ដាក់ឱសានវាទ១ខែ ឱ្យអ្នករំលោ.ភស្ទឹងសង្កែ កាយដីចេញឱ្យដូចដើម
ខេត្តបាត់ដំបង ៖ ជុំវិញបញ្ហាសង់ផ្សារបាយដំរ៉ាំ ដែលអ្នកភូមិចោទថា លោកមេឃុំបាយដំរ៉ាំ និងលោកអភិបាលស្រុកបាណន់ជាអ្នកនៅពីក្រោយនៃ
ខេត្តបាត់ដំបង ៖ ជុំវិញបញ្ហាសង់ផ្សារបាយដំរ៉ាំ ដែលអ្នកភូមិចោទថា លោកមេឃុំបាយដំរ៉ាំ និងលោកអភិបាលស្រុកបាណន់ជាអ្នកនៅពីក្រោយនៃ
ខេត្តបាត់ដំបង ៖ ជុំវិញបញ្ហាសង់ផ្សារបាយដំរ៉ាំ ដែលអ្នកភូមិចោទថា លោកមេឃុំបាយដំរ៉ាំ និងលោកអភិបាលស្រុកបាណន់ជាអ្នកនៅពីក្រោយនៃការចាក់ដីលុបច្រាំងស្ទឹងសង្កែ ដើម្បីផ្ដល់សិទ្ធិឱ្យអ្នកមានលុយម្នាក់ សាងសង់ធ្វើផ្សារ និងស្ថានីយប្រេងនោះ ពេលនេះអាជ្ញាធរខេត្តសម្រេចចេញលិខិតបញ្ជាឱ្យអាជ្ញាធរឃុំនិងស្រុកដែលថ្លើមធំ ប្រាប់បន្តទៅម្ចាស់គម្រោងផ្សារនេះឱ្យកាយដី និងរុះរើសំណង់ចេញឱ្យអស់ពីដីមាត់ស្ទឹងវិញឱ្យបានឆាប់ ទុកស្ថានភាពដូចដើម ។ បទបញ្ជានេះដោយដាក់ឱសានវាទរយៈពេល១ខែ ដោយសារតែគម្រោងនេះធ្វើឡើងដោយគ្មានច្បាប់់ និងបង្កផលប៉ះពាល់ធ្ងន់ធ្ងរគ្រប់បែបយ៉ាង «កុំចេះតែហ៊ានប្រថុយពេក» ។
យោងលិខិតមួយច្បាប់របស់រដ្ឋបាលខេត្តបាត់ដំបង ដែលកោះសន្តិភាពទទួលបាន ចុះថ្ងៃទី៣០ មីនា ២០១៧ ដោយលោកជាម ច័ន្ទសោភ័ណ្ឌ អភិបាលរងខេត្តបាត់ដំបង ដែលខ្លឹមសារមានយោងលិខិតលេខ០៧៨ ចុះថ្ងៃទី២២ មីនា ២០១៧ របស់មន្ទីរធនធានទឹក និងឧតុនិយមខេត្តផង បានជម្រាបជូនលោកអភិបាលស្រុកបាណន់ ។
លោក ជាម ច័ន្ទសោភ័ណ្ឌ អភិបាលរងខេត្ត បានសរសេរជម្រាបជួនលោកអភិបាលស្រុកបាណន់ដូច្នេះថា៖ «រដ្ឋបាលខេត្ត អនុញ្ញាតឱ្យលោកអភិបាលស្រុក ចេញលិខិតជាផ្លូវការ ដាក់ឱសានវាទរយៈពេល១ខែ គិតចាប់ពីថ្ងៃទី១ មេសា ២០១៧ ដល់ថ្ងៃទី១ ឧសភា ២០១៧ យ៉ាងយូរត្រូវកាយដីចេញ និងរុះរើរោងដែកទាំងអស់ចោល ដោយតម្រូវឱ្យអុ្នកសាងសង់ជាអ្នកចាត់ចែង ឱ្យដូចសភាពដើមធម្មជាតិនៃច្រាំងស្ទឹងវិញ ក្រោមការត្រួតពិនិត្យពីមន្ត្រីជំនាញនៃមន្ទីរធនធានទឹកនិងឧតុនិយមខេត្ត និងមន្ទីរដែនដីនគរូបនីយកម្ម សំណង់ និងសុរិយោដីខេត្ត លើការកាយដីនេះ» ។
ជុំវិញលិខិតរបស់លោក ជាម ច័ន្ទសោភ័ណ្ឌ អភិបាលរងខេត្តខាងលើនេះ បើតាមលោកជុំ ញ៉ អភិបាលស្រុកបាណន់ បានបញ្ជាក់ប្រាប់តាមទូរស័ព្ទនៅព្រឹកថ្ងៃទី៥ មេសាថា លោកទើបទទួលបានលិខិតរបស់រដ្ឋបាលខេត្ត កាលពីថ្ងៃទី៤ មេសា ហើយលោកនឹងចេញលិខិតមួយឱ្យទៅលោកមេឃុំ ដើម្បីលោកមេឃុំបញ្ជូនផ្ទាល់ ដល់ដៃម្ចាស់ផ្សារឱ្យផ្អាកការសាងសង់តែម្ដង ។
សូមបញ្ជាក់ថា មេឃុំបាយដំរ៉ាំ លោកង៉ុង ឆាន់លី និងអភិបាលស្រុកបាណន់ លោកជុំ ញ៉ ត្រូវពលរដ្ឋចោទប្រកាន់ថាបានសមគំនិតគ្នាស៊ីញ៉េឯកភាព លើលិខិតស្នើសុំសាងសង់ផ្សារឱ្យទៅបុគ្គលម្នាក់ឈ្មោះ ច័ន្ទ សុភា ចាក់ដីលុបច្រាំងស្ទឹងសង្កែ នៅត្រង់ក្បាលស្ពានបេឡេត៍ត្រើយខាងកើត ខាងមុខវត្តបាយដំរ៉ាំស្ថិតក្នុងភូមិបាយដំរ៉ាំ ឃុំបាយដំរ៉ាំ ស្រុកបាណន់ដើម្បីបង្កើតផ្សារ និងស្ថានីយប្រេងឥន្ធនៈដោយគ្មានថ្នាក់ដឹកនាំខេត្ត ឬមន្ទីរជំនាញណាមួយដឹងឮឡើយ ។
សកម្មភាពចាក់ដីលុបច្រាំងស្ទឹងសង្កែដើម្បីធ្វើផ្សារនេះ បានចាប់ផ្ដើមតាំងពីដើមខែមករាកន្លងមកនេះ ដោយគ្មានមន្ត្រី ឬថ្នាក់ដឹកនាំខេត្តបានដឹងឡើយ តែក្រោយពីមានការផ្សព្វផ្សាយតាមសារព័ត៌មាននានា ទើបបែកធ្លាយនូវរឿងអាស្រូវពុករលួយរវាងអាជ្ញាធរឃុំ ស្រុកជាមួយម្ចាស់គម្រោងផ្សារតែម្ដង ។
លោក ឡុង ផលគុណ ប្រធានមន្ទីរធនធានទឹក និងឧតុនិយមខេត្ត ដែលបានចុះទៅពិនិត្យផ្ទាល់នៅទីតាំងចាក់ដីលុបស្ទឹងនោះ បាននិយាយថា ទីតាំងចាក់ដីលុបស្ទឹងនោះមានប្រវែង៤០ម៉ែត្រពីច្រាំងស្ទឹងរុលចូលទៅក្នុងស្ទឹង និងមានការសាងសង់រោងឆ្អឹងដែក សម្រាប់ធ្វើផ្សារលក់ដូរ ដែលសង់បាន៧០%ទៅហើយនៅក្បែរគល់ស្ពានបាយដំរ៉ាំនោះតែម្ដង ។
លោកបានវាយតម្លៃតាមលក្ខណៈបច្ចេកទេសដូច្នេះថា បើពិនិត្យជាក់ស្ដែង និងយោងទៅលើលក្ខណៈបច្ចេកទេស ការចាក់ដីរបៀបនេះធ្វើឱ្យមានការប្រែប្រួលលំហូរ និងចរន្តទឹកយ៉ាងខ្លាំង ដែលបង្កឱ្យមានការជន់លិច និងការបាក់ច្រាំងស្ទឹងយ៉ាងខ្លាំងក្លាទៀតផង ។ ដូច្នេះការចាក់ដីបែបនេះ គឺជាការរំលោភបំពានច្បាប់ និងបង្កផលប៉ះពាល់ធ្ងន់ធ្ងរបំផុត ។
កោះសន្តិភាពមិនទាន់អាចទំនាក់ទំនងសុំប្រតិកម្មបែបណាពីលោក ច័ន្ទ សុភា ម្ចាស់គម្រោងផ្សារនេះបានភ្លាមៗទេនៅរសៀលថ្ងៃទី៥ មេសានេះ ជុំវិញលិខិតឱសានវាទរបស់រដ្ឋបាលខេត្ត ដែលទុករយៈពេល១ខែឱ្យលោកកាយដីចេញ និងរុះរើសំណង់ផ្សារចេញឱ្យអស់ពីមាត់ស្ទឹង ។
ទោះជាយ៉ាងណាគេនៅចាំមើលថា តើការអនុវត្តច្បាប់របស់លោកមេឃុំបាយដំរ៉ាំ និងលោកអភិបាលស្រុកបាណន់ ដែលលោកទាំង២ជាអ្នកស៊ីញ៉េឯកភាពឱ្យគេធ្វើផ្សារនេះ មានប្រសិទ្ធភាពឬអត់ ទៅលើបុគ្គលមានលុយ មានខ្សែ ដែលថ្លើមធំហ៊ានឃុបឃិតគ្នាចាក់ដីលុបស្ទឹងធ្វើផ្សារខាងលើនេះ ។
មតិនានាក្នុងខេត្តនិយាយថា ការចាក់ដីលុបស្ទឹងបែបនេះ មិនដឹងថា រត់ការអស់ប៉ុន្មានទេ។ វាមិនដែលសុំមាត់ទទេបានទេសម័យនេះ។ មើលទៅមានតែសុំយកមកវិញ ព្រោះមេឃុំ និងអភិបាលស្រុកមានអំណាចអន់ពេក មិនគួរទុកចិត្តទុកថ្លើមបានទេ ។ ថ្ងៃក្រោយឱ្យចេះរាងផង…បើមិនរាងទេ សុំកុំរាង !!!
ចែករំលែកព័តមាននេះ