បណ្តាទិន្នន័យផ្លូវការលាតត្រដាងកាលពីថ្ងៃទី២១ មីនា ថា ប្រទេសរុស្ស៊ីក្នុងខែមករា នៅតែជាអ្នកផលិតប្រេងធំជាងគេលើពិភពលោកសម្រាប់២ខែជាប់ៗគ្នា ។
យោងតាមបណ្តាទិន្នន័យចេញផ្សាយដោយផ្អែកស្ថិតិសហព័ន្ធរុស្ស៊ី ROSSTAT ថា ផលិតកម្មប្រេងប្រចាំថ្ងៃរបស់រុស្ស៊ីឡើងដល់ជាមធ្យម១០,៨លានធុង ក្នុងខែមករា ដែលបើប្រៀបធៀបទៅនឹងខែធ្នូ ឆ្នាំ២០១៦ មាន១០,៥លានធុងក្នុងមួយថ្ងៃ ។
ប្រទេសអារ៉ាប៊ី សាអ៊ូឌីត តោងកន្ទុយរុស្ស៊ីរយៈពេល២ខែ ជាមួយផលិតកម្មប្រេងក្នុងមួយថ្ងៃគិតជាមធ្យម៩,៩៥លានធុងមួយថ្ងៃក្នុងខែមករា ។ ទោះបីយ៉ាងណា អារ៉ាប៊ី សាអ៊ូឌីត នៅតែជាអ្នកផលិតប្រេងធំជាងគេលើពិភពលោករហូតដល់ខែវិច្ឆិកា ឆ្នាំ២០១៦ ជាមួយផលិតកម្មប្រេងរង្វង់១០,៦លានធុង ក្នុង១ថ្ងៃទល់នឹង១០,៤លានធុងសម្រាប់រុស្ស៊ី។
ក្នុងខែមករាការនាំចេញប្រេងឆៅតំណាងឱ្យជិត២០% នៃការនាំចេញសរុបរបស់រុស្ស៊ី ទល់នឹង២៥%សម្រាប់ដំណាក់កាលដដែលនៃឆ្នាំមុន ។
ដើម្បីទប់ទល់នឹងតម្លៃប្រេងដែលធ្លាក់ចុះខ្លាំង អង្គការបណ្តាប្រទេសនាំប្រេងចេញ OPEC និងប្រទេស១១ទៀតពុំមែនជាសមាជិក OPEC ក្នុងនោះមានរុស្ស៊ីដែរ បានព្រមព្រៀងគ្នាកាលពីខែវិច្ឆិកា ឆ្នាំ២០១៦ កាត់បន្ថយផលិតប្រេងរួមគ្នាប្រមាណជា១,៨លានធុងក្នុង១ថ្ងៃ ។ កិច្ចព្រមព្រៀងកាត់បន្ថយផលិតកម្មប្រេងនេះចូលជាធរមានថ្ងៃទី១ មករា ២០១៧ ហើយនឹងស្ថិតនៅជាធរមានរហូតដល់ខែកក្កដាឆ្នាំនេះ ។ ចំណែករុស្ស៊ីបានសន្យាកាត់បន្ថយផលិតកម្មប្រេងរបស់ខ្លួន៣០០.០០០ធុងក្នុង១ថ្ងៃ ៕
ចែករំលែកព័តមាននេះ