ទីក្រុងហ្សាការតា ៖ រដ្ឋាភិបាលឥណ្ឌូណេស៊ីបានសម្រេចចិត្តថា ជ្រើសយកប្រទេសជប៉ុនធ្វើជាដៃគូរបស់ខ្លួន ក្នុងការអភិវឌ្ឍជាថ្មីនូវផ្លូវរថភ្លើងដែលតភ្ជាប់ទីក្រុង Jakarta និង Surabaya ក្នុង Java ខាងកើត ។
លោក Luhut Binsar Pandjaitan រដ្ឋមន្ត្រីកិច្ចការសម្របសម្រួលផ្លូវទឹកឥណ្ឌូណេស៊ី បានថ្លែងកាលពីថ្ងៃអាទិត្យថា ៖ « ពួកយើងបានសម្រេចចិត្តថា នឹងសហការជាមួយប្រទេសជប៉ុន» ។ លោកបន្ថែមថា ការសិក្សាពីភាពអាចទៅរួចដំណាក់កាលដំបូងសម្រាប់គម្រោងនេះនឹងចាប់ផ្តើមក្នុងខែឧសភា ខាងមុខ ។
លោក Luhut បន្តថា ៖ « នឹងមានការសិក្សារួមជាមួយប្រទេសជប៉ុន ហើយពួកយើងសង្ឃឹមថា ការសាងសង់នឹងបញ្ចប់ក្នុងត្រីមាសទី៤ ឆ្នាំ២០១៩ » ។
អនុរដ្ឋមន្ត្រីសម្របសម្រួលហេដ្ឋារចនាសម្ព័ន្ធរបស់ការិយាល័យកិច្ចការសម្របសម្រួលផ្លូវទឹកឥណ្ឌូណេស៊ី លោក Ridwan Djamaludin ថ្លែងថា រដ្ឋាភិបាលនឹងពិចារណាលើគម្រោងចំនួនពីរក្នុងការសាងសង់នេះ គឺលុបបំបាត់ការខ្វាត់ខ្វែងគ្នា និងសាងសង់ផ្លូវរថភ្លើងខ្ពស់ថ្មី ។
លោកបន្ថែមថា ៖ « វាក៏អាចយកជម្រើសទាំងពីរបូកបញ្ចូលគ្នាផងដែរ យោងតាមស្ថានការណ៍នៅជាន់ផ្ទាល់ដី » ។
គម្រោងនេះមានគោលដៅបង្កើនល្បឿនរថភ្លើង ដែលតភ្ជាប់ទីក្រុងទាំងពីរ ចាប់ពី៩០គីឡូម៉ែត្រក្នុង១ម៉ោង ទៅ១៦០គីឡូម៉ែត្រក្នុង១ម៉ោង ។
រដ្ឋាភិបាលក៏កំពុងពិចារណាលើបច្ចេកវិទ្យាផ្តល់ថាមពលដល់រថភ្លើងនេះដែរ គឺប្រេងម៉ាស៊ូត ដែលនឹងចំណាយប្រាក់ប្រមាណ២,២ប៊ីលានដុល្លារ ឬប្រើប្រាស់អគ្គិសនី៦,០១ប៊ីលានដុល្លារ ។
គួរបញ្ជាក់ថា ប្រទេសជប៉ុនធ្លាប់បរាជ័យក្នុងការទទួលបានកិច្ចសហប្រតិបត្តិការសាងសង់រថភ្លើងល្បឿនលឿន ដែលតភ្ជាប់ Jakarta និង Bandung នៅ Java ខាងលិច ខណៈប្រទេសចិនទទួលបានជោគជ័យ ៕
ចែករំលែកព័តមាននេះ