ទីក្រុងបែរឡាំង ៖ ប្រទេសអាល្លឺម៉ង់បានជំរុញសហភាពអឺរ៉ុប (EU) កាលពីថ្ងៃសុក្រសប្ដាហ៍មុន ឲ្យពិចារណាដាក់ពាក្យបណ្តឹងទៅកាន់អង្គការពាណិជ្ជកម្មពិភពលោក (WTO) ប្រឆាំងនឹងសហរដ្ឋអាមេរិក ទាក់ទិននឹងផែនការរបស់ពួកគេក្នុងការដាក់ពន្ធលើផលិតផលដែកថែបពីសមាជិក EU ទាំង៥ ។
តម្លៃដែកថែបពិភពលោកបានធ្លាក់ចុះយ៉ាងខ្លាំង ខណៈក្រុមហ៊ុនចិនត្រូវបានរាប់បញ្ចូលជាអ្នកផ្គត់ផ្គង់ដែកថែបពាក់កណ្តាលរបស់ពិភពលោក បានផលិតយ៉ាងច្រើន និងដាក់លក់ក្នុងទីផ្សារនាំចេញ ដែលនាំឲ្យមានការធ្វើកូដកម្ម និងរិះគន់យ៉ាងខ្លាំងពីសហរដ្ឋអាមេរិក សហភាពអឺរ៉ុប និងប្រទេសដទៃ ។
កាលពីថ្ងៃព្រហស្បតិ៍កន្លងទៅ នាយកដ្ឋានពាណិជ្ជកម្មសហរដ្ឋអាមេរិក បានស្វែងរកជាលើកចុងក្រោយថា ក្រុមហ៊ុនផលិតរបស់អឺរ៉ុប និងអាស៊ីបានលក់ផលិតផលបន្ទះដែកថែប និងកាបូនមួយចំនួនដោយតម្លៃទាបក្នុងទីផ្សារអាមេរិក ធ្វើឲ្យសហរដ្ឋអាមេរិកដាក់ពន្ធពី៣,៦២%ទៅ១៤៨% លើផលិតផលទាំងនោះ ។
ក្រុមហ៊ុនដែលត្រូវបានប៉ះពាល់ គឺក្នុងប្រទេសអាល្លឺម៉ង់ បែលហ្ស៊ិក បារាំង អុីតាលី និងប្រទេសមួយចំនួនទៀត ។
លោក Sigmar Gabriel រដ្ឋមន្ត្រីការបរទេសអាល្លឺម៉ង់ ថ្លែងថា រដ្ឋាភិបាលសហរដ្ឋអាមេរិកបានរៀបចំផ្តល់អត្ថប្រយោជន៍ដល់សហគ្រាសអាមេរិក ដោយមិនយុត្តិធម៌សម្រាប់សហគ្រាសអឺរ៉ុប មិនថាវាល្មើសនឹងច្បាប់ពាណិជ្ជកម្មអន្តរជាតិយ៉ាងណាក្តី ។ លោកថ្លែងថា ៖ « ពួកអឺរុបមិនអាចទទួលយកវាបានទេ ។ EU ពេលនេះត្រូវតែពិនិត្យថា គួរតែដាក់ពាក្យបណ្តឹងដល់ WTO ដែរឬទេ ។ ខ្ញុំពិតជាគាំទ្រដល់គំនិតនេះណាស់ » ។
លោកនិយាយទៀតថា ប្រទេសអាល្លឺម៉ង់ត្រូវតែចេញមុខប្រឆាំងនឹងសហរដ្ឋអាមេរិក និងវិធីសាស្ត្រដែលធ្វើឲ្យអាល្លឺម៉ង់បាត់បង់ភាពប្រកួតប្រជែងក្នុងវិស័យដែកថែបអន្តរជាតិ។ លោកព្រមានថា ៖ « ប្រសិនបើសហរដ្ឋអាមេរិកអាចរួចខ្លួននឹងការប្រកួតប្រជែងមិនយុត្តិធម៌នេះ វិស័យផ្សេងទៀតក៏អាចធ្លាក់ក្រោមការគំរាមកំហែងដូចគ្នាដែរ»។
លោកស្រី Brigitte Zypries រដ្ឋមន្ត្រីសេដ្ឋកិច្ច ថ្លែងថា ប្រទេសអាល្លឺម៉ង់រួមជាមួយគណៈកម្មាធិការអឺរ៉ុប នឹងបន្តជំរុញឲ្យសហរដ្ឋអាមេរិកគោរពតាមច្បាប់របស់ WTO ។
នាយកប្រតិបត្តិសហគ្រាស Marcegaglia ប្រទេសអីុតាលី និយាយថា សហរដ្ឋអាមេរិកអាចនឹងបង្កសង្គ្រាមពាណិជ្ជកម្ម ប្រសិនបើពួកគេអនុម័តផែនការដាក់ពន្ធគយ ដែលជាបញ្ហាគួរស្នើទៅកាន់ WTO ។
ចំណែករដ្ឋមន្ត្រីឧស្សាហកម្មអីុតាលី លោក Carlo Calenda ព្រមានថា ជម្លោះពាណិជ្ជកម្មរវាងសហរដ្ឋអាមេរិក និងសហភាពអឺរ៉ុប នឹងប៉ះពាល់ដល់ការលូតលាស់ និងអភិបាលកិច្ចពិភពលោក ខណៈប្រទេសលោកខាងលិចគួរតែបង្ហាញពីការរួបរួមដើម្បីប្រឆាំងនឹងការធ្វើពាណិជ្ជកម្មដោយមិនយុត្តិធម៌ ។
លោកប្រាប់អ្នកកាសែតថា ៖ « រាល់ជម្លោះពាណិជ្ជកម្មរវាងសហរដ្ឋអាមេរិក និងសហភាពអឺរ៉ុប នឹងបង្កគ្រោះថ្នាក់មិនត្រឹមតែសេដ្ឋកិច្ចទាំងពីរនេះទេ ប៉ុន្តែដល់ច្បាប់ដែលគ្រប់គ្រងការធ្វើសកលភាវូបនីយកម្មទៀតផង » ៕
ចែករំលែកព័តមាននេះ