ទីក្រុងប៉េកាំង ៖ រដ្ឋាភិបាលចិនបានងាកទៅរកក្រុមជំនាញ និងក្រុមប្រឹក្សាដើម្បីទទួលបានដំបូន្មានក្នុងការតបតនឹងផលប៉ះពាល់ពីប្រធានាធិបតីអាមេរិក លោក Donald Trump ទាក់ទិននឹងបញ្ហាធ្វើពាណិជ្ជកម្ម ។
ក្រុមប្រឹក្សាជឿជាក់ថា រដ្ឋាភិបាលលោក Trump អាចនឹងដាក់ពន្ធខ្ពស់ជាងមុនលើវិស័យមួយចំនួន ដែលប្រទេសចិននាំចូលទៅកាន់សហរដ្ឋអាមេរិកដូចជា ដែកថែប និងគ្រឿងសង្ហារិមជាដើម ។
ពួកគេនិយាយថា ចិនអាចឆ្លើយតបនឹងការសម្រេចចិត្តនេះ ដោយការស្វែងរកអ្នកផ្គត់ផ្គង់ផ្សេងសម្រាប់ផលិតផលកសិកម្ម ឬម៉ាស៊ីន និងផលិតផលពីរោងចក្រផ្សេង ខណៈកាត់បន្ថយការនាំចេញទូរស័ព្ទដៃ ឬកុំព្យូទ័រ ។
ពួកគេបន្ថែមថា ជម្រើសផ្សេងទៀតរួមមាន ដាក់ពន្ធ ឬរឹតបន្តិចទៅលើក្រុមហ៊ុនរបស់អាមេរិក ដែលបើកដំណើរការក្នុងប្រទេសចិន ឬដាក់កំហិតលើការចូលរួមក្នុងវិស័យសេវាកម្មដែលកំពុងរីកលូតលាស់យ៉ាងលឿន ។
អ្នកប្រឹក្សាគោលនយោបាយម្នាក់បាននិយាយក្នុងលក្ខខណ្ឌមិនបញ្ចេញឈ្មោះថា ៖ «នៅមានឱកាសសម្រាប់ភាគីទាំងសងខាងដោះស្រាយបញ្ហាតាមរយៈសហប្រតិបត្តិការ និងការពិភាក្សាដោយមិនប្រើប្រាស់ការសងសឹក ប៉ុន្តែពួកយើងគួរតែមានផែនការ ប្រសិនបើស្ថានការណ៍មិនអំណោយផល » ។
លោកនាយករដ្ឋមន្ត្រីចិន Li Keqiang បាននិយាយកាលពីសប្តាហ៍មុនថា ប្រទេសចិនមិនចង់ឃើញសង្គ្រាមពាណិជ្ជកម្មជាមួយសហរដ្ឋអាមេរិកទេ ហើយបានជំរុញឲ្យមានការចរចារវាងភាគីទាំងពីរផងដែរ ។
លោក Steven Mnuchin លេខាធិការរតនាគារសហរដ្ឋអាមេរិក និយាយដែរថា រដ្ឋាភិបាលលោក Trump មិនចង់ឲ្យកើតមានសង្គ្រាមពាណិជ្ជកម្មទេ ប៉ុន្តែទំនាក់ទំនងពាណិជ្ជកម្មមួយចំនួនត្រូវការត្រួតពិនិត្យឡើងវិញ ដើម្បីធ្វើឲ្យមានសមភាពសម្រាប់ពលករអាមេរិក ។
យ៉ាងណាក្តី ភាពមិនប្រាកដប្រជានាពេលអនាគតត្រូវបានបង្ហាញក្នុងសេចក្តីថ្លែងការណ៍កាលពីថ្ងៃសៅរ៍ បន្ទាប់ពីកិច្ចប្រជុំរវាងរដ្ឋមន្ត្រីហិរញ្ញវត្ថុ G20 ក្នុងប្រទេសអាល្លឺម៉ង់ ដែលបានបោះបង់ការសន្យារក្សាការធ្វើពាណិជ្ជកម្មសេរី និងបើកទូលាយក្នុងពិភពលោក ។
ប្រភពឲ្យដឹងដែរថា ប្រទេសចិនអាចនឹងបង្កើនការនាំចូលពីសហរដ្ឋអាមេរិក និងជំរុញការវិនិយោគនៅទីនោះ ដើម្បីជួយបង្កើតការងារ ប៉ុន្តែនឹងមិនទទួលយករាល់សកម្មភាពឯកតោភាគីរបស់សហរដ្ឋអាមេរិកឡើយ ។
អ្នកប្រឹក្សាគោលនយោបាយម្នាក់ទៀតនិយាយថា ៖ « ពួកយើងមានផែនការទប់ទល់នឹងគោលនយោបាយអាក្រក់ជាងគេរបស់លោក Trump » ។
គួរបញ្ជាក់ថា លោក Trump ធ្លាប់បានគំរាមថា នឹងដាក់ពន្ធ៤៥%លើការនាំចេញរបស់ចិន និងនិយាយជារឿយៗកាលពីអំឡុងពេលយុទ្ធនាការថា នឹងដាក់ឈ្មោះចិនជាប្រទេសទម្លាក់តម្លៃប្រាក់ដើម្បីបង្កើនការនាំចេញ បើទោះជាចិនមិនបានទម្លាក់តម្លៃប្រាក់យន់ញឹក ញាប់នាពេលប៉ុន្មានឆ្នាំនេះក្តី ។
នៅក្រោមលក្ខខណ្ឌ៣ចំណុចត្រូវបានដាក់ដោយរតនាគារសហរដ្ឋអាមេរិកដើម្បីដឹងថា ប្រទេសមួយទម្លាក់តម្លៃប្រាក់របស់ខ្លួន ក្នុងគោលបំណងទទួលបានអត្ថប្រយោជន៍ផ្នែកពាណិជ្ជកម្មឬអត់ ប្រទេសចិនបំពេញគ្រប់តែ១ចំណុចប៉ុណ្ណោះ គឺមានផលលើសពាណិជ្ជកម្មច្រើនជាង២០ប៊ីលានដុល្លារជាមួយសហរដ្ឋអាមេរិក ។
ក្រសួងពាណិជ្ជកម្មអាមេរិកនិយាយកាលពីថ្ងៃអង្គារថា ផលលើសពាណិជ្ជកម្មរបស់ចិនជាមួយសហរដ្ឋអាមេរិកបានធ្លាក់ចុះ២០,១ប៊ីលានដុល្លារ មកត្រឹម៣៤៧ប៊ីលានដុល្លារក្នុងឆ្នាំ២០១៦ ។
កាលពីដើមខែនេះ អតីតរដ្ឋមន្ត្រីពាណិជ្ជកម្ម Gao Hucheng បានថ្លែងក្នុងកិច្ចប្រជុំសភាប្រចាំឆ្នាំថា ចិនមិនខ្លាចសង្គ្រាមពាណិជ្ជកម្មទេ ប៉ុន្តែពួកគេសង្ឃឹមថា អាចនឹងចៀសវាងបាន ។ លោកថ្លែងថា ៖ « ពួកយើងចង់ដោះស្រាយរឿងនេះឲ្យបានសមរម្យ ប៉ុន្តែយើងមិនខ្លាចទេ។ ប្រសិនបើភាគីសហរដ្ឋអាមេរិកចេញសកម្មភាពណាមួយ យើងនឹងវិភាគសកម្មភាពនោះហើយឆ្លើយតបតាមស្ថានការណ៍ » ៕
ចែករំលែកព័តមាននេះ