ក្នុងការប្រកួតវគ្គផ្តាច់ព្រ័ត្របារាំងលីគខាប់កាលពីរាត្រីថ្ងៃសៅរ៍កន្លងទៅ នៅពហុកីឡដ្ឋាន Parc Olympique Lyonnais ក្រុម Paris SG បានយកឈ្នះក្រុម Monaco ៤-១ ដែលនេះជាការទទួលជ័យជម្នះ៤ឆ្នាំជាប់ៗគ្នា និងជាលើកទី៧ផងដែរ ។
សន្ទុះនៃការប្រកួតនេះ ក្រុមទាំងពីរធ្វើបានល្អដូចគ្នា ប៉ុន្តែរនាំងការពារក្រុម Monaco ហាក់មិនរឹងមាំ ជាហេតុធ្វើឱ្យក្រុម Paris SG រកបានរហូតដល់៤គ្រាប់ទល់១ ដែលគ្រាប់ដំបូងរបស់ក្រុម Paris SG រកបានដោយកីឡាករ J. Draxlerនៅនាទីទី៤ រីឯគ្រាប់ទី២ដោយកីឡាករ Di Maria នៅនាទីទី៤៤ ខណៈ២គ្រាប់ទៀតរកបានដោយកីឡាករ Cavani នៅនាទីទី ៥៤ និង៩០ ។ ចំណែកឯ១គ្រាប់របស់ក្រុម Monaco រកបានដោយកីឡាករ Lemar នៅនាទីទី ២៧ ។
គួរបញ្ជាក់ថា ក្រុម Paris SG បានគ្រងពានបារាំងលីគខាប់នេះជាលើកទី៧ចាប់តាំងពីឆ្នាំ ១៩៩៥, ១៩៩៨, ២០០៨, ២០១៤, ២០១៥, ២០១៦ និងនៅឆ្នាំ២០១៧ នេះ ៕
ចែករំលែកព័តមាននេះ