លោកប្ដីហេងស៊យធ្វើបាបប្រពន្ធ រួចលួចទ្រព្យសម្បត្តិគេចខ្លួនបាត់ទៀត
រាជធានីភ្នំពេញ ៖ ស្ត្រីម្នាក់បានដាក់ពាក្យបណ្ដឹងសុំឲ្យនគរបាលប៉ុស្ដិ៍ចោមចៅជួយចាត់ការប្ដីរបស់ខ្លួនទៅតាមច្បាប់ ដោយនាងបានចោទប្រកាន់បុរសជាប្ដីនោះថា
រាជធានីភ្នំពេញ ៖ ស្ត្រីម្នាក់បានដាក់ពាក្យបណ្ដឹងសុំឲ្យនគរបាលប៉ុស្ដិ៍ចោមចៅជួយចាត់ការប្ដីរបស់ខ្លួនទៅតាមច្បាប់ ដោយនាងបានចោទប្រកាន់បុរសជាប្ដីនោះថា បានប្រើអំពើហិង្សាវាយធ្វើបាបនាងជាញឹកញាប់ ហើយកន្លងមកគ្រាន់តែទៅដាក់ពាក្យបណ្ដឹង នៅប៉ុស្ដិ៍ចោមចៅរាប់ដងមិនអស់ទៅហើយ។ ប៉ុន្តែអ្វីដែលនាងទៅដាក់ពាក្យបណ្ដឹងជាចុងក្រោយទៀតនេះ គឺនៅពេលដឹងថានាងប្ដឹងពីការប្រើហិង្សាស្រាប់តែប្ដីគម្រក់ម្នាក់នោះ លួចយកទ្រព្យសម្បត្តិលុយកាក់ និងគ្រឿងអលង្ការ មាស ដែលនាងមានទាំងប៉ុន្មាន រួចគេចខ្លួនបាត់ស្រមោលតែម្ដង។
ស្ត្រីខាងលើបានទៅកាន់ប៉ុស្ដិ៍នគរបាលចោមចៅ កាលពីវេលាម៉ោង៣និង១៥នាទី រសៀលថ្ងៃទី២៩ ខែមីនា ឆ្នាំ២០១៧ ដើម្បីឲ្យនគរបាលជួយអន្តរាគមន៍ចាប់ខ្លួនប្ដីម្នាក់នោះចាត់ការតាមផ្លូវច្បាប់។ ស្ត្រីខាងលើនោះមានឈ្មោះ ម៉េង សុខឃាង អាយុ៣៨ឆ្នាំ មុខរបរកម្មការិនីរោងចក្រកាត់ដេរ មានទីលំនៅក្នុងភូមិព្រៃសណ្ដែក សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។ចំណែកប្ដីហេងស៊យឈ្មោះ យឿន សំអឿន អាយុ៣៦ឆ្នាំ ស្នាក់នៅជាមួយគ្នាក្នុងភូមិខាងលើ។
ស្ត្រីរូបនោះបានរៀបរាប់ប្រាប់នគរបាលថា ប្ដីរបស់នាងបានរករឿងប្រើហិង្សា វាយធ្វើបាបនាងជាបន្តបន្ទាប់ គ្មានមូលហេតុ ហើយកាលពីថ្ងៃទី២៨ ខែមីនា ឆ្នាំ២០១៧ ខណៈដែលនាងចេញទៅធ្វើការបាត់ លោកប្ដីម្នាក់នោះបានរើកកាយ លួចយកទ្រព្យសម្បត្តិនៅក្នុងផ្ទះ ព្រមទាំងលុយចំនួន៧០០ដុល្លារ និងគ្រឿងអលង្ការមាសចំនួនជាង២តម្លឹង បន្ទាប់មកបានគេចខ្លួនទៅបាត់ស្រមោល។ ដោយសារតែបែបនេះហើយ ទើបនាងមិនអាចអត់ឱនឲ្យបានឡើយ និងបានធ្វើដំណើរទៅដាក់ពាក្យបណ្ដឹង សុំឲ្យនគរបានប៉ុស្ដិ៍ចោមចៅ ជួយអន្តរាគមន៍ស្វែងរកចាប់ខ្លួនប្ដីនាងចាត់ការតាមច្បាប់។
នគរបាលបាននិយាយថា ប្ដីប្រពន្ធមួយគូខាងលើនោះ បានឈ្លោះប្រកែកគ្នា និងឈានដល់ប្ដីប្រើហិង្សាវាយធ្វើបាបប្រពន្ធជាបន្តបន្ទាប់ ហើយគ្រាន់តែទៅដាក់ពាក្យបណ្ដឹងដោះស្រាយគ្នារឿងហិង្សានោះ៣ទៅ៤ដង មកហើយគឺមានរឿងរកាំរកូសមិនឈប់ឈរឡើយ រហូតអ្នកភូមិលាន់មាត់គ្រប់គ្នាថា ចុះគ្រួសារមួយនឹងហេតុម៉េចបានចេះតែឈ្លោះប្រកែកគ្នានិងវាយដំច្រំធាក់គ្នារហូតបែបនេះ។
ចំណែកនគរបាលក៏ឈឺក្បាល ជាមួយនឹងពួកគាត់មិនតិចដែរ ព្រោះតែងាកប្ដឹងៗរហូតយ៉ាងនេះ ហើយពេលចុងក្រោយនេះ បន្ទាប់ពីដឹងថា ស្ត្រីជាប្រពន្ធប្ដឹង ហើយនគរបាលមិនទាន់បានហៅឲ្យចូលខ្លួនដោះស្រាយគ្នាផង ស្រាប់តែបុរសជាប្ដីនោះ បានរើកកាយលួចយកទ្រព្យសម្បត្តិខាងលើ ខណៈដែលប្រពន្ធចេញទៅធ្វើការបាត់។ លុះត្រឡប់មកដល់ផ្ទះវិញស្រាប់តែបាត់ទាំងប្ដី និងទ្រព្យសម្បត្តិទើបធ្វើដំណើរទៅដាក់ពាក្យបណ្ដឹងជាថ្មីម្ដងទៀតសុំឲ្យជួយចាត់ការលើប្ដីនោះតាមច្បាប់៕
ចែករំលែកព័តមាននេះ