វិធីការពារជំងឺពងបែកដៃជើងនិងមាត់
ជំងឺEV-71 មិនមែនជាជំងឺថ្មីនៅកម្ពុជាយើងទេ គឺជាជំងឺដែលកើតមាននៅប្រទេសជាច្រើនលើពិភពលោក ហើយអ្នកដែលប្រឈមទៅនឹងជំងឺនោះ គឺកុមារអាយុក្រោម១០ឆ្នាំ ។ ភាគច្រើនកុមារ តូចៗងាយនឹង
ជំងឺEV-71 មិនមែនជាជំងឺថ្មីនៅកម្ពុជាយើងទេ គឺជាជំងឺដែលកើតមាននៅប្រទេសជាច្រើនលើពិភពលោក ហើយអ្នកដែលប្រឈមទៅនឹងជំងឺនោះ គឺកុមារអាយុក្រោម១០ឆ្នាំ ។ ភាគច្រើនកុមារ តូចៗងាយនឹងមានរោគសញ្ញាធ្ងន់ ចំពោះមនុស្សពេញវ័យក៏អាចកើតមជំងឺនេះផងដែរ ប៉ុន្តែកម្រណាស់ ។
ជំងឺEV-71 គឺជាជំងឺពងបែកនៅដៃជើង និងក្នុងមាត់ គឺជាជំងឺឆ្លងដែលកើតចំពោះទារក និងកុមារ ។ ជំងឺនេះច្រើនកើតឡើងនៅលើកុមារ ពិសេសអ្នកនៅតាមបណ្តាខេត្តបានយកកូនទៅព្យាបាលនៅមន្ទីរពេទ្យគន្ធបុប្ផាកាលពីពេលថ្មីៗកន្លងមក ។ ហេតុដូច្នេះឪពុកម្តាយ និងអាណាព្យាបាលកុមារទាំងអស់ត្រូវប្រុងប្រយ័ត្នខ្ពស់លើការបង្ការ និងរកការព្យាបាលជាបន្ទាន់ នៅមន្ទីរពេទ្យ និងមណ្ឌលសុខភាពនៅជិតបំផុត ដើម្បីទទួលការព្យាបាលសមស្រប ជាពិសេសកុមារដែលមានរោគសញ្ញាគ្រោះថ្នាក់ត្រូវបញ្ជូនទៅមន្ទីរពេទ្យឯកទេសកុមារជាបន្ទាន់ ។
រោគសញ្ញាដំបូងនៃជំងឺពងបែកដៃជើង និងក្នុងមាត់មានដូចជា៖
-ទារក ឬកុមារអាចមានអាការក្តៅខ្លួន
-ការហូបចុកថយចុះ
-អស់កម្លាំង
-ឈឺបំពង់ក
-ស្បែកមានរមាស់ចាប់ផ្តើមចេញក្នុងអំឡុងពេលមួយទៅពីរថ្ងៃ ដោយមានស្នាមក្រហម អុជៗ និងខ្លះមានពងបែកនៅលើបាតដៃ បាតជើង និងពេលខ្លះលើគូទ ឬអវយវៈភេទ ។
កុមារដែលកើតជំងឺនេះ ករណីស្រាលអាចនឹងជាសះស្បើយក្នុងរយៈពេលពី៧ទៅ១០ថ្ងៃ ប៉ុន្តែមានកុមារមួយចំនួនអាចវិវឌ្ឍទៅជាធ្ងន់ដោយមានរោគសញ្ញាគ្រុនក្តៅ និងសញ្ញាប្រព័ន្ធប្រសាទដូចជាក្អួត សន្លឹម ប្រកាច់ ឬរឹងដៃជើង ឬមានសញ្ញាផ្លូវដង្ហើម ពិបាកដកដង្ហើម ត្រូវបញ្ជូនទៅព្យាបាលនៅមន្ទីរពេទ្យជាបន្ទាន់ ។
ដើម្បីចៀសផុតពីជំងឺនេះលោកអ្នកត្រូវលាងដៃឲ្យបានញឹកញាប់ជាមួយសាប៊ូ និងទឹក ជាពិសេសបន្ទាប់ពីប៉ះពងបែក ឬដំបៅ មុនរៀប ចំអាហារ និងបរិភោគ មុនបញ្ចុកអាហារដល់កុមារ បន្ទាប់ពីបន្ទោបង់រួច និងបន្ទាប់ពីលាងសំអាត ឬងូតទឹកឲ្យកុមារដែលមានជំងឺ ។ អ្វីដែលសំខាន់បំផុតនៅពេលដែលមានការសង្ស័យថា កូនលោកអ្នកកើតជំងឺនេះ ត្រូវតែនាំទៅជួបជាមួយគ្រូពេទ្យដើម្បីព្យាបាលឲ្យបានត្រឹមត្រូវ ។
បច្ចុប្បន្ននេះមិនមានការព្យាបាលជាក់លាក់ណាមួយសម្រាប់ជំងឺEW71 នៅឡើយទេ ដូច្នេះនៅពេលកើតជំងឺនេះគួរតែបរិភោគទឹកឱ្យបានច្រើន ។ អ្នកជំងឺអាចត្រូវការថ្នាំបញ្ចុះកម្ដៅ និងថ្នាំបំបាត់ការឈឺចាប់ដែលបណ្តាលពីពងបែក និងមិនត្រូវប្រើប្រាស់ថ្នាំអាស្ពីរីនដើម្បីបញ្ចុះកម្ដៅទេ ៕
ចែករំលែកព័តមាននេះ