លោកណាត់វុធ សាយកឿ មេដឹកនាំដ៏សំខាន់របស់ក្រុមបាតុករអាវក្រហមកាលពី វេលាថ្ងៃត្រង់ទី៦ មេសា បានអំពាវនាវដល់អ្នកគាំទ្រក្រុមអាវក្រហមនៅតាមខេត្ដទាំងអស់ទូទាំងប្រទេសថៃឱ្យធ្វើដំណើរមកកាន់ទីក្រុងបាងកកជាបន្ទាន់ដើម្បីបើកយុទ្ធនាការលើកចុងក្រោយធ្វើបាតុកម្មប្រឆាំងរដ្ឋាភិបាលលោកអាប់ភីស៊ីត គឺធ្វើយ៉ាងណាទាមទារឱ្យលោកអាប់ភីស៊ីតចុះចេញពីតំណែង និងរំលាយសភាឱ្យទល់តែបាន ។ការអំពាវនាវនេះធ្វើឡើងក្រោយពីមាន ការលេចឮព័ត៌មានថា រដ្ឋាភិបាលនឹងប្រើកំលាំងបំបែកក្រុមបាតុករអាវក្រហមឱ្យរំសាយ និងបញ្ចប់ការទាមទាររបស់ពួកគេនៅមុនពេលចូលឆ្នាំថ្មីប្រពៃណីថៃមកដល់ ។
លោកណាត់វុធ បានថ្លែងថា ប្រសិនបើរដ្ឋាភិបាលលោកអាប់ភីស៊ីត បញ្ជាឱ្យប្រើកំលាំងប្រឆាំងក្រុមបាតុករអាវក្រុម ក្រុមបាតុករអាវក្រហមទាំងអស់នឹងប្រើដៃទទេប្រឆាំងកំលាំងសន្ដិសុខ និងរដ្ឋាភិបាលលោកអាប់ភីស៊ីត តបវិញ រហូតដល់នាទីចុងក្រោយ… ចាំមើលតើរដ្ឋាភិបាលផ្ដាច់ការ ឬយ៉ាងណា ។លោកណាត់វុធ បានថ្លែងបន្ដទៀតថា ឥឡូវនេះវាដល់ពេលសំរាប់ក្រុមអាវក្រហម បង្កើតរដ្ឋធម្មនុញ្ញថ្មីសំរាប់ប្រវត្ដិសាស្ដ្រនយោបាយរបស់ថៃហើយ រដ្ឋធម្មនុញ្ញចាស់របស់រដ្ឋាភិបាលបច្ចុប្បន្ន មិនមានភាពប្រជាធិបតេយ្យ សេរីពហុបក្ស និងផលប្រយោជន៍ដល់ប្រទេសជាតិទេ ។
ចែករំលែកព័តមាននេះ