រាជធានីភ្នំពេញ ៖ ក្រសួងសុខាភិបាល បានប្រកាសថា គ្មានមេរោគ Machupo ក្នុងថ្នាំប៉ារ៉ាសេតាម៉ុល ដូចពាក្យចចាមអារ៉ាមដែលបាននិយាយតៗគ្នាជាច្រើនថ្ងៃនោះទេ ដែលប្រជាពលរដ្ឋជាច្រើនមានចម្ងល់ ក៏ដូចជាការភ័យខ្លាចទៅនឹងព័ត៌មានដែលថា ថ្នាំ PARACETAMOL P-500 មានផ្ទុកមេរោគដ៏កាចសាហាវ គឺមេរោគ Machupo ដែលអាចបង្កឲ្យមានជំងឺគ្រុនឈាម ។
កាលពីថ្ងៃទី២៣ មីនា នាយកដ្ឋានប្រយុទ្ធនឹងជំងឺឆ្លង CDC នៃក្រសួងសុខាភិបាលបានបញ្ជាក់ថា មេរោគ Machupo ជាប្រភេទមេរោគវិរុស ដែលអាចបង្កឲ្យមានជំងឺគ្រុនឈាម គេរកឃើញជំងឺនេះ កើតមានក្នុងប្រទេស Bolivia ដែលជាប្រទេសស្ថិតក្នុងទ្វីបអាមេរិកខាងត្បូងមួយគត់ ពុំមានមេរោគនេះនៅក្នុងតំបន់យើងទេ ។
មេរោគ Machupo គេរកឃើញមានផ្ទុកនៅក្នុងទឹកនោម លាមក ជំពូកសត្វកកេរ ដូចជាកណ្តុរ ទន្សាយ កំប្រុក ។ល។ នាយកដ្ឋានប្រយុទ្ធនឹងជំងឺឆ្លង បានបញ្ជាក់ទៀតថា មេរោគនេះ វាអាចចម្លងមកមនុស្សតាមរយៈ ការប៉ះពាល់ទៅលើទឹកនោម លាមក ទឹក សរីរាង្គផ្សេងទៀតរបស់សត្វកកេរ ដែលមានផ្ទុកមេរោគ Machupo ជួនកាលក៏អាចឆ្លងតាមខ្យល់ និងចំណីអាហារដែលមានផ្ទុកមេរោគបានដែរ ។
មេរោគ Machupo មិនអាចរស់នៅក្នុងកន្លែងស្ងួតបានទេ ដូចជាម្សៅស្ងួត ឬក៏គ្រាប់ថ្នាំជាដើម ។ ដូច្នេះព័ត៌មានដែលបានផ្សព្វ ផ្សាយកន្លងមកនេះ ជាព័ត៌មានមិនពិតទេ ។
ម្យ៉ាងវិញទៀត ការផ្សព្វផ្សាយព័ត៌មានមិនត្រឹមត្រូវចំពោះឱសថ Paracetamol ប្រភេទ P-500 មានការផ្សព្វផ្សាយព័ត៌មានតាមបណ្តាញសង្គមដែលមិនត្រឹមត្រូវចំពោះឱសថ paracetamol ប្រភេទ P-500 ដែលមានរូបភាពនឹងអត្ថបទដូចមានក្នុងរូបភ្ជាប់មកជាមួយនេះ ។
ឱសថនេះមិនមានចុះបញ្ជីកាជាមួយក្រសួងសុខាភិបាលទេ ហើយក្រោយពីស្រាវជ្រាវឃើញថា មិនមានឱសថប្រភេទនេះ ចរាចរលើទីផ្សារយើងឡើយ។ វាជាព័ត៌មានមិនពិត ដែលមិនគួរឱ្យជឿ និងមិនគួរឱ្យមានការភ័យខ្លាចនោះទេ ព្រោះវាជារឿងឃោសនាអកុសល់ ៕
ចែករំលែកព័តមាននេះ