លើកគ្នាមកទាមទារសំណង បន្ទាប់ពីចូលផឹកស៊ីច្រៀងខារ៉ាអូខេបាត់ម៉ូតូកង់បី
រាជធានីភ្នំពេញ ៖ អ្នករត់រ៉ឺម៉កកង់បីមួយក្រុមប្រមាណជាង៣០នាក់ បានលើកគ្នាមកមុខភោជនីយដ្ឋាន ឈីកាហ្គោ ដើម្បីទាមទារឲ្យម្ចាស់ភោជនីយដ្ឋាន
រាជធានីភ្នំពេញ ៖ អ្នករត់រ៉ឺម៉កកង់បីមួយក្រុមប្រមាណជាង៣០នាក់ បានលើកគ្នាមកមុខភោជនីយដ្ឋាន ឈីកាហ្គោ ដើម្បីទាមទារឲ្យម្ចាស់ភោជនីយដ្ឋាន ទទួលខុសត្រូវ បន្ទាប់ពីពួកគេនាំគ្នាប្រមាណ៧នាក់ចូលផឹកស៊ី និងច្រៀងខារ៉ាអូខេសប្បាយតាំងពីក្បាលព្រលប់ រហូតដល់ម៉ោងប្រមាណ២រំលងអាធ្រាត្រ ពេលចេញមកវិញចោរលួចម៉ូតូកង់៣បាត់។ ហេតុការណ៍នេះបង្កឲ្យមានការភ្ញាក់ផ្អើលកាលពីវេលាម៉ោងប្រមាណ៩ព្រឹក ថ្ងៃទី២៨ ខែមីនា ឆ្នាំ២០១៧ នៅមុខហាង ដែលស្ថិតនៅផ្លូវ១០១៩(ផ្លូវភ្នំពេញហាណូយ) ក្នុងភូមិភ្នំពេញថ្មី សង្កាត់ភ្នំពេញថ្មី ខណ្ឌសែនសុខ។
ម្ចាស់ម៉ូតូកង់៣ដែលបាត់នោះឈ្មោះ ថន ថេង អាយុ៣៦ឆ្នាំ ស្នាក់នៅផ្ទះជួលភូមិចុងថ្នល់ខាងលិច សង្កាត់ទឹកថ្លា ខណ្ឌសែនសុខ និងមានស្រុកកំណើតភូមិព្រែកកក់ ឃុំព្រែកបាក់ ស្រុកស្ទឹងត្រង់ ខេត្តកំពង់ចាម។ តាមសម្ដីអ្នកបើកកង់បីបានឲ្យដឹងថា កាលពីវេលាក្បាលព្រលប់ ថ្ងៃទី២៧ ខែមីនា ខ្លួន និងមិត្តទាំងអស់៧នាក់ បាននាំគ្នាចូលផឹកស៊ី នៅក្នុងភោជនីយដ្ឋាននេះ។ ក្រោយមកខ្លួន និងមិត្តភក្កិ៣នាក់ក៏បានចូលទៅច្រៀងនៅក្នុង នៅសល់៤នាក់ផឹកនៅខាងក្រៅ។
នៅយប់នោះខ្លួនបានច្រៀងលេងរហូតដល់ម៉ោងប្រមាណ២រំលងអាធ្រាត្រ ចេញមកវិញស្រាប់តែចោរលួចម៉ូតូកង់៣បាត់។ នៅពេលបាត់ម៉ូតូ ខ្លួនទាមទារឲ្យម្ចាស់ហាងទទួលខុសត្រូវ សងការបាត់បង់តែម្ចាស់មិនព្រម។ តាមព័ត៌មានឲ្យដឹងថា ដោយសារតែម្ចាស់ហាងមិនទទួលខុសត្រូវ ទើបព្រឹកឡើងអ្នករត់ម៉ូតូកង់ក៏បានលើកគ្នាមកមុខហាង បង្កឲ្យមានការភ្ញាក់ផ្អើលទាំងព្រឹក។ តាមសម្ដីឈ្មោះ ប៊ុត សំណាង អាយុ៤១ឆ្នាំ ដែលជាសន្តិសុខយាមម៉ូតូ បានឲ្យដឹងថា នៅយប់នោះអ្នករត់ម៉ូតូបាននាំគ្នាមកផឹកស៊ីដោយទុកម៉ូតូកង់៣ នៅតាមចិញ្ចើមផ្លូវក្បែរហាង មិនបានផ្ញើនោះទេ នៅពេលដែលចេញពីច្រៀងវិញបាត់ម៉ូតូតែម្តង។
តាមសម្ដីឈ្មោះ ហង់ វៃ អាយុ៣៨ឆ្នាំ ជាតំណាងឲ្យម្ចាស់ហាងបានឲ្យដឹងថា ការលើកគ្នាមកទាមទារឲ្យម្ចាស់ហាងទទួលខុសត្រូវចំពោះការបាត់បង់នោះ គាត់មិនអាចទទួលយកបាននោះទេ ព្រោះម៉ូតូកង់បីនោះ មិនមានសំបុត្រផ្ញើ ហើយទុកក្រៅតំបន់របស់គាត់គ្រប់គ្រង។ នៅព្រឹកនោះសមត្ថកិច្ចមូលដ្ឋានក៏បានចុះទៅអន្តរាគមន៍ ហើយ ណែនាំឲ្យតំណាងម្ចាស់ហាង និងម្ចាស់ម៉ូតូកង់បីទៅជួបដោះស្រាយគ្នានៅអធិការដ្ឋាន ខណ្ឌសែនសុខ។ តាមព័ត៌មានឲ្យដឹងថា នៅព្រឹកនោះសន្តិសុខ បានចេញមុខទទួលខុសត្រូវ ដោយឲ្យ១ពាន់ដុល្លារ តែម្ចាស់ម៉ូតូកង់៣ទាមទារសំណង់២ពាន់ដុល្លារ មិនទាន់ត្រូវគ្នានៅឡើយ៕
ចែករំលែកព័តមាននេះ