តម្លៃប្រេងបានធ្លាក់ចុះដល់៥០ដុល្លារអាមេរិកក្នុង១បារ៉ែលនៅថ្ងៃចន្ទ ដោយសារភាពមិនច្បាស់លាស់ថា តើការកាត់បន្ថយផលិតកម្ម ដែលដឹកនាំដោយ OPEC នឹងត្រូវបន្តចាប់ពីខែមិថុនាឬយ៉ាងណា ដើម្បីទប់ស្កាត់ការផ្គត់ផ្គង់ប្រេងឆៅលើសតម្រូវការ ។
គណៈកម្មាធិការមកពីសមាជិក OPEC និងមិនមែន OPEC បានយល់ព្រមកាលពីថ្ងៃអាទិត្យ ដើម្បីពិនិត្យលើការពន្យារពេលកិច្ចព្រមព្រៀងនេះ ហើយបញ្ឈប់ភ្លាមៗនូវសេចក្តីថ្លែងការណ៍ដែលបានព្រាងមុន និងណែនាំឲ្យរក្សាវិធានការនៅដដែល ។
តម្លៃប្រេងគោលអន្តរជាតិ Brent បានធ្លាក់ចុះ១៩សេន មកត្រឹម៥០,៦១ដុល្លារអាមេរិក បន្ទាប់ពីធ្លាក់ចុះទាបប្រហែល៥០,២៦ដុល្លារអាមេរិក ។ រីឯតម្លៃប្រេងឆៅរបស់សហរដ្ឋអាមេរិកបានធ្លាក់ចុះ៣១សេន មកត្រឹម៤៧,៦៦ដុល្លារអាមេរិក ។
លោក Stephen Brennock មកពីក្រុមហ៊ុនឈ្មួញកណ្តាលប្រេង PVM និយាយថា ៖ «មានកិច្ចខិតខំប្រឹងប្រែងដ៏លើសលប់ដឹកនាំដោយអង្គការ OPEC ដើម្បីធ្វើឲ្យការស្តុកប្រេងសកលវិលមកធម្មតាវិញ និងមានផលវិជ្ជមានចំពោះការផ្គត់ផ្គង់រយៈពេលខ្លី » ។
រដ្ឋមន្ត្រីមួយចំនួនមកពីបណ្តាប្រទេសនាំប្រេងចេញ និងក្រុមហ៊ុនផលិតប្រេងផ្សេងទៀតបានជួបប្រជុំគ្នានៅប្រទេសកូវ៉ែត ដើម្បីពិនិត្យមើលដំណើរការកាត់បន្ថយការផ្គត់ផ្គង់របស់ខ្លួន ។
សមាជិក OPEC និងអ្នកផលិត១១ ប្រទេសទៀតរួមមានរុស្ស៊ី បានព្រមព្រៀងគ្នានៅខែធ្នូ ដើម្បីកាត់បន្ថយទិន្នផលរួមគ្នាប្រមាណ១,៨លានបារ៉ែលក្នុង១ថ្ងៃ នៅឆមាសទី១ឆ្នាំនេះ ។
ខណៈ OPEC បានអំពាវនាវឲ្យបន្តទប់ស្កាត់ផលិតកម្មប្រេង ប៉ុន្តែប្រទេសរុស្ស៊ីមានភាពច្បាស់លាស់តិចតួចណាស់លើបញ្ហានេះ ។
រដ្ឋមន្ត្រីថាមពល លោក Alexander Novak បានថ្លែងកាលពីថ្ងៃអាទិត្យថា វាឆាប់ពេកក្នុងការនិយាយថា តើនឹងបន្តកិច្ចព្រមព្រៀងនេះឬយ៉ាងណា ។
ក្រុមអ្នកវិភាគនៅ JBC Energy បាននិយាយក្នុងរបាយការណ៍នៅថ្ងៃអាទិត្យថា ៖ «យើងនឹងឃើញពីកង្វះខាតទាក់ទងនឹងតម្លៃ និងគ្មានលទ្ធផលជាក់លាក់ណាមួយនឹងកើតឡើងឡើយនាពេលខាងមុខ » ។
JBC បន្ថែមថា ៖ « ការសង្ស័យនឹងកើនឡើងនៅក្នុងទីផ្សារនេះ ដោយសារមានភាពមិនច្បាស់លាស់ទាក់ទងនឹងការកាត់បន្ថយផលិតកម្ម » ។
តម្លៃប្រេងខ្ពស់ គឺជាលទ្ធផលនៃការកាត់បន្ថយការផ្គត់ផ្គង់របស់ OPEC ខណៈមានការផ្គត់ផ្គង់នៅសហរដ្ឋអាមេរិក ។ ក្រុមហ៊ុនអណ្ដូងប្រេងសហរដ្ឋអាមេរិកបានបន្ថែមការខួងប្រេងក្នុងសប្តាហ៍ទី១០ ។ នេះបើតាមទិន្នន័យពីក្រុមហ៊ុនផ្តល់សេវាថាមពល Baker Hughes កាលពីថ្ងៃសុក្រ ។
ទោះបីជាមានការស្តុកប្រេងច្រើន និងទិន្នផលរបស់សហរដ្ឋអាមេរិកកើនឡើងក្តី ក្រុមហ៊ុន Goldman Sachs ឲ្យដឹងថា ទីផ្សារនេះត្រូវបានគេធ្វើឲ្យមានតុល្យភាពជាថ្មី និងមិនចាំបាច់ទប់ស្កាត់ទិន្នផល ៕
ចែករំលែកព័តមាននេះ