ប្រេស៊ីលផ្អាកដំណើរការរោងចក្រកែច្នៃសាច់ចំនួន33 ក្នុងចំណោម36
ប្រទេសប្រេស៊ីល ៖ JBS ជាក្រុមហ៊ុនកែច្នៃសាច់ធំបំផុតនៅលើពិភពលោក និយាយថា នឹងផ្អាកការផលិតសាច់គោនៅរោងចក្រចំនួន៣៣ ក្នុងចំណោម៣៦រោងចក្ររយៈពេល៣ថ្ងៃ ។
ប្រទេសប្រេស៊ីល ៖ JBS ជាក្រុមហ៊ុនកែច្នៃសាច់ធំបំផុតនៅលើពិភពលោក និយាយថា នឹងផ្អាកការផលិតសាច់គោនៅរោងចក្រចំនួន៣៣ ក្នុងចំណោម៣៦រោងចក្ររយៈពេល៣ថ្ងៃ ។
នៅក្នុងសេចក្តីថ្លែងការណ៍មួយ ក្រុមហ៊ុន JBS និយាយថា ការសម្រេចចិត្តនេះ គឺខណៈមានការបារម្ភពីការបិទព្រំដែនមិនទទួលយកសាច់របស់ប្រេស៊ីល ។
រឿងគួរឲ្យភ្ញាក់ផ្អើលនេះបានលេចឮថា សាច់នាំចេញពីប្រេស៊ីលមានផ្ទុកជាតិគីមី និងលក់ហួសកាលបរិច្ឆេទកំណត់ ។
រោងចក្រមួយក្នុងចំណោមរោងចក្រជាច្រើនរបស់ក្រុមហ៊ុន JBS ដែលជាកម្មសិទ្ធិរបស់ក្រុមហ៊ុនបុត្រសម្ព័ន្ធ Seara កំពុងស្ថិតក្រោមការស៊ើបអង្កេតរបស់ប៉ូលិស ។
នៅឆ្នាំ២០១៦ ប្រាក់ចំណូលរបស់ក្រុមហ៊ុន JBS Mercosur ចំនួន៤០% បានមកពីការនាំចេញ ស្មើនឹង៣,៧ប៊ីលានដុល្លារអាមេរិក ។
ក្រុមហ៊ុននេះឲ្យដឹងថា ចាប់ពីសប្តាហ៍ក្រោយទៅ រោងចក្រដែលនៅសេសសល់នឹងធ្វើប្រតិបត្តិការត្រឹមតែ៣៥% នៃសមត្ថភាពផលិតរបស់ពួកគេប៉ុណ្ណោះ ។
យោងតាមប៉ូលិសប្រេស៊ីល បន្ទាប់ពីការស៊ើបអង្កេតរយៈពេល២ឆ្នាំ ដែលបានបញ្ចប់នៅសប្តាហ៍មុននេះឲ្យដឹងថា ក្រុមហ៊ុនកែច្នៃសាច់សំខាន់ៗមួយចំនួន រួមទាំងក្រុមហ៊ុន JBS បានបិទបាំងសាច់រលួយដោយប្រើប្រាស់សារធាតុគីមី និងសូកប៉ាន់ក្រុមមន្ត្រីកសិកម្ម ដើម្បីទទួលការអនុញ្ញាតនាំចេញសាច់របស់ពួកគេ ។
ការលួចបន្លំនេះមានដូចជា ការផ្លាស់ប្តូរកាលបរិច្ឆេទផុតកំណត់លើការវេចខ្ចប់សាច់ និងចាក់ទឹកចូលទៅក្នុងសាច់មាន់ដើម្បីឲ្យវាមានទម្ងន់ធ្ងន់ ឬបិទបាំងសាច់រលួយជាដើម ។
បច្ចុប្បន្ន រដ្ឋាភិបាលប្រេស៊ីលបានហាមឃាត់ការនាំចេញពីក្រុមហ៊ុនចំនួន២១ ដែលគេសង្ស័យថា មានករណីបែបនេះកើតឡើង ។
ប្រេស៊ីលជាប្រទេសនាំចេញសាច់គោ និងសាច់មាន់ធំបំផុតលើពិភពលោក និងជាប់លេខ៤ នៃការនាំចេញសាច់ជ្រូក ។ នៅឆ្នាំ២០១៦ ការនាំចេញសាច់របស់ប្រេស៊ីលទៅកាន់ពិភពលោក ស្មើនឹងទឹកប្រាក់១១ប៊ីលានដុល្លារអាមេរិក និងស្មើ៧,២% នៃការនាំចេញសរុប ៕
ចែករំលែកព័តមាននេះ