ដំរីព្រៃត្រូវបង្គោលអគ្គិសនីឆក់ងាប់1ក្បាល យកទៅកប់នៅភ្នំតាម៉ៅ
ខេត្តព្រះសីហនុ ៖ ដំរីឈ្មោលមួយក្បាលដែលមានទម្ងន់ជិត៥តោន ត្រូវបានអ្នកស្រុកប្រទះឃើញដេកងាប់ នៅជាប់បង្គោលអគ្គិសនីតង់ស្យុងខ្ពស់ទំហំ
ខេត្តព្រះសីហនុ ៖ ដំរីឈ្មោលមួយក្បាលដែលមានទម្ងន់ជិត៥តោន ត្រូវបានអ្នកស្រុកប្រទះឃើញដេកងាប់ នៅជាប់បង្គោលអគ្គិសនីតង់ស្យុងខ្ពស់ទំហំធំមួយដើមនៅក្នុងដីចំការមួយកន្លែង ក្នុងភូមិស្ទឹងច្រាល ឃុំអូរបាក់រទេះ ស្រុកកំពង់សិលា កាលពីព្រឹកថ្ងៃទី២២ មីនា ចំងាយពីផ្លូវជាតិលេខ៤ប្រហែលពី៤ទៅ៥រយម៉ែត្រ ។ នៅព្រឹកថ្ងៃទី២៣ ខែមីនា ឆ្នាំ២០១៧ ត្រូវបានខាងអង្គការវ៉ាយអេត បានយករថយន្តស្ទូចមួយគ្រឿងទៅស្ទូច ក្នុងបំណងយកខ្មោចដំរីនេះទៅរមណីយដ្ឋានភ្នំតាម៉ៅ រៀបចំពិធី និងកប់ទុកនៅឧទ្យានសួនសត្វ ។
តាមប្រភពពីសមត្ថកិច្ចស្រុកបានឱ្យដឹងថា ដំរីឈ្មោល១ក្បាលនេះជាដំរីព្រៃ ត្រូវបានគេសង្ស័យថា ដោយសារតែវាមកត្រដុសនឹងបង្គោលអគ្គិសនីដែលមានតង់ស្យុងខ្ពល់ (ខ្សែធំ) ធ្វើឱ្យបាក់បង្គោលនោះ ហើយខ្សែកាបធំៗដែលពោរពេញដោយថាមពលខ្លាំង បានធ្លាក់លើសត្វដំរីដ៏ធំនោះ ទើបបណ្តាលឱ្យឆក់ងាប់តែម្តង ។ គ្មានប្រភពណាមួយបានឃើញទេពីសកម្មភាពដំរីត្រដុស ហើយឆក់ស្លាប់កើតឡើងនៅយប់នោះ ឬពេលម៉ោងប៉ុន្មាននោះទេ លុះព្រឹកឡើងទើបគេប្រទះឃើញ ។
ប្រភពពីខាងមន្ត្រីអគ្គិសនី(EDC) បានឱ្យដឹងថា បង្គោលអគ្គិសនីដែលត្រូវដំរីវាយប្រហាររហូតបាក់និងឆក់ងាប់នេះ គឺជាបង្គោលដែលបញ្ជូនបណ្តាញចេញពីវារីអគ្គិសនីគីរីរម្យ មានកម្លាំង១១៥គីឡូវ៉ុល អូសតភ្ជាប់ចែកចាយប្រើប្រាស់នៅតំបន់ខ្លះក្នុងរាជធានីភ្នំពេញ ហើយបន្ទាប់ពីកើតរឿងនូវករណីនេះ ចរន្តអគ្គិសនីក៏ត្រូវបានផ្អាកជាបណ្តោះអាសន្នដែរ ។
តាមប្រភពពីលោក អ៊ុំ វុទ្ធី នាយសង្កាត់រដ្ឋបាលព្រៃឈើស្រុកកំពង់សិលា បានឱ្យដឹងថា ដំរីព្រៃដែលចុះមកនេះ មិនមែនមានតែ១ក្បាលដែលងាប់នោះទេ គឺមានជាហ្វូងពី២ទៅ៣ក្បាល ឬក៏អាចច្រើនជាងនេះ ហើយហ្វូងដំរីទាំងអស់នេះ គឺចុះមកពីតំបន់ព្រៃភ្នំស្ថិតក្នុងឧទ្យានជាតិគីរីរម្យ ។
មន្ត្រីមេព្រៃបាននិយាយថា សកម្មភាពរបស់ដំរីព្រៃទាំងអស់ ចាប់ពីឆ្នាំ២០០៨មក តែងតែចុះមកអុកឡុកក្នុងចំការកាច់ស៊ីដំណាំរបស់អ្នកភូមិបន្តបន្ទាប់ គឺឡើងចុះៗ ដែលពេលខ្លះបាត់រយៈពេល១ឆ្នាំ ទើបឃើញចុះមកទៀត ។ បើទោះបីយ៉ាងណាក្តីគេមិនដឹងថា ហ្វូងដំរីព្រៃទាំងអស់នោះ មានចំនួនសរុបពិតប្រាកដប៉ុន្មានក្បាលនោះទេ ។ ហើយការចុះមករាតត្បាត កន្លងមកសត្វទាំងនេះក៏ធ្លាប់លើកគ្នាចុះមកអុកឡុកធ្វើឱ្យអ្នកភូមិភ័យខ្លាចច្រើនលើកដែរ ដូចជាចូលរាតត្បាតក្នុងភូមិមនោរម្យ ឃុំជើងគោ ស្រុកព្រៃនប់ ដែលជាតំបន់ក្បែរគ្នា ធ្លាប់បានបំផ្លាញទីតាំងផលិតស្រាសក្នុងលំនៅឋានមួយខ្ទេចខ្ទីអស់ទៀតផង។ ប៉ុន្តែបន្ទាប់មកក៏បានបាត់ខានចុះមកបំផ្លាញបែបនេះ ជាយូរ មកហើយដែរ ៕
ចែករំលែកព័តមាននេះ