ប្រទេសជប៉ុន ៖ ក្រសួងហិរញ្ញវត្ថុជប៉ុនបានឲ្យដឹងកាលពីថ្ងៃពុធសប្ដាហ៍មុនថា ខ្លួនទទួលបានផលលើសពាណិជ្ជកម្មប្រមាណ៨១៣,៤ប៊ីលានយេន ឬ៧,២៩ប៊ីលានដុល្លារក្នុងខែកុម្ភៈ ដែលជាកម្រិតមួយខ្ពស់ជាងគេក្នុងរយៈពេល៧ឆ្នាំកន្លងមកនេះ ខណៈការនាំចេញទៅកាន់ប្រទេសចិនលូតលាស់យ៉ាងរឹងមាំ ។
ការកើនឡើងយ៉ាងច្រើននូវការនាំចេញគ្រឿងរថយន្តទៅកាន់ប្រទេសចិន និងឧបករណ៍អេឡិចត្រូនិកទៅកាន់ហុងកុង បានជួយឲ្យការនាំចេញកើនឡើង១១,៣%បើធៀបនឹងឆ្នាំមុន មកត្រឹម៦,៣៥ទ្រីលានយេន ដែលជាការកើនឡើង៣ខែជាប់ៗគ្នាមកហើយ ។
ក្រសួងខាងលើបាននិយាយក្នុងសេចក្តីរាយការណ៍មួយថា ការនាំចូលបានកើនឡើង ១,២%បើធៀបនឹងឆ្នាំមុន មកត្រឹម៥,៥៣ទ្រីលានយេន ខណៈការនាំចូលប្រេងឆៅកើនឡើង។
ផលលើសពាណិជ្ជកម្មក្នុងខែមុននេះ គឺជាកម្រិតខ្ពស់ជាងគេតាំងពីខែមីនា ឆ្នាំ២០១០មក ដែលស្មើនឹង៩៣១,៩ប៊ីលានយេន ។
ជប៉ុនទទួលបានផលលើសពាណិជ្ជកម្មដំបូងបង្អស់ជាមួយប្រទេសចិន តាំងពីខែកុម្ភៈ ឆ្នាំ២០១២ ។ ការនាំចេញកើនឡើង២៨,២% មកត្រឹម១,២០ទ្រីលានយេន ខណៈការនាំចូលធ្លាក់ចុះ១៧,៧% មកត្រឹម១,០៨ទ្រីលានយេន ។
តាមមន្ត្រីក្នុងក្រសួងខាងលើឲ្យដឹងថា ការនាំចេញក្នុងខែកុម្ភៈ បានឆ្លុះបញ្ចាំងពីផលប៉ះពាល់ពីបុណ្យចូលឆ្នាំចិន ដែលចាប់ផ្តើមនៅចុងខែកុម្ភៈ ។
ការនាំចេញទៅកាន់ប្រទេសចិនតែងតែធ្លាក់ចុះក្នុងអំឡុងពេលបុណ្យជាតិ ។ ក្នុងខែមករា ការនាំចូលបានកើនច្រើនជាងការនាំចេញ ធ្វើឲ្យប្រទេសមានឱនភាពពាណិជ្ជកម្មដំបូងគេក្នុងរយៈពេល៥ខែមកនេះ ស្មើនឹង១,០៩ទ្រីលានយេន ខណៈការនាំចូលពីប្រទេសចិនកើនឡើង៧,២% និងពីសហរដ្ឋអាមេរិកកើនឡើង ១១,៩% ។
ក្នុងខែកុម្ភៈ ប្រទេសជប៉ុនមានផលលើសពាណិជ្ជកម្មជាមួយសហរដ្ឋអាមេរិក ស្មើនឹង ៦១១,២៧បីលានយេន ។ ការនាំចេញបានកើនឡើង០,៤%បើធៀបនឹងឆ្នាំមុន មកត្រឹម ១,២២ទ្រីលានយេន ដោយសារការនាំចេញគ្រឿងរថយន្ត និងរថយន្ត ។ រីឯការនាំចូលធ្លាក់ចុះ០,៧% មកត្រឹម៦១១,៩០ប៊ីលានយេន ។
បើទោះជាការនាំចេញងើបឡើងវិញបានជំរុញដល់សេដ្ឋកិច្ចក្នុងរយៈពេលប៉ុន្មានខែថ្មីៗនេះក្តី ប៉ុន្តែតម្រូវការក្នុងស្រុកនៅតែទន់ខ្សោយ ។
ភាពមិនប្រាកដប្រជានៃគោលនយោបាយសេដ្ឋកិច្ច និងពាណិជ្ជកម្មរបស់លោកប្រធានាធិបតីអាមេរិក Donald Trump បានបន្ថែមភាពមិនច្បាស់លាស់ដល់អនាគតប្រទេសជប៉ុនថែមទៀត ។ កាលពីមុន លោក Trump ក៏បានលើកឡើងពីឱនភាពពាណិជ្ជកម្មរវាងប្រទេសដទៃផងដែរ ដូចជា ចិន និងជប៉ុន ។
លោក Toru Suehiro ឧត្តមសេដ្ឋវិទូផ្នែកទីផ្សារក្នុង Mizuho Securities Co. និយាយថា ៖ « ពួកយើងត្រូវការមើលទិន្នន័យបន្ថែមទៀតក្នុងខែមីនា ប៉ុន្តែយើងអាចនិយាយបានថា និន្នាការនាំចេញងើបឡើងវិញកំពុងតែបន្ត » ។
លោកបន្តថា ៖ « ខ្ញុំមិនគិតថា ការលូតលាស់នៃការនាំចេញនឹងបន្តក្នុងល្បឿននេះទេ»។ លោកកត់សម្គាល់ថា គួរតែប្រុងប្រយ័ត្ន និងព្យាករថា ទីផ្សារយានយន្តក្នុងប្រទេសចិន និងសហរដ្ឋអាមេរិកនឹងអន់ថយ ។
ការនាំចេញពីប្រទេសជប៉ុនទៅកាន់សហភាពអឺរ៉ុប បានកើនឡើង៣,៣% មកត្រឹម ៧០០,៥៨ប៊ីលានយេន ខណៈការនាំចូលធ្លាក់ចុះ៧,៥% មកត្រឹម៦៥៩,៤៥ប៊ីលានយេន៕
ចែករំលែកព័តមាននេះ