ខេត្តសៀមរាប ៖ ការធ្វើឡើងវិញទ្រង់ទ្រាយឡដុតកុលាលភាជន៍សម័យបុរាណនឹងដាក់តាំងបង្ហាញក្នុងព្រឹត្តិការណ៍អង្គរសង្គ្រាន្ត ដើម្បីលើកកម្ពស់វិស័យសិល្បៈឧស្សាហ៍កម្ម និងវប្បធម៌ខ្មែរ ដើម្បីឱ្យមហាជនបានយល់ដឹងកាន់តែស៊ីជម្រៅ ។
ឡនេះមានទីតាំងនៅបរិវេណ«ភូមិខ្ញុំ» ហើយវានឹងបើកឱ្យសាធារណជនចូលទស្សនាក្នុងថ្ងៃព្រឹត្តិការណ៍អង្គរសង្គ្រាន្ត ដែលនឹងប្រព្រឹត្តទៅនៅពាក់កណ្តាលខែមេសា ២០១៧ ។
លោកបណ្ឌិតអ៊ា ដារិទ្ធ អនុប្រធានមជ្ឈមណ្ឌលអន្តរជាតិស្រាវជ្រាវនិងតម្កល់ឯកសារអង្គរនៃអាជ្ញាធរជាតិអប្សរា ឱ្យដឹងថាឡដុតកុលាលភាជន៍ដែលបានសាងសង់នេះ គឺជាប្រភេទឡដែលយកគំរូតាមឡបុរាណដើមសម័យអង្គរ ជាប្រភេទឡខ្នាតតូចមួយដែលអ្នកស្រាវជ្រាវបានធ្វើកំណាយស្រាវជ្រាវរកឃើញ ។ ការសង់ឡដុតកុលាលភាជន៍នេះគឺក្នុងន័យ ដើម្បីបង្ហាញដល់សាធារណជនឱ្យបានឃើញ ឱ្យស្គាល់ថាសម្ភារប្រើប្រាស់ប្រចាំថ្ងៃរបស់ពលរដ្ឋខ្មែរសម័យបុរាណជាច្រើនគឺកើតចេញពីឡមួយនេះ ។
ក្រៅពីបានឃើញរូបរាងឡហើយនោះសាធារណជនដែលចូលរួមទស្សនានៅថ្ងៃអង្គរសង្ក្រាន្តក៏នឹងបានយល់ដឹងពីបច្ចេកទេសធ្វើកុលាលភាជន៍ផងដែរ ។ ជារួមពួកគេអាចរៀនអំពីបច្ចេកទេសធ្វើកុលាលភាជន៍ពីអ្នកជំនាញផ្ទាល់នៅទីនោះ ។ត្រង់ចំណុចនេះលោក ដារិទ្ធ បញ្ជាក់ថាគឺចង់ឱ្យសាធារណជនដឹងថា តើការធ្វើកុលាលភាជន៍មានលំបាកយ៉ាងណាខ្លះ ។
អ្នកជំនាញពន្យល់ថា ឡថ្មីនេះសង់ឡើងនៅលើដីទួលមួយដោយចាក់ដីកម្ពស់ប្រហែល ៣ម៉ែត្រ និងមានសង់ជាជម្រាលចុះក្រោម ។ ដំណាក់កាលដំបូងគេរៀបចំបាតឡដោយក្រាលដីឥដ្ឋ បន្ទាប់មកគេដំឡើងគ្រោងឆ្អឹងធ្វើពីឫស្សី ហើយសង់សសរនៅកណ្តាលឡ ដើម្បីទប់ដំបូលដែលមានរាងកោង ។ បន្ទាប់មកទៀត គេបៀកដីឥដ្ឋទាំងផ្នែកខាងលើ និងខាងក្រោមគ្រោងឆ្អឹងឫស្សី ដើម្បីទប់កុំឱ្យវាធ្លាក់ ឬជ្រុះ ។
ឡនេះមានទំហំទទឹង១,៨០ម៉ែត្រ បណ្តោយ ៦,៥០ម៉ែត្រ និងកម្ពស់ប្រហែល ១,២០ម៉ែត្រ ។
តាមការបកស្រាយរបស់លោកអ៊ា ដារិទ្ធ ដែលជាអ្នកសិក្សាស្រាវជ្រាវផ្នែកកុលាលភាជន៍ បានឱ្យដឹងទៀតថា នៅសម័យបុរាណក្រៅពីប្រទេសកម្ពុជា ក្នុងនោះក៏មានប្រទេសជិតខាងមួយចំនួនមានបច្ចេកទេសធ្វើឡដុតកុលាលភាជន៍ដូចគ្នាដែរដូចជាប្រទេស ភូមា ថៃ ឡាវ និងវៀតណាម ។
ខ្មែរមានបច្ចេកទេសខ្ពស់ដែលអាចធ្វើឱ្យកុលាលភាជន៍មានភាពរឹង ស្រទាប់រលោងមានគុណភាពល្អ និងប្លែកខុសពីគេ ។ ឡដុតកុលាលភាជន៍មានការវិវឌ្ឍខ្លាំងនៅសម័យអង្គរ ចាប់ពីសតវត្សទី៩ ដល់ទី១៥ ។
ឡដុតកុលាលភាជន៍ ដែលអ្នកបុរាណវិទ្យាបានរកឃើញនៅក្បែរប្រាសាទទ័ពជ័យ គឺជាឡធំជាងគេនៅតំបន់អាស៊ីអាគ្នេយ៍ ហើយមានបណ្តោយ២១ម៉ែត្រ និងទទឹង៣,២០ម៉ែត្រ ។
កុលាលភាជន៍ជាសម្ភារសម្រាប់ប្រើប្រាស់ប្រចាំថ្ងៃ និងក្នុងពិធីសាសនារបស់ពលរដ្ឋខ្មែរនៅ សម័យបុរាណ ដែលគេប្រើវាសម្រាប់ដាក់បាយចម្អិនម្ហូប ដាក់ទឹក និងស្រា ជាដើម ៕
ចែករំលែកព័តមាននេះ