ខេត្តបាត់ដំបង ៖ បុរសម្នាក់ដែលកម្លាំងកងរាជអាវុធហត្ថក្រុងបាត់ដំបង ឃាត់ខ្លួនពាក់ ព័ន្ធនឹងករណីស៊ីដាច់លុយរបស់ក្រុមហ៊ុនជាង១ម៉ឺនដុល្លារ ត្រូវបានកសាងសំណុំរឿងបញ្ជូនទៅកាន់សាលាដំបូងហើយ នាព្រឹកថ្ងៃទី២២ ខែមីនា ដើម្បីប្រគល់ឲ្យតំណាងអយ្យការធ្វើការសន្និដ្ឋាននិងចោទប្រកាន់តាមនីតិវិធី ។
លោក សំ វិឡុង មេបញ្ជាការមូលដ្ឋានកង រាជអាវុធហត្ថក្រុងបាត់ដំបង បានប្រាប់ថា ជនសង្ស័យឈ្មោះ ដួង ចំណាប់ អាយុ៣០ឆ្នាំ ជាបុគ្គលិកផ្នែកគណនេយ្យរបស់ក្រុមហ៊ុនលក់ផលិតផលមួយប្រចាំភាគពាយ័ព្យ និងរស់នៅភូមិកំពង់ក្របី សង្កាត់ស្វាយប៉ោ ក្រុងបាត់ដំបង។ ជននេះត្រូវកម្លាំងកងរាជអាវុធហត្ថឃាត់ខ្លួន កាលពីព្រឹកថ្ងៃទី២០ ខែមីនា តាមបណ្ដឹងរបស់លោក ជូ ហ្វីង អាយុ៤០ឆ្នាំ រស់នៅភូមិអូរចារ សង្កាត់អូរចារ ក្រុងបាត់ដំបង ដែលជាអ្នកគ្រប់គ្រងទីផ្សាររបស់ក្រុមហ៊ុនចំនួន៥ខេត្តភាគពាយ័ព្យ ដែលសង្ស័យថា ជននេះបានបន្លំយកលុយក្រុមហ៊ុនចំនួន១៥.៦៣២ដុល្លារទៅដើរស៊ីចាយ ។
បើតាមលោក ជូ ហ្វីង បាននិយាយប្រាប់សមត្ថកិច្ចថា ឈ្មោះ ដួង ចំណាប់ នេះជាបុគ្គលិកផ្នែកគណនេយ្យនៅក្រុមហ៊ុនរបស់លោក ដែលគ្រប់គ្រងខេត្តចំនួន៥នៃភាគពាយ័ព្យ។ លោកនិយាយថា មួយរយ:នេះបុគ្គលិករូបនេះបានដើរប្រមូលលុយពីម៉ូយតាមបណ្ដាខេត្តនានា តែមិនបានយកលុយនោះឲ្យក្រុមហ៊ុនទេ។ លុះខាងក្រុមហ៊ុនសួរនាំ ជននេះបែរជានិយាយបោកប្រាស់បង្វិលគ្រប់ទិស ដូច្នេះហើយទើបលោកសម្រចចិត្តប្ដឹងតែម្ដង ។
បើតាមការបូកសរុបបញ្ជីគឺទឹកប្រាក់ប្រមាណ១៥.៦៣២ដុល្លារ ដែលជននេះស៊ីដាច់ តែអាចនៅមានលើសពីនេះទៀត ៕
ចែករំលែកព័តមាននេះ