នៅលើដងផ្លូវ គេច្រើនឃើញមានអ្នកបើកបរផង និយាយទូរស័ព្ទផង។ ចំណែកអ្នកខ្លះទៀតនោះ ពេលឈប់ស្តុបម្តងៗនាំគ្នាចុចទូរស័ព្ទលេងហ្វេសប៊ុកថែមទៀតផង។ តើពួកគេសមនឹងទទួលខុសត្រូវចំពោះមុខច្បាស់ដែរឬទេ?
ច្បាប់ស្តីពីចរាចរណ៍ផ្លូវគោក ឆ្នាំ២០១៥ នៅមាត្រា៨ ចំណុចទី៦ បានចែងថា «ហាមប្រើទូរស័ព្ទនៅពេលកំពុងបើកបរយានជំនិះ ដោយគ្មានឧបករណ៍សំឡេងភ្ជាប់ទំនាក់ទំនង»។ ក៏ប៉ុន្តែនៅលើដងផ្លូវសព្វថ្ងៃ ពិសេសនៅពេលកកស្ទះចរាចរណ៍មិនថា អ្នកបើកបរឡាន ឬក៏អ្នកបើកបរម៉ូតូទេ គឺមួយចំនួនធំបានប្រើប្រាស់ទូរស័ព្ទដៃ។ ការប្រើប្រាស់ទូរស័ព្ទនោះទៀតសោត គឺមិនត្រឹមតែសម្រាប់និយាយប៉ុណ្ណោះទេ ថែមទាំងប្រើប្រាស់ចុចលេងហ្វេសប៊ុកថែមទៀត។
ជាការពិតមិនថា អ្នកបើកបរឡាន ឬម៉ូតូទេ នៅពេលលើកចុចមើលទូរស័ព្ទនិយាយ ឬក៏លេងហ្វេសប៊ុក មើលសារផ្សេងៗ គឺអាចនឹងបង្កគ្រោះថ្នាក់ ជាយថាហេតុ ដោយនឹកស្មានមិនដល់។ ជួនកាលរវល់តែអោនឈ្ងោកៗចុចមើលទូរស័ព្ទ ក៏ជ្រុលទៅបុកគេនៅខាងមុខក៏មាន។ បើមិនបុកគេទេ ក៏រំខានដល់អ្នកបើកបរនៅពីក្រោយ ព្រោះនៅពេលចុចមើលទូរស័ព្ទ ឬក៏និយាយទូរស័ព្ទក្នុងពេលបើកបរ អ្នកនោះត្រូវបង្អង់ល្បឿន ស្តាំមិនចំស្តាំ ហើយបើកខាងឆ្វេងក៏មិនចំខាងឆ្វេង។
តាមផ្លូវសព្វថ្ងៃ ពិសេសនៅភ្នំពេញ គេឃើញអ្នកបើកបរយានយន្តមួយចំនួនពិសេសអ្នកបើកឡានជាក្រុមយុវវ័យបានចុចលេង ឬប្រើទូរស័ព្ទនៅពេលផ្លូវកកស្ទះចរាចរណ៍។ អ្នកបើកបរខ្លះថា ពេលកកស្ទះចរាចរណ៍ អត់សុខក៏ទាញទូរស័ព្ទដៃទំនើប Smart Phone របស់ខ្លួនមកចុចមើលហ្វេសប៊ុកបណ្តើរ ដើម្បីកុំឲ្យធុញទ្រាន់ពេក។
ក៏ប៉ុន្តែពេលខ្លះ ការកម្សាន្តអារម្មណ៍នោះ ក៏ប្រែជាទៅបុកគូទឡានគេ កើតជារឿងរ៉ាវ ហើយបង្កការកកស្ទះកាន់តែខ្លាំង និងត្រូវចេញលុយសងថ្លៃជួសជុលឡានគេក៏មាន។ នេះយើងគិតគ្រាន់តែបុកឡាន ឬម៉ូតូ ចុះបើគ្រោះថ្នាក់ដល់មនុស្ស របួស ឬក៏ស្លាប់ តើអ្នកបើកបរនោះ ត្រូវទទួលខុសត្រូវធ្ងន់ធ្ងរបែបណា?
រីឯអ្នកបើកបរម៉ូតូវិញ សព្វថ្ងៃក៏មានមួយចំនួនចាប់ផ្តើមប្រើទូរស័ព្ទ និងលើកទូរស័ព្ទចុចលេងច្រើនដែរ នៅតាមផ្លូវ។ អ្នកជិះម៉ូតូប្រភេទនេះ គឺគ្រោះថ្នាក់ជាងឡានទៅទៀត។ ពេលខ្លះអាចបង្កគ្រោះថ្នាក់ដល់ខ្លួនឯងផង និងអ្នកដទៃផង ដោយសារតែរវល់តែដៃម្ខាងកាន់ទូរស័ព្ទ ហើយដៃម្ខាងកាន់ចង្កូត។ ជាងនេះទៅទៀត ក៏ប្រឈមនឹងចោរឆក់ទូរស័ព្ទថែមទៀត។ បាត់ទាំងទូរស័ព្ទ ដួលម៉ូតូ គ្រោះថ្នាក់ អាចនឹងដល់ជីវិតក៏អាចថាបាន។
បើចាំបាច់ណាស់ អ្នកបើកបរយានយន្តទាំងឡាន មិនថា ឡាន ឬម៉ូតូទេ បើត្រូវប្រើទូរស័ព្ទក្នុងការនិយាយគ្នា គឺត្រូវដាក់កាសត្រចៀក។ មិនអីចឹងទេ ត្រូវរកកន្លែងគួរសម អេបខាងស្តាំផ្លូវ ហើយនិយាយទូរស័ព្ទឲ្យចប់ ចាំបន្តដំណើរទៅមុខទៀត។
ច្បាប់បានកំណត់រួចហើយ តែអ្នកបើកបរមួយចំនួននៅតែល្មើស។ ដូច្នេះប៉ូលិសចរាចរណ៍ ក៏គួរតែរឹតបន្តឹង និងចាប់បង្ខំផាកពិន័យលើអ្នកបើកបរយានយន្តដែលប្រើប្រាស់ទូរស័ព្ទ ដូចអ្វីដែលប៉ូលិសចរាចរណ៍បានអនុវត្តសព្វថ្ងៃ លើការផាកពិន័យអ្នកបើកបរយានយន្ត មិនពាក់មួកសុវត្ថិភាព មិនពាក់ខ្សែក្រវ៉ាត់ ឬម៉ូតូមិនមានកញ្ចក់មើលក្រោយ ដូច្នោះដែរ៕
ចែករំលែកព័តមាននេះ