ចក្រភពអង់គ្លេស ៖ រដ្ឋមន្ត្រីហិរញ្ញវត្ថុរបស់សហភាពអឺរ៉ុប (EU) បានបង្ហាញភាពព្រួយបារម្ភកាលពីថ្ងៃអង្គារ លើអនាគតការធ្វើពាណិជ្ជកម្មសេរី បន្ទាប់ពីកិច្ចប្រជុំរដ្ឋមន្ត្រីហិរញ្ញវត្ថុរបស់ប្រទេសមានសេដ្ឋកិច្ចធំជាងគេទាំង២០លើពិភពលោក ។
ដោយបានធ្វើខុសប្រពៃណីក្នុងការគាំទ្រការធ្វើពាណិជ្ជកម្មសេរី រដ្ឋមន្ត្រីហិរញ្ញវត្ថុ និងធនាគារិករបស់ G20 បានលើកឡើងពីផ្នែកនេះតែបន្តិចប៉ុណ្ណោះក្នុងសេចក្តីថ្លែងការណ៍របស់ពួកគេ និងយល់ស្របតាមការកើនឡើងនៃគំនិតការពារនិយមរបស់សហរដ្ឋអាមេរិក បន្ទាប់ពីកិច្ចប្រជុំរយៈពេល២ថ្ងៃក្នុងប្រទេសអាល្លឺម៉ង់ មិនទទួលបានការស្រុះស្រួលគ្នា ។
លោក Edward Scicluna រដ្ឋមន្ត្រីហិរញ្ញវត្ថុរបស់ Malta និងបច្ចុប្បន្នជានាយករបស់សហភាពអឺរ៉ុប ថ្លែងថា ៖ « បរិយាកាសគ្មានភាពអវិជ្ជមាន ឬឆេះឆួលទេ ប៉ុន្តែវាចម្លែកព្រោះ G20 បង្កើតឡើងដោយចង់ស្វែងរកកិច្ចសហប្រតិបត្តិការទាំងស្រុង » ។
លោកបន្ថែមថា ៖ « ខ្ញុំនៅមានសុទិដ្ឋិនិយមជាមធ្យមថា វាបម្រើដល់ប្រទេសក្នុងការត្រៀមខ្លួនសម្រាប់កិច្ចប្រជុំនាខែកក្កដា រវាងប្រទេសទាំង២០ ហើយពេលនោះពួកយើងនឹងមើលឃើញលទ្ធផល » ។
យ៉ាងណាក្តី រដ្ឋមន្ត្រីមួយចំនួនគ្មានសុទិដ្ឋិនិយមដូចលោកឡើយ ។ លោក Johan Van Overtveldt រដ្ឋមន្ត្រីហិរញ្ញវត្ថុប្រទេស Belgium ថ្លែងថា G20 បានបញ្ជាក់ពីនិន្នាការព្រួយបារម្ភលើគំនិតការពារនិយម ។
លោកប្រាប់អ្នកកាសែតថា ៖ « ពួកយើងគួរតែធ្វើគ្រប់យ៉ាងដែលអាចធ្វើបានដើម្បីបញ្ឈប់វា និងបង្វែរវាមកកាន់ទិសដៅដ៏ល្អវិញ » ។
លោក Pierre Gramegna រដ្ឋមន្ត្រីហិរញ្ញវត្ថុរបស់លុចសំបួ ក៏បានបង្ហាញពីភាពព្រួយបារម្ភស្រដៀងគ្នាដែរ ។ លោកថ្លែងថា ៖ « ពួកយើងទាំងអស់គ្នានៅអឺរ៉ុបសុទ្ធតែព្រួយបារម្ភពីការមិនជឿទុកចិត្តលើការធ្វើពាណិជ្ជកម្មបើកទូលាយ និងការធ្វើសកលភាវូបនីយកម្ម » ។
លោកបន្ថែមថា នេះមិនមានន័យថា គំនិតការពារនិយមមិនអាចចៀសផុតបានឡើយ ៕
ចែករំលែកព័តមាននេះ