បា.ញ់សម្លា.ប់«អាតក»មិនអាចទប់ភាពសាហា.វរបស់វាបាន
ខេត្តមណ្ឌលគិរី ៖ ទីបំផុតហេតុការណ៍មិនគួរនឹងកើត បានកើតឡើងគួរឱ្យសោកស្តាយ ខណៈសាធារណមតិបានផ្ទុះការរិះគន់យ៉ាងចាស់ដៃ
ខេត្តមណ្ឌលគិរី ៖ ទីបំផុតហេតុការណ៍មិនគួរនឹងកើត បានកើតឡើងគួរឱ្យសោកស្តាយ ខណៈសាធារណមតិបានផ្ទុះការរិះគន់យ៉ាងចាស់ដៃ
ខេត្តមណ្ឌលគិរី ៖ ទីបំផុតហេតុការណ៍មិនគួរនឹងកើត បានកើតឡើងគួរឱ្យសោកស្តាយ ខណៈសាធារណមតិបានផ្ទុះការរិះគន់យ៉ាងចាស់ដៃ ចំពោះអវត្តមានមន្ត្រីជំនាញពីសួនសត្វភ្នំតាម៉ៅ ដែលពលរដ្ឋបានផ្ញើក្តីសង្ឃឹមលើការព្យាបាលដំរីចុះប្រេង ដែលកំពុងស្ថិតក្នុងស្ថានភាពកាចសាហាវឱ្យវិលទៅរកភាពប្រក្រតីវិញ ដើម្បីវាអាចបន្តសកម្មភាពបម្រើដល់វិស័យទេសចរណ៍ដូចសង្ឃឹមផ្កាយលើមេឃ ។ ការអវត្តមានរបស់ក្រុមមន្ត្រីជំនាញបាញ់ថ្នាំសណ្តំ បានធ្វើឱ្យជីវិតដំរីឈ្មោះអាតកបានងាប់ ដោយការបាញ់ប្រហាររារាំង ការបង្កមហន្តរាយដល់ទ្រព្យសម្បត្តិ និងអាយុជីវិតអ្នកភូមិ ។
ទោះបីជាបែបណា អារម្មណ៍សោកស្តាយនិងការភ័យខ្លាចរបស់អ្នកភូមិបានលាយឡំគ្នាអស់រយៈពេលពីរយប់បីថ្ងៃ ក្រោយពេលអាជ្ញាធរខេត្តមណ្ឌលគិរី កាលពីវេលាទៀបភ្លឺឈានចូលថ្ងៃទី៧ មេសា បានសម្រេចចិត្តឱ្យសមត្ថកិច្ចបាញ់សម្លាប់ដំរីឈ្មោល វ័យ៧០ឆ្នាំចុះប្រេងឈ្មោះអាតកដែលបានសម្លាប់ម្ចាស់វា កាលពីថ្ងៃទី៥ មេសា ព្រោះតែមិនអាចគ្រប់គ្រងលើវាបាន និងមិនអាចបន្តការរង់ចាំអន្តរាគមន៍ខ្យល់ ពីអ្នកជំនាញទៅពីសួនសត្វភ្នំតាម៉ៅ ។
មុនពេលសម្រេចបាញ់សម្លាប់ ផ្ទះអ្នកភូមិចំនួន៦ខ្នង ត្រូវបានដំរីមួយក្បាលនោះកម្ទេចអស់ជាច្រើនផ្នែក រងការខូចខាត និងធ្វើឱ្យសុវត្ថិភាពរបស់អ្នកភូមិស្ថិតក្នុងសភាពគ្រោះថ្នាក់ជាខ្លាំងនាំកូនចៅរត់គេចចោលភូមិឋាន ។
តាមប្រភពព័ត៌មានថា នៅវេលាម៉ោង១២និង៣០នាទីយប់ ថ្ងៃទី៦ឈានចូលថ្ងៃទី៧ មេសា អាជ្ញាធរខេត្តដែលមានលោក ស្វាយ សំអ៊ាង អភិបាលខេត្ត បានដឹកនាំកម្លាំងផ្ទាល់ ជម្លៀសប្រជាជនទៅជ្រកនៅសាលាបឋមសិក្សាមួយកន្លែង ក្នុងភូមិដែលសង់ពីថ្ម ដើម្បីរក្សាសុវត្ថិភាពកុំឱ្យដំរីចុះប្រេងនោះយាយីដល់អាយុជីវិត ។
សេចក្តីរាយការណ៍ថា ភ្លាមៗនោះនៅកន្លែងកើតហេតុនាម៉ោង១យប់ចូលថ្ងៃទី៧ មេសា កម្លាំងប្រដាប់អាវុធមាននគរបាល នៃស្នងការដ្ឋាន នគរបាលខេត្ត និងកងរាជអាវុធហត្ថខេត្តមណ្ឌលគិរីរួមទាំងអាជ្ញាធរមូលដ្ឋានសហការជាមួយមន្ទីរបរិស្ថានខេត្ត និងប្រជាពលរដ្ឋ បានចាត់វិធានការទប់ស្កាត់សកម្មភាព អាតកដំរីចុះប្រេង ដែលបានចូលអុកឡុកផ្ទះអ្នកភូមិជនជាតិដើមភាគតិច ដោយការប្រើកាំជ្រួញបាញ់ឡើងលើនិងដុតភ្នក់ភ្លើង ដើម្បីបញ្ឆោត និងបង្ការកុំឱ្យវាចូលនៅក្នុងភូមិវិញ ។
ជាវិធានការបន្ទាន់ ដើម្បីទប់ស្កាត់សកម្មភាពដំរីឈ្មោលដែលចុះប្រេងនោះ អាជ្ញាធរបានប្រើប្រាស់រថយន្តពន្លត់អគ្គិភ័យរបស់ស្នងការដ្ឋាននគរបាលខេត្តមណ្ឌលគិរី ចំនួន២គ្រឿងបើកចូលទៅស្វែងរកអាតកដើម្បីបញ្ឆោត និងបង្អាក់សកម្មភាពអុកឡុកផ្ទះប្រជាពលរដ្ឋ ព្រមជាមួយនឹងការរង់ចាំយ៉ាងអន្ទះសារពីក្រុមមន្ត្រីជំនាញពីភ្នំតាម៉ៅទៅបាញ់ថ្នាំសណ្ដំ ។ ប៉ុន្តែការចូលទៅរុករកមិនបានប៉ុន្មាននាទីផង ក៏ត្រូវអាតកចេញពីក្នុងព្រៃរត់សំដៅទៅបុក ដោយប្រើភ្លុកបំបុករថយន្តពន្លត់អគ្គិភ័យពីខាងក្រោយបណ្ដាលឱ្យរងការខូចខាតដោយអន្លើរ ។ ភ្លាមនោះសមត្ថកិច្ចបានផ្ទុះអាវុធឡើងលើជាច្រើនគ្រាប់ ទើបដំរីនោះរត់ចូលទៅក្នុងព្រៃវិញ ។
ខណៈអាតករត់ចូលទៅក្នុងព្រៃបាត់ អាជ្ញាធរបានជម្លៀសប្រជាពលរដ្ឋចេញពីផ្ទះទៅទីធ្លាសាលារៀន ដែលមានសុវត្ថិភាពនិងមានការយាមកាមពីកម្លាំងកងរាជអាវុធហត្ថខេត្ត ។ មួយសន្ទុះក្រោយមក នៅវេលាម៉ោង១២និង៣០នាទី រំលងអធ្រាត្រ អាតកដំរីឈ្មោលចុះប្រេងរួមជាមួយនឹងដំរីញី១ក្បាលនេះ បានចេញពីក្នុងព្រៃវិញ ក៏ត្រូវកម្លាំងនគរបាលបាញ់សំដៅជើងខាងមុខទាំង២ បណ្ដាលឱ្យរងរបួសដើរទៅមុខលែងរួច ក៏នៅសម្ងំមុខផ្ទះប្រជាពលរដ្ឋតែម្ដង ។
ទោះជាបែបនេះក្តី ភាពកម្រោលរបស់ដំរីឈ្មោលចុះប្រេង ហាក់មិនបានថមថយឡើយ ពោលគឺកាន់តែមានកំហឹងលើមនុស្ស និងរឹតតែបង្កើនការប្រឈមរវាងដំរី និងមនុស្ស ទើបកម្លាំងសមត្ថកិច្ចសម្រេច បាញ់ថែមមួយគ្រាប់ទៀតចំក្បាលបណ្តាលឱ្យអាតកងាប់នៅវេលាម៉ោង២ទៀបភ្លឺតែម្តង ។
លោក ស្វាយ សំអ៊ាង អភិបាលខេត្តបានឱ្យដឹងថា លោកពិតជាមានការសោកស្តាយជាពន់ពេក ចំពោះការបាត់បង់សត្វកម្រ និងជាសត្វដែលបានចូលរួម ជួយបម្រើដល់វិស័យទេសចរណ៍ របស់យើងដែលបានបង្កើននូវចំណូលប្រចាំថ្ងៃដល់ប្រជាពលរដ្ឋក្នុងតំបន់ ។ យ៉ាងណាក៏ដោយលោកអភិបាលខេត្ត បានអាក់អន់ចិត្តដោយស្តីបន្ទោសពីភាពយឺតយ៉ាវរបស់មន្ត្រីជំនាញ ដែលបានអូសបន្លាយពេលវេលារហូតដល់ពីរថ្ងៃ ដោយមិនព្រមមានចំណាត់ការសមស្របណាមួយ ដែលអាចបញ្ចៀសពីការសម្លាប់សត្វដំរីមួយក្បាលនោះ ។
ចំណែកលោក កែវ សុភ័ក ប្រធានមន្ទីរបរិស្ថានខេត្តមណ្ឌលគិរី ដែលទើបឡើងកាន់តំណែងថ្មី បានឱ្យដឹងថា ខាងមន្ទីររបស់លោកបានទំនាក់ទំនងស្នើទៅមន្ត្រីជាច្រើនជំនាញ តាំងពីថ្ងៃកើតហេតុ ប៉ុន្តែលោកក៏មិនបានដឹងច្បាស់ពីភាពយឺតយ៉ាវនៃដំណើរការចុះទៅជួយសង្គ្រោះដំរីចុះប្រេងនោះទេ ។
អធិការនគរបាលក្រុងសែនមនោរម្យលោក កាន់ ពេញ បានឱ្យដឹងថា អាជ្ញាធរខេត្តនិង ប្រជាពលរដ្ឋក្នុងភូមិក៏ដូចជាម្ចាស់ដំរីផ្ទាល់ បានសម្រេចចិត្តព្រមគ្នាថា ត្រូវតែបាញ់សម្លាប់ដំរីនេះ ព្រោះគ្មានជំរើសណា ដែលអាចទប់ទល់ និងកំហឹងរួមជាមួយភាពកាចសាហាវរបស់វា ដែលកំពុងតែចុះប្រេង ហើយធ្វើបាបប្រជាពលរដ្ឋ និងបំផ្លាញទ្រព្យសម្បត្តិអស់ជាច្រើននោះទេ ។ លោកថា ដំរីបានរងនូវគ្រាប់កាំភ្លើងចំនួន៣គ្រាប់ក្នុងនោះគឺជើង២គ្រាប់ និងចំក្បាល១គ្រាប់ ទើបបណ្តាលឱ្យងាប់តែម្តង ។
ចំណែកក្រុមមន្ត្រីជំនាញនៃឧទ្យានសួនសត្វ និងមជ្ឈមណ្ឌលសង្គ្រោះសត្វព្រៃភ្នំតាម៉ៅបាននិយាយឱ្យបណ្តាញព័ត៌មានដឹងថា ក្រុមលោកគ្រោងនឹងចុះទៅកាន់ខេត្តមណ្ឌលគិរី នៅព្រឹកថ្ងៃសុក្រនេះ ដើម្បីជួយអន្តរាគមន៍ក្នុងការបង្ក្រាបចាប់ដំរីឈ្មោលឈ្មោះ«អាតក»នោះ ។
លោក ញឹក រតនៈពេជ្រ ប្រធានឧទ្យានសួនសត្វ និងមជ្ឈមណ្ឌលសង្គ្រោះសត្វព្រៃភ្នំតាម៉ៅនិយាយថា លោកបានទទួលសារអេឡិចត្រូនិចមួយពីរដ្ឋបាលព្រៃឈើខេត្តមណ្ឌលគិរី នៅព្រឹកថ្ងៃព្រហស្បតិ៍ ដែលស្នើសុំកិច្ចអន្តរាគមន៍បង្ក្រាបចាប់ដំរីឈ្មោលចុះប្រេងមួយក្បាលដែលកំពុងបង្កការភ័យខ្លាចដល់ពលរដ្ឋក្នុងភូមិពូតាំង សង្កាត់រមនា ក្រុងសែនមនោរម្យ បន្ទាប់ពីវាបានសម្លាប់បុរសម្នាក់ ដែលជាម្ចាស់របស់វាកាលពីព្រឹកថ្ងៃពុធ ។
លោកបានបញ្ជាក់ថា«នៅពេលនេះខ្ញុំបានចាត់ឱ្យមន្ត្រីជំនាញរបស់ខ្ញុំ រៀបចំសម្ភារនិងឧបករណ៍បច្ចេកទេសមួយចំនួន ដើម្បីចេញទៅជួយអន្តរាគមន៍ ចាប់ដំរីឈ្មោលមួយក្បាលនោះនៅព្រឹកថ្ងៃសុក្រនេះ» ។
លោក ពេជ្រ សុធារី នាយនគរបាលប៉ុស្តិ៍សង្កាត់រមនា បានថ្លែងថានៅក្នុងសង្កាត់រមនា មានដំរីស្រុកសរុប២៣ក្បាល ក្នុងនោះមានឈ្មោលចំនួន៥ក្បាលរួមទាំង«អាតក»ផងដែរ ។
ដំរីទាំងនោះ មានអាយុចន្លោះពី៤០ ទៅ៧០ ឆ្នាំ ។ ជាធម្មតាពួកវាជាសត្វស្លូត ហើយត្រូវបានម្ចាស់របស់វាប្រើប្រាស់ សម្រាប់ដឹកភ្ញៀវទេសចរដើរកម្សាន្តនៅតាមតំបន់ព្រៃធម្មជាតិនានា ដែលមាននៅក្នុងខេត្ត ។
ដោយឡែក នៅលើបណ្តាញសង្គមគេសង្កេតឃើញ មានការបង្ហោះចែករំលែកគ្នានិងការបញ្ចេញមតិជាច្រើន ជុំវិញបញ្ហាបាញ់សម្លាប់ដំរីខាងលើ ដោយក្នុងនោះគណនីហ្វេសប៊ុកដែលមានឈ្មោះ Sovannary Chea បានលើកឡើងថាវិធីសាស្ត្រម ានច្រើនណាស ស់ ដើម្បីទប់់ ស្កាត់ ់មួយបាញ់ ពីរបាញ់ ចាំអង្កាល់ទៀតវានឹងផុតពូជអស់ជាមិនខាន ។ អត់ចេះខ្មាស់អ្នកជិតខាងយើងផង គេអភិរក្សសត្វព្រៃគេ តាមវិធីណាខ្លះ ?
ចំណែកគណនីឈ្មោះAh Thea Mønster បានផ្សាយថា ដំរីចុះប្រេងមិនធម្មតាទេ ត្រឹមថ្នាំសណ្តំប្រហែលមិនអាចទប់ស្កាត់បាន នេះអាចជាជំរើសចុងក្រោយទើបសម្រេចធ្វើបែបនេះ ដើម្បីទប់ស្កាត់វិនាសកម្មធ្ងន់ធ្ងរជាងនេះ ។ ដំរីហៀបនឹងចុះប្រេង ហ្មដំរីគេយកទៅផ្លុងចោលក្នុងព្រៃទាល់តែវាលែងចុះប្រេងបានយកមកវិញ។ ប្រហែលគាត់ភ្លេចហើយមើលទៅ អាណិតណាស់ !
មហាជនលើកឡើងថា បើមន្ត្រីជំនាញអាចទៅដល់ខេត្តមណ្ឌលគិរីត្រឹមល្ងាចថ្ងៃទី៦ ម្ល៉េះដំរីមួយក្បាលនោះ មិនបាត់បង់ជីវិតដូច្នេះទេ ។
ទោះជាយ៉ាងណា ទំហំនៃការខូចខាតក្រោមសកម្មភាពបំផ្លាញរបស់ដំរីឈ្មោល«អាតក» សមត្ថកិច្ចនិងអាជ្ញាធរមូលដ្ឋានកំពុងធ្វើការបន្តជាមួយអ្នកភូមិដើម្បីស្វែងរកដំណោះស្រាយ ។ រីឯភ្លុកមួយកំណាត់ត្រូវបានម្ចាស់កាត់យក ៕
ចែករំលែកព័តមាននេះ