ទីក្រុងហុងកុង ៖ មហាសេដ្ឋីមានជាងគេរបស់ហុងកុង លោក Li Ka-Shing អះអាងថា ការងើបឡើងវិញនៃទីផ្សារអចលនទ្រព្យ ដែលកំពុងតែជំរុញឲ្យតម្លៃកើនឡើងនេះ អាចនឹងបន្តកើតមានឡើងប្រមាណ២ឆ្នាំទៀត ខណៈតម្រូវការកើនឡើង ។
អគ្គនាយក អាយុ៨៨ឆ្នាំ របស់ក្រុមហ៊ុន Cheung Kong Property Holdings Ltd និង CK Hutchison Holdings Ltd រូបនេះបាននិយាយកាលពីថ្ងៃពុធថា ៖ « ខ្ញុំមិនគិតថា តម្លៃអចលនទ្រព្យនឹងធ្លាក់ចុះក្នុងរយៈពេល១ឆ្នាំ ឬ២ឆ្នាំខាងមុខឡើយ ។ តម្រូវការពីអតិថិជនពិតជារឹងមាំណាស់ » ។
ប៉ុន្តែការងើបឡើងវិញនៃទីផ្សារអចលនទ្រព្យនេះបានធ្វើឲ្យអ្នកដឹកនាំរបស់ហុងកុងឈឺក្បាល និងជំរុញឲ្យមានភាពមិនសុខចិត្តក្នុងចំណោមប្រជាជន ។ បន្ទាប់ពីធ្លាក់ចុះមិនយូរប៉ុន្មាន តម្លៃផ្ទះបានកើនឡើងម្តងទៀតក្នុងឆ្នាំមុន មកដល់កម្រិតយ៉ាងខ្ពស់ ។ តម្លៃផ្ទះក្នុងពេលបច្ចុប្បន្ននេះបានកើនឡើង១៧% បើធៀបនឹងឆ្នាំមុន ។
កាលពីខែវិច្ឆិកា រដ្ឋាភិបាលហុងកុងបានបង្កើនពន្ធរត់ឯកសារផ្លូវច្បាប់សម្រាប់ប្រជាជន លើកលែងតែអតិថិជនទិញអចលនទ្រព្យជាលើកដំបូង ដើម្បីកាត់បន្ថយតម្លៃកើនឡើង ប៉ុន្តែការខិតខំប្រឹងប្រែងនេះមិនបានប៉ះពាល់ដល់តម្រូវការច្រើនទេ ។
លោកប្រធានាធិបតី Leung Chun-Ying អាចចៀសផុតពីបញ្ហាតម្លៃផ្ទះនេះបាន៥ឆ្នាំហើយតាំងពីពេលលោកឡើងកាន់តំណែង ប៉ុន្តែដោយការបោះឆ្នោតរបស់ទីក្រុងនេះកាន់តែខិតជិត បេក្ខជនឈរឈ្មោះធំៗទាំងពីរបានលើកឡើងពីបញ្ហាតម្លៃផ្ទះដ៏ខ្ពស់នេះ និងអះអាងថា គួរមានវិធានការថ្មីដើម្បីដោះស្រាយ ។
ទ្រព្យសម្បតិ្តរបស់លោក Li បានរក្សាភាពរឹងមាំក្នុងទីផ្សារអចលនទ្រព្យហុងកុង ។ យោងតាមសន្ទស្សន៍មហាសេដ្ឋីឲ្យដឹងដែរថា ទ្រព្យសម្បត្តិរបស់លោកបានកើនឡើង២,១ប៊ីលានដុល្លារក្នុងឆ្នាំនេះ មកត្រឹម៣០,៧ប៊ីលានដុល្លារឯណោះ ធ្វើឲ្យលោកក្លាយជាមហាសេដ្ឋីមានទ្រព្យសម្បតិ្តច្រើនជាងគេលេខ៣ នៅក្នុងអាស៊ី ។
ប៉ុន្តែមហាសេដ្ឋីរូបនេះមិនសូវមានសុទិដ្ឋិនិយមពីស្ថានភាពសេដ្ឋកិច្ចរបស់ហុងកុងទេ ដោយលោកនិយាយថា វាស្ថិតក្នុងស្ថានភាពអាក្រក់ជាងគេក្នុងរយៈពេលប្រមាណ២០ឆ្នាំមកនេះ ។
លោកបានលើកឡើងពីវិស័យដែលទាក់ទិននឹងទេសចរណ៍នៅហុងកុងថា បានធ្លាក់ចុះនាឆ្នាំមុន ហើយផ្សាររបស់លោកនៅហុងកុងដំណើរការមិនបានល្អជាងគេ បើធៀបនឹងប្រទេសដទៃ ៕
ចែករំលែកព័តមាននេះ