ទីក្រុងព្រុចសែល ៖ អ្នកការទូតរបស់អឺរ៉ុបនិយាយថា ប្រទេសចិនបានចាប់ផ្តើមយុទ្ធនាការប្រជាភិថុតិជាមួយសហភាពអឺរ៉ុប តាំងពីលោក ប្រធានាធិបតី Donald Trump ឡើងកាន់តំណែងមក ហើយប្រទេសនេះបានងាកទៅគាំទ្រការចរចាពាណិជ្ជកម្ម និងផ្តល់សញ្ញាថា នឹងមានកិច្ចសហប្រតិបត្តិការកាន់តែស៊ីជម្រៅថែមទៀតក្នុងបញ្ហាផ្សេងៗ ។
អ្នកតំណាងអឺរ៉ុបនៅទីក្រុងព្រុចសែល និងប៉េកាំងប្រទះឃើញថា ប្រទេសចិនចាំបាច់ស្វែងរកដៃគូដែលគាំទ្រការធ្វើសកលភាវូបនីយកម្ម ខណៈមានការបារម្ភថា លោក Trump អាចនឹងប៉ះពាល់តាមរយៈគោលនយោបាយអាមេរិកទី១ របស់លោក ។
អ្នកការទូតម្នាក់នៅក្រុងប៉េកាំងនិយាយថា ៖ « លោក Trump កំពុងតែជំរុញឲ្យប្រទេសចិន និងអឺរ៉ុបសហការគា្ន » ។
ឧត្តមអ្នកការទូត និងមន្ត្រី EU ចំនួន៤រូបដែលមានទំនាក់ទំនងជិតដិតជាមួយចិន ប្រាប់ថា ពួកគេមើលឃើញឱកាសដោះស្រាយបញ្ហាអាជីវកម្ម រួមមានសន្ធិសញ្ញាដែលនឹងបង្កើនលំហូរការវិនិយោគផងដែរ ។
ប៉ុន្តែក្រុមអាជីវកររបស់ EU គ្មានសុទិដ្ឋិនិយមទេ ដោយពួកគេបានបង្ហាញភាពមិនពេញចិត្តជាមួយការលំបាកចូលទៅក្នុងទីផ្សារចិន និងជំរុញឲ្យឆ្លើយតបកាន់តែច្បាស់លាស់ជាងនេះ ។
អ្នកការទូតខាងលើនិយាយថា សញ្ញាច្បាស់ជាងគេក្នុងការបង្ហាញពីភាពផ្លាស់ប្តូររវាងប្រទេសទាំងពីរ គឺចិនបានសម្រេចចិត្តថា នឹងបោះបង់ចោលយុទ្ធនាការសាធារណៈ ដែលធ្វើឡើងដើម្បីឲ្យសហភាពអឺរ៉ុបទទួលស្គាល់ប្រទេសខ្លួនថា ជាសេដ្ឋកិច្ចដឹកនាំដោយទីផ្សារ មិនមែនរដ្ឋទេ ។
គួរបញ្ជាក់ថា ការមានឈ្មោះជាសេដ្ឋកិច្ចទីផ្សារនេះ នឹងធ្វើឲ្យសហភាពអឺរ៉ុបពិបាកដាក់ពន្ធលើផលិតផលនាំចូលពីប្រទេសចិន ។
អ្នកការទូតខាងលើបន្តថា ៖ « ឈ្មោះជាសេដ្ឋកិច្ចទីផ្សារ គឺកំពុងនៅក្រោមការចរចាក្នុងកម្រិតយ៉ាងទាបមួយ ។ នេះគឺជាផ្នែកមួយនៃយុទ្ធនាការប្រជាភិថុតិ » ។
អ្នកនាំពាក្យរបស់ក្រសួងការបរទេសចិន លោក Hua Chunying និយាយថា បញ្ហានេះនៅតែមានអាទិភាពខ្ពស់សម្រាប់ប្រទេសខ្លួន ហើយលោកកត់សម្គាល់ថា ចិនមានចំណាប់អារម្មណ៍ធ្វើជាដៃគូដ៏ខ្លាំងក្លាជាមួយEU ។
ជាមួយគ្នានេះ ប្រទេសចិនបានប្រាប់មន្ត្រីអឺរ៉ុបថា ពួកគេចង់លើកថ្ងៃប្រជុំប្រចាំឆ្នាំជាមួយសហភាពអឺរ៉ុបក្នុងខែកក្កដា ។ អ្នកការទូតនិយាយថា ខ្លួនកំពុងរកថ្ងៃដែលសមរម្យនៅឡើយ ៕
ចែករំលែកព័តមាននេះ