ប្រទេសមីយ៉ាន់ម៉ា ៖ បន្ទាប់ពីបានពន្យារពេលអស់២ឆ្នាំ គម្រោងបំពង់បង្ហូរប្រេងឆៅរបស់មីយ៉ាន់ម៉ា និងចិន ត្រូវគេរំពឹងថានឹងចាប់ផ្តើមដំណើរការនៅខែឧសភាខាងមុខ ។ នេះបើតាមមន្ត្រីមីយ៉ាន់ម៉ាបាននិយាយក្នុង សប្តាហ៍នេះ។
ភាគីមីយ៉ាន់ម៉ា និងចិន បានពិភាក្សាពីលក្ខខណ្ឌគម្រោងដំណើរការបំពង់បង្ហូរប្រេងឆៅ ចាប់ពីការបើកឲ្យប្រើប្រាស់នាដើមឆ្នាំ២០១៥។ នេះបើតាមការលើកឡើងរបស់មន្ត្រីនានា ។
បុគ្គលិកផ្លូវការម្នាក់មកពីក្រុមហ៊ុនបង្ហូរប្រេងឆៅអាស៊ីអាគ្នេយ៍ (SEAOP) ដែលទទួលខុសត្រូវលើដំណើរការគម្រោងបង្ហូរប្រេងនេះនិយាយថា៖ « បំពង់បង្ហូរប្រេងឆៅបានត្រៀមរួចជាស្រេចសម្រាប់ដំណើរការ ។ យើងកំពុងរង់ចាំការណែនាំពីថ្នាក់លើ ហើយរំពឹងថា វានឹងចាប់ផ្តើមនៅខែឧសភា » ។
មន្ត្រីមកពីសហគ្រាសប្រេង និងឧស្ម័នមីយ៉ាន់ម៉ា (MOGE) ឲ្យដឹងថា កិច្ចសន្យាដឹកជញ្ជូនប្រេងឆៅនេះ ត្រូវបានចុះហត្ថលេខានៅទីក្រុងណៃពិដោ នាថ្ងៃទី២៨ មីនា ប៉ុន្តែការប្រើប្រាស់នៅតំបន់ Made Island រដ្ឋ Rakhine មិនទាន់បញ្ចប់នៅឡើយទេ ។
លោក Kyaw Nyan Tun នាយកក្រុមហ៊ុន MOGE បានប្រាប់សារព័ត៌មាន Myanmar Times នៅថ្ងៃទី២៩ មីនាថា ៖ « កិច្ចសន្យារវាងប្រទេសចិន និងក្រុមហ៊ុន SEAOP បានចុះហត្ថលេខាកាលពីពេលថ្មីៗនេះ ។ ក្រុមហ៊ុន MOGE បានធ្វើជាសាក្សីលើការចុះហត្ថលេខា ក្នុងនាមជាដៃគូវិនិយោគគម្រោង ប៉ុន្តែពួកគេត្រូវចរចាជាមួយអាជ្ញាធរកំពង់ផែមីយ៉ាន់ម៉ាសម្រាប់ដំណើរការផងដែរ » ។
ប្រេងឆៅមួយចំនួនធំនឹងត្រូវបញ្ជូនទៅតំបន់ Made Island នាសប្តាហ៍ក្រោយ ប៉ុន្តែពួកគេមិនទាន់ច្បាស់ពីទីតាំងចាប់ផ្តើមបូមប្រេងឆៅទៅប្រទេសចិន តាមរយៈបំពង់បង្ហូរប្រេងនេះទេ ។
ក្រុមហ៊ុន SEAOP បានអញ្ជើញប្រព័ន្ធផ្សព្វផ្សាយក្នុងស្រុក និងរបស់ចិនមានមូលដ្ឋាននៅទីក្រុងយ៉ាំងហ្គោន មកសង្កេតពីការគ្រប់គ្រង និងស្ថានីយបូមឧស្ម័ននៅជិតទីក្រុង Mandalay កាលពីសប្តាហ៍មុន ។ ក្រុមហ៊ុននេះក៏បានណែនាំពីការទទួលខុសត្រូវរាល់សកម្មភាពដំណើរការផងដែរ ។
គម្រោងបង្ហូរប្រេងឆៅ ក៏មានបញ្ហាចម្រូងចម្រាសនៅមីយ៉ាន់ម៉ាផងដែរ ដែលជំរុញឲ្យមានការប្រឆាំងយ៉ាងខ្លាំងក្លាក្នុងចំណោមអង្គការសាធារណៈ និងមិនមែនរដ្ឋាភិបាលជាច្រើន ។
នៅឆ្នាំ២០១១ រដ្ឋាភិបាលថ្មីដឹកនាំដោយគណបក្ស NLD បានផ្អាកគម្រោងទំនប់ Myitsone នៅរដ្ឋ Kachin ដោយសារតែទំនប់វារីអគ្គិសនីសាងសង់ដោយចិននេះ ត្រូវគេចោទប្រកាន់ថា បំផ្លាញបរិស្ថាន និងសហគមន៍ ។
បំពង់បង្ហូរប្រេងឆៅប្រវែង៧៧១គីឡូម៉ែត្រ ចាប់ពីតំបន់ Made Island ភាគខាងលិចមីយ៉ាន់ម៉ា ទៅកាន់ខេត្ត Yunan ភាគពាយព្យចិន នឹងត្រូវសាងសង់កាត់តាមផ្នែកកណ្តាលនៃប្រទេសមីយ៉ាន់ម៉ា ។ បំពង់បង្ហូរប្រេងនេះ ស្របគ្នានឹងបំពង់បង្ហូរឧស្ម័នធម្មជាតិ ដែលបានដំណើរការពេញលេញចាប់ពីឆ្នាំ២០១៤ ។
សាជីវកម្មប្រេងជាតិរបស់ចិន (CNPC) និងរដ្ឋាភិបាលមីយ៉ាន់ម៉ាបានចុះហត្ថលេខាលើកិច្ចព្រមព្រៀងគម្រោងបង្ហូរប្រេងឆៅមួយក្នុងឆ្នាំ២០០៨ ហើយការសាងសង់បានបញ្ចប់នៅដើមឆ្នាំ២០១៥ ។ មីយ៉ាន់ម៉ានឹងទទួលបានថ្លៃសិទ្ធិលើផ្លូវដោយផ្ទាល់ចំនួន១៣,៨១លានដុល្លារអាមេរិកពីគម្រោងបង្ហូរឧស្ម័ន និងប្រេងជារៀងរាល់ឆ្នាំ និងតម្លៃឆ្លងកាត់១ដុល្លារអាមេរិកសម្រាប់ប្រេងឆៅ១តោន នៅក្រោមកិច្ចព្រមព្រៀងសម្បទានរយៈពេល៣០ឆ្នាំ ។
ដំណើរការសាកល្បងនៃបំពង់បង្ហូរប្រេងនេះ គឺចាប់ផ្ដើមនៅខែមករា ២០១៥ ប៉ុន្តែដំណើរការពេញលេញត្រូវបានពន្យារពេល ដោយសារភាគីទាំងពីរមិនអាចឈានដល់កិច្ចព្រមព្រៀងលក្ខខណ្ឌពាណិជ្ជកម្ម ។ នេះបើតាមការបង្ហាញរបស់មន្ត្រី ។
បំពង់បង្ហូរប្រេងនេះ នឹងជាផ្លូវកាត់សម្រាប់ប្រេងឆៅពីមជ្ឈិមប្រទេសទៅកាន់ប្រទេសចិន ជាជាងដឹកជញ្ជូនកាត់តាមភាគខាងត្បូង និងឆ្លងកាត់ប្រទេសសិង្ហបុរី ។ ប្រេងឆៅនឹងត្រូវបញ្ជូននៅតំបន់ Made Island រដ្ឋ Rakhine តាមបំពង់បង្ហូរប្រេងប្រវែង៧០០គីឡូម៉ែត្រ ដែលឆ្លងកាត់មីយ៉ាន់ម៉ា ទៅគោលដៅចុងក្រោយខេត្ត Yunnan របស់ចិន។
តាមមន្ត្រីឲ្យដឹងថា ការវិនិយោគសរុបសម្រាប់គម្រោងបង្ហូរប្រេងនេះស្មើ២,៤៥ប៊ីលានដុល្លារអាមេរិក ដោយក្រុមហ៊ុន CNPC គ្រប់គ្រង៥០,៩% ហើយចំណែកនៅសល់ គឺជាកម្មសិទ្ធិរបស់មីយ៉ាន់ម៉ា ។
បំពង់នេះត្រូវបានធ្វើឡើងដើម្បីបញ្ជូនប្រេងឆៅ២២លានតោនជារៀងរាល់ឆ្នាំ ។ ស្ថានីយផ្ទុកប្រេងអន្តរជាតិលើកដំបូងរបស់ប្រទេសនេះនៅ Made Island ជាតំបន់ធំមួយដែលមានកន្លែងផ្ទុកប្រេង កន្លែងជួសជុលកប៉ាល់ កំពង់ផែសមុទ្រ ផ្លូវនាវាចម្ងាយ៣៨គីឡូម៉ែត្រ និងស្ថានីយផ្ទុក៤៨០ម៉ែត្រ ។ ធុងទុកប្រេងឆៅសរុបមាន១២ ដែលធុងនីមួយៗទុកបាន២២លានលីត្រ ៕
ចែករំលែកព័តមាននេះ