ខេត្តបាត់ដំបង ៖ ពលករខ្មែរទាំងចាស់ ទាំងក្មេងយ៉ាងតិចជាង២៥០នាក់ បានត្រូវអាជ្ញាធរថៃចាប់បញ្ជូនត្រឡប់មកប្រទេសកំណើតវិញជាបន្តបន្ទាប់ កាលពីថ្ងៃទី២១ និង២២ ខែមីនា តាមច្រកទ្វារព្រំដែនចំនួន២ក្នុងខេត្តបាត់ដំបង ដែលអាជ្ញាធរថៃអះអាងថា ពួកគាត់លួចឆ្លងដែនដោយខុសច្បាប់ទៅធ្វើការងារនៅប្រទេសថៃ ។
តាមសេចក្ដីរាយការណ៍ពីមន្ត្រីព្រំដែនបានឲ្យដឹងថា ពលករ៩៣នាក់ ក្នុងនោះមានស្ត្រី៣៥នាក់និងក្មេង១១នាក់ ត្រូវអាជ្ញាធរថៃចាប់បញ្ជូនត្រឡប់មកដីខ្មែរវិញតាមច្រកតំបន់ភ្នំដី ស្រុកសំពៅលូន កាលពីល្ងាចថ្ងៃទី២១ ខែមីនា។ រីឯពលករខ្មែរចំនួន១៦៥នាក់ ក្នុងនោះស្ត្រី៥១នាក់ ត្រូវអាជ្ញាធរថៃចាប់បញ្ជូនមកវិញតាមច្រកអន្តរជាតិដូង ក្នុងស្រុកកំរៀង នាព្រឹកថ្ងៃទី២២ ខែមីនា ។
ប្រភពដដែលបញ្ជាក់ថា ពលករខ្មែរទាំងនោះត្រូវអាជ្ញាធរថៃចោទប្រកាន់ថា បានលួចឆ្លងដែនដោយខុសច្បាប់ចូលទៅធ្វើការក្នុងទឹកដីថៃ ។ បើតាមការសួរនាំពលករខ្មែរទាំងនេះបាននិយាយថា ពួកគាត់ពិតជាមិនមានលិខិតឆ្លងដែនទៅធ្វើការនៅប្រទេសថៃមែន ។ ពលករទាំងនេះបានប្រាប់ថា ពួកគាត់បានចំណាយលុយឲ្យមេខ្យល់ ដើម្បីបានឆ្លងដែនតាមច្រករបៀងនានាចូលទៅធ្វើការនៅប្រទេសថៃ ។ ប៉ុន្តែបើតាមចម្លើយ គឺពួកគាត់មួយចំនួនទើបទៅដល់ទឹកដីថៃ និងខ្លះទៀតបានទៅដល់ធ្វើការមួយរយ:ហើយ ក៏ត្រូវសមត្ថកិច្ចថៃចាប់ប្រមូលបញ្ជូនត្រឡប់មកប្រទេសកំណើតវិញតែម្ដង។
សូមបញ្ជាក់ថា បើតាមរបាយការណ៍របស់ភាគីកម្ពុជា ចាប់តាំងពីដើមខែមករារហូតដល់ខែមីនា ឆ្នាំ២០១៧នេះ អាជ្ញាធរថៃបានចាប់បញ្ជូនពលករខ្មែរខុសច្បាប់យ៉ាងតិចជាង១ម៉ឺននាក់ហើយបញ្ជូនត្រឡប់មកប្រទេសកំណើតវិញ តាមច្រកទ្វារអន្តរជាតិដូង ក្នុងស្រុកកំរៀង និងតាមច្រកតំបន់នានាក្នុងខេត្តបាត់ដំបង ៕
ចែករំលែកព័តមាននេះ