្តដុងអារញ្ញ ក្នុងភូមិនិមិត្ត១ សង្កាត់និមិត្ត ក្រុងប៉ោយប៉ែត ។
ប្រភពឱ្យដឹងថា ជនរងគ្រោះទាំង២នាក់ ១-ឈ្មោះពៅ ជឹម ភេទប្រុស អាយុ២៣ឆ្នាំ (របួសសាច់ដុំដៃស្តាំបៀមគ្រាប់) និង២-ឈ្មោះនាង ជីវ័ន្ត ភេទប្រុស អាយុ២៦ឆ្នាំ គេកាប់ចំសាច់ដុំដៃខាងឆ្វេង(របួសស្រាល) ពួកគេទាំង2 រស់នៅលំនៅក្នុងភូមិកើតហេតុ ។
បើតាមជនរងគ្រោះទី២បាននិយាយថា មុនឈានដល់ផ្ទុះជម្លោះបាញ់បោះ ខ្លួនបានចាក់ចង្កេះប្អូនស្រីធម៌ឈ្មោះមុំ អាយុ២១ឆ្នាំ មានទីលំនៅភូមិនិមិត្ត៤ ខណៈឈរមើលការប្រកួតបាល់ទាត់មិត្តភាពមួយនៅវិទ្យាល័យនិមិត្ត ក្នុងភូមិនិមិត្តថ្មី សង្កាត់និមិត្ត ស្រាប់តែឈ្មោះម៉េត អាយុជាង២០ឆ្នាំ រករឿងថា «ម៉េចឱបចង្កេះសង្សាអញ» ។
ជនរងគ្រោះបន្តថា ខ្លួនបានព្យាយាមនិយាយល្អតបថា មិនបានឱបចង្កេះទេ គឺគ្រាន់តែចាក់ចង្កេះលេង ហើយប្រាប់ថា នាងជាប្អូនធម៌ ទើបលេងជាមួយ ស្រាប់តែផ្ទុះជម្លោះរកវាយគ្នា តែត្រូវអ្នកនៅទីនោះឃាត់ទាន់ ។ ពេលខ្លួននិងប្អូនប្រុសបង្កើត រួមទាំងមិត្តភក្តិទី១ និងមិត្តភក្តិម្នាក់ទៀត (សរុប៤នាក់) ជិះម៉ូតូ២គ្រឿង តាមផ្លូវជាតិចេញពីកន្លែងប្រកួតបាល់ទាត់ទៅទិសខាងកើតបានប្រហែល700ម៉ែត្រ ស្រាប់តែឈ្មោះម៉េត និងបក្សពួកជាង២០នាក់ ប្រើប្រាស់អាវុធខ្លីច្នៃ៤ដើម ស្ទាក់បាញ់ពួកខ្លួន ។ តែដោយឃើញទាន់ ក៏នាំគ្នាបើកម៉ូតូត្រឡប់ក្រោយ ទៅទិសខាងលិចវិញ ។
ជនរងគ្រោះបន្តថា លុះក្រោយសភាពស្ងប់ស្ងាត់ ក៏នាំគ្នាជិះម៉ូតូទៅទិសខាងកើតវិញ ប្រុងត្រឡប់ទៅផ្ទះ ស្រាប់តែក្រុមបង្កដដែលឈរចាំស្ទាក់ម្តងទៀត នៅមុខផ្លូវបត់ចូលវត្តដុងអារញ្ញ ដោយដំបូងពួកគេប្រើប្រាស់ដុំថ្មគប់ ។ ពេលទ្រាំមិនបាន ពួកខ្លួនក៏ចុះពីម៉ូតូរើសដុំថ្មគប់វិញ និងវាយគ្នារហូតក្រុមបង្កប្រើប្រាស់ កាំបិតច្រូងច្រាងដេញកាប់ ។
មិនតែប៉ុណ្ណោះ ក្រុមបង្មានអាវុធខ្លីច្នៃ និងអាវុធអាការកាត់កាណុងដេញបាញ់ជាច្រើនគ្រាប់ បណ្តាលឲ្យឈ្មោះពៅ ជឹម រងរបួសដៃ និងខ្លួនត្រូវគេកាប់ចំដៃរបួសស្រាលតែម្តង។
លោកម៉ា រិន នាយប៉ុស្តិ៍រដ្ឋបាលនគរបាលសង្កាត់និមិត្តនិយាយថា ភាគីជម្លោះទាំង២ ជាក្រុមចូលរួមប្រកួតបាល់ទាត់ជុំគ្នា ហើយលោកថា បញ្ហាខាងលើកើតឡើង ដោយសាររឿងស្រី ។ លោកម៉ារិនបន្តថា កាំភ្លើងដែលជនបង្កបាញ់ចំជនរងគ្រោះបៀមគ្រាប់ជាគ្រាប់កាំភ្លើងច្នៃបាញ់គ្រាប់សំណរ ។ ក្នុងនោះ សមត្ថកិច្ចបានរកឃើញគ្រាប់ និងសំបកគ្រាប់កាំភ្លើងអាកាចំនួន១១គ្រាប់ (សំបក៩និងគ្រាប់២ ទំនងបាញ់មិនផ្ទុះ) បន្សល់នៅកន្លែងកើតហេតុ។
មិនទាន់ចាប់បានជនសង្ស័យណាម្នាក់នៅឡើយទេ គិតត្រឹមម៉ោង១រសៀលថ្ងៃទី០៨ មេសា ប៉ុន្តែសមត្ថកិច្ចកំពុងដុតដៃដុតជើងស្រាវជ្រាវរកមុខសញ្ញាហើយ ។
ចែករំលែកព័តមាននេះ