រាជធានីភ្នំពេញ ៖ មួយរយៈចុងក្រោយនេះ ភ្ញៀវទេសចរឡាវបានចូលមកទស្សនាកម្ពុជា មានចំនួនកាន់តែច្រើនឡើងៗគួរឲ្យកត់សម្គាល់ ។ នេះដោយសារតែកត្ដាហេដ្ឋារចនាសម្ព័ន្ធនៅកម្ពុជាល្អប្រសើរ និងការបើកច្រកព្រំដែនកាលពីពេលថ្មីៗនេះបានបង្កលក្ខណៈងាយស្រួលក្នុងការធ្វើដំណើរ ។ ទន្ទឹមនឹងនេះ សេដ្ឋកិច្ចប្រទេសឡាវកើនឡើង ក៏ជាចំណែកមួយជួយជំរុញឲ្យប្រជាជនឡាវចាប់ផ្ដើមធ្វើដំណើរកម្សាន្ដទៅក្រៅប្រទេសផងដែរ ។
លោក ទិត ចន្ថា រដ្ឋលេខាធិការក្រសួងទេសចរណ៍ បានថ្លែងថា ភ្ញៀវទេសចរឡាវចូលមកទស្សនាកម្ពុជាមានចំនួនកើនឡើងនោះ គឺអាស្រ័យដោយកត្តាហេដ្ឋារចនាសម្ព័ន្ធនៅកម្ពុជា រីកចម្រើន ជួយសម្រួលដល់ដំណើរទេសចរណ៍ គួបផ្សំនឹងជីវភាពប្រជាពលរដ្ឋឡាវរីកចម្រើនផងដែរ ។
លោកថ្លែងថា ៖ « ក្នុងរយៈពេល២ខែ (មករា ដល់កុម្ភៈឆ្នាំនេះ) ភ្ញៀវទេសចរឡាវបានចូលមកទស្សនាកម្ពុជា មានចំនួន៦៥.៦៧៥នាក់ ស្មើនឹង៦,៤%នៃចំនួនសរុប និងកើនឡើងប្រមាណ៦៤,៥% បើធៀបនឹងរយៈពេលដូចគ្នាកាលពីឆ្នាំ២០១៦ » ។ លោកបញ្ជាក់ថា ចំនួនទេសចរឡាវកើនឡើងខ្ពស់ បើធៀបទៅនឹងកំណើនភ្ញៀវទេសចរបណ្តាប្រទេសនានា ដែលចូលមកទស្សនាកម្ពុជា នាដើមឆ្នាំ២០១៧នេះ ។
លោករដ្ឋលេខាធិការអះអាងថា ៖ «កំណើនភ្ញៀវទេសចរឡាវចូលមកទស្សនាកម្ពុជា ដោយសារតែកត្តាហេដ្ឋារចនាសម្ព័ន្ធនៅកម្ពុជា ខណៈយើងបានស្ថាបនាផ្លូវ ស្ពាន តភ្ជាប់តាមច្រកអន្តរជាតិត្រពាំងក្រៀល ឆ្ពោះទៅខេត្តស្ទឹងត្រែង ខេត្តព្រះវិហារ រហូតទៅដល់ខេត្តសៀមរាបអង្គរថែមទៀត ដែលបង្កភាពងាយស្រួលដល់ការធ្វើដំណើររបស់ភ្ញៀវទេសចរឡាវ ។ ទន្ទឹមនឹងនេះ កម្ពុជា-ឡាវ ជាប្រទេសជាប់ព្រំដែនគ្នា ហើយជាបន្តបន្ទាប់ យើងបានផ្សព្វផ្សាយអំពីទេសចរណ៍រួមគ្នាច្រើន ក្នុងពេលពលរដ្ឋឡាវបច្ចុប្បន្នមានជីវភាពធូរធារជាងមុនផងដែរ » ។
គួរបញ្ជាក់ថា ក្នុងរយៈពេល២ខែដើមឆ្នាំនេះ ភ្ញៀវទេសចរអន្តរជាតិចូលមកទស្សនាកម្ពុជា មានចំនួន១.០២៥.៥១២នាក់ កើនឡើង១២,១% បើធៀបនឹងរយៈពេលដូចគ្នាឆ្នាំ២០១៦ ។ ក្នុងនោះភ្ញៀវទេសចរចិនឈរលំដាប់ថ្នាក់លេខ១ មានចំនួន១៧២.៤៣៨នាក់ ស្មើនឹង១៦,៤%នៃចំនួនសរុប និងកើនឡើងប្រមាណ១៦,៧% ធៀបនឹងរយៈពេលដូចគ្នាឆ្នាំ២០១៦ ។ បន្ទាប់មក ភ្ញៀវវៀតណាមមានចំនួន១៤១.៣៩៤នាក់ ស្មើនឹង១៣,៨%នៃចំនួនសរុប ថយចុះប្រមាណ២,១% ប៉ុន្តែភ្ញៀវមកពីអាមេរិក, បារាំង, អង់គ្លេស, អាល្លឺម៉ង់ និងជប៉ុនបានកើនឡើង ៕
ចែករំលែកព័តមាននេះ