ប្រទេសថៃ ៖ ថៃ និងមីយ៉ាន់ម៉ាមានបំណងសម្រេចនូវពាណិជ្ជកម្មឆ្លងដែនឆ្នាំ២០២១ ស្មើទឹកប្រាក់ជាង២០ប៊ីលានដុល្លារអាមេរិក (៦៩០ប៊ីលានបាត) និងច្រើនជាងគោលដៅឆ្នាំនេះ៣ដង ដែលស្មើតែ៦
ប្រទេសថៃ ៖ ថៃ និងមីយ៉ាន់ម៉ាមានបំណងសម្រេចនូវពាណិជ្ជកម្មឆ្លងដែនឆ្នាំ២០២១ ស្មើទឹកប្រាក់ជាង២០ប៊ីលានដុល្លារអាមេរិក (៦៩០ប៊ីលានបាត) និងច្រើនជាងគោលដៅឆ្នាំនេះ៣ដង ដែលស្មើតែ៦ប៊ីលានដុល្លារអាមេរិក។
គោលដៅនេះត្រូវបានដាក់បង្ហាញក្នុងកិច្ចប្រជុំមួយរបស់រដ្ឋាភិបាល និងក្រុមហ៊ុនមកពីប្រទេសទាំងពីរនៅស្រុក Mae Sot ខេត្ត Tak កាលពីពេលថ្មីៗនេះ ។
រដ្ឋមន្ត្រីក្រសួងពាណិជ្ជកម្ម លោកស្រី Apiradi Tantraporn ឲ្យដឹងថា គោលដៅទ្វេភាគីនេះបានឆ្លុះបញ្ចាំងពីការកើនឡើងនៃតម្លៃពាណិជ្ជកម្មតាមព្រំដែនរវាងថៃ និងប្រទេសជិតខាងរបស់ខ្លួនដែលគេរំពឹងថា នឹងកើនឡើង២២% ឬស្មើនឹង១,៨ទ្រីលានបាត ពីចំនួន១,៤៧ទ្រីលានបាតឆ្នាំមុន ។
នៅឆ្នាំ២០១៦ ការធ្វើពាណិជ្ជកម្មជាមួយប្រទេសមីយ៉ាន់ម៉ា ស្មើទឹកប្រាក់ចំនួន១៨៧,៩៦ប៊ីលានបាត ក្នុងនោះ១០៩,៣៣ប៊ីលានបាតបានពីការនាំចេញភេសជ្ជៈជាតិអាល់កុល និងគ្មានជាតិអាល់កុល និងស្កររបស់ថៃ ។ ថៃបាននាំចូលទំនិញពីប្រទេសជិតខាងភាគខាងលិចរបស់ខ្លួន គិតជាទឹកប្រាក់ស្មើ៧៨,៦២ប៊ីលានបាត រួមមាន ឧស្ម័នធម្មជាតិ ផលិតផលនេសាទ និងសាច់ជ្រូកជាដើម ។
ក្នុងចំណោមប្រាក់ចំនួន១៨៧,៩៦ប៊ីលានបាតនេះ ក្នុងនោះ៨០,៦៩ប៊ីលានបាត គឺទទួលបានពីច្រកព្រំដែន Mae Sot ។
ដោយមានការលើកទឹកចិត្តផ្នែកពាណិជ្ជកម្មយ៉ាងខ្លាំងនៅច្រកព្រំដែន Mae Sot-Myawaddy មន្ត្រីក្រសួងពាណិជ្ជកម្មថៃ និងក្រសួងផែនការ និងហិរញ្ញវត្ថុមីយ៉ាន់ម៉ា បានចូលរួមជាមួយក្រុមហ៊ុនអាជីវកម្មក្នុងកិច្ចប្រជុំដើម្បីបង្កើតគំរូ Mae Sot-Myawaddy ។ វានឹងក្លាយជាគម្រោងសាកល្បងមួយសម្រាប់ការធ្វើពាណិជ្ជកម្មពង្រីកព្រំដែនជាមួយប្រទេសជិតខាងផ្សេងទៀត ។
លោកស្រី Apiradi បន្តថា Mae Sot-Myawaddy គឺជាច្រកព្រំដែនសំខាន់បំផុតរវាងថៃ និងមីយ៉ាន់ម៉ា ។ វាក៏ជាគំរូសម្រាប់លើកកម្ពស់ការធ្វើពាណិជ្ជកម្មនៅតាមច្រកផ្សេងទៀត។ ការផ្សព្វផ្សាយពាណិជ្ជកម្មទ្វេភាគីមានចំណងជើងថា Stronger Together បានចាប់ផ្តើមនៅ Mae Sot កាលពីថ្ងៃអង្គារ នឹងបន្តរហូតដល់ថ្ងៃអង្គារក្រោយ។
ព្រឹត្តិការណ៍នេះបញ្ជាក់ថា ច្រកព្រំដែន Mae Sot-Myawaddy ជាមជ្ឈមណ្ឌលសម្រាប់ធ្វើពាណិជ្ជកម្មគ្រឿងអលង្ការ ទេសចរណ៍ និងពាណិជ្ជកម្មទំនិញដូចជាថ្នាំ ។ ប្រទេសទាំងពីរនឹងលើកកម្ពស់ការឆ្លងកាត់តាមច្រករបៀងនេះ ដោយត្រួតពិនិត្យតែ១លើក ។
Tak ស្ថិតនៅក្នុងតំបន់សេដ្ឋកិច្ចពិសេស នឹងជំរុញការវិនិយោគរវាងប្រទេសថៃ និងមីយ៉ាន់ម៉ា នៅក្រោមច្រករបៀងសេដ្ឋកិច្ចខាងកើត និងលិច ។ គម្រោងនេះក៏នឹងពង្រីកទៅកាន់ប្រទេសវៀតណាមផងដែរ ៕
ចែករំលែកព័តមាននេះ