ផលប៉ះពាល់របស់ថ្នាំផ្សះដែលលោកអ្នកគួរតែដឹង
ថ្នាំផ្សះតែងតែជួយសង្គ្រោះជីវិតរបស់យើងពេលដែលថ្នាំផ្សេងទៀតគ្មានប្រសិទ្ធភាព ។ ជាអកុសលការប្រើប្រាស់វាមិនមែនគ្មានផលប៉ះពាល់នោះទេ គឺមានផលប៉ះពាល់ខ្លះធ្ងន់រហូតដល់យើង
ថ្នាំផ្សះតែងតែជួយសង្គ្រោះជីវិតរបស់យើងពេលដែលថ្នាំផ្សេងទៀតគ្មានប្រសិទ្ធភាព ។ ជាអកុសលការប្រើប្រាស់វាមិនមែនគ្មានផលប៉ះពាល់នោះទេ គឺមានផលប៉ះពាល់ខ្លះធ្ងន់រហូតដល់យើងត្រូវយកចិត្តទុកដាក់ ។ ខណៈពេលដែលផលប៉ះពាល់ដូចជាចង់ក្អួត ឬធ្មេញឡើងលឿង មិនមែនជាការព្រួយបារម្ភខ្លាំងដល់យើងទេ ប៉ុន្តែផលប៉ះពាល់រយៈពេលវែងទៅលើប្រព័ន្ធភាពស៊ាំរបស់អ្នក ឬឱកាសនៃការវិវឌ្ឍទៅជាការស៊ាំនឹងថ្នាំផ្សះគឺជាផលប៉ះពាល់ដែលយើងត្រូវពិចារណាឲ្យបានល្អិតល្អន់ ។
ខាងក្រោមនេះគឺជាផលប៉ះពាល់នៃការប្រើប្រាស់ថ្នាំផ្សះដែលអ្នកគួរតែដឹង និងត្រូវរកវិធីចៀសវាង ៖
១-បញ្ហាប្រព័ន្ធរំលាយអាហារ
យោងតាមស្ថាប័នសុខភាពជាតិរបស់ប្រទេសអង់គ្លេស មនុស្សម្នាក់ក្នុងចំណោម១០នាក់ដែលលេបថ្នាំផ្សះអាចបង្កបញ្ហាដល់ប្រព័ន្ធរំលាយអាហារ ។ ផលប៉ះពាល់ទាំងនេះរួមមានចង្អោរ ក្អួត រាក អាហារមិនរលាយ និងហើមពោះ ។ ការមិនឃ្លានអាហារអាចជាផលប៉ះពាល់មួយផ្សេងទៀត ។
២-ប៉ះពាល់លើប្រព័ន្ធភាពស៊ាំ
បញ្ហាមួយនៃការប្រើប្រាស់ថ្នាំផ្សះដែលមានការផ្តោតអារម្មណ៍នៅក្នុងរយៈពេលប៉ុន្មានឆ្នាំចុងក្រោយនេះ គឺផលប៉ះពាល់នៃថ្នាំនេះទៅលើតុល្យភាពនៃបាក់តេរី តូចៗនៅក្នុងពោះវៀន ។ ប្រព័ន្ធភាពស៊ាំរបស់អ្នកពឹងផ្អែកយ៉ាងខ្លាំងលើតុល្យភាពរវាងបាក់តេរីល្អ និងអតិសុខុមប្រាណដែលបង្កឱ្យមានជំងឺ ។ នៅក្នុងពោះវៀនដែលមានសុខភាពល្អ បាក់តេរីល្អមានចំនួនច្រើនជាងបាក់តេរីអាក្រក់ដែលធ្វើឱ្យរាងកាយអាចប្រយុទ្ធប្រឆាំងនឹងការឆ្លងមេរោគ ។ ទោះជាយ៉ាងណា ការប្រើប្រាស់ថ្នាំផ្សះមិនត្រឹមត្រូវ ឬយូរអាចធ្វើឲ្យបាត់បង់តុល្យភាពនេះ ដោយថ្នាំនេះទៅសម្លាប់បាក់តេរីល្អរួមជាមួយបាក់តេរីអាក្រក់ និងធ្វើឱ្យអ្នកងាយនឹងឆ្លងមេរោគ ។
៣-ហានិភ័យនៃការកើតជំងឺទឹកនោមផ្អែមប្រភេទ១
ក្រុមអ្នកសិក្សាស្រាវជ្រាវជឿថា វាអាចនឹងមានការទាក់ទងរវាងការប្រើថ្នាំផ្សះ និងជំងឺទឹកនោមផ្អែមនេះ ។
៣-ការឆ្លងមេរោគផ្សិតលើទ្វារមាស
ថ្នាំផ្សះមិនត្រឹមប៉ះពាល់ដល់តុល្យភាពនៃបាក់តេរីក្នុងពោះវៀនប៉ុណ្ណោះទេ វាក៏រំខានដល់តុល្យភាពនៃបាក់តេរីក្នុងទ្វារមាសផងដែរ ។ វាអាចអនុញ្ញាតឱ្យប្រភេទផ្សិតមួយចំនួនដូចជាពពួកផ្សិត Candida albicans (ជាធម្មតាមានបរិមាណតិចតូចខ្លាំងណាស់នៅក្នុងតំបន់នេះ) អាចលូតលាស់នៅកន្លែងដែលមានបាក់តេរីល្អតិច ដើម្បីប្រកួតប្រជែងជាមួយនឹងលទ្ធផលនៃការទទួលទានថ្នាំផ្សះ ។
៤-ការស៊ាំនឹងថ្នាំផ្សះ
ការប្រើប្រាស់ថ្នាំផ្សះហួសហេតុ ឬការប្រើប្រាស់មិនត្រឹមត្រូវអាចបណ្តាលឲ្យមានភាពស៊ាំនឹងថ្នាំផ្សះ ដែលវាជាបញ្ហាធ្វើឲ្យសហគមន៍វេជ្ជសាស្ត្រសាកលកំពុងព្រួយបារម្ភ ។ លទ្ធផលនៃការស៊ាំនឹងថ្នាំផ្សះរបស់បាក់តេរីបានក្លាយទៅជាបញ្ហាកាន់តែលំបាក និងមានតម្លៃថ្លៃក្នុងការសម្លាប់ពួកវា ឬយកឈ្នះពួកវា ដោយសារបាក់តេរីទាំងនេះអាចទប់ទល់នឹងសកម្មភាពរបស់ថ្នាំ ឬកាត់បន្ថយប្រសិទ្ធភាពរបស់ថ្នាំ ។ វាអាចធ្វើឲ្យអ្នកពិការរយៈពេលវែង ឬស្លាប់ ៕
ចែករំលែកព័តមាននេះ