កងឯកភាពកម្ចាត់មីន ប្រើកណ្ដុរអាហ្វ្រិកហិតរុករកមីនសាកល្បង
ខេត្ដសៀមរាប ៖ នៅថ្ងៃទី១៦ ខែមីនា អាជ្ញាធរមីនកម្ពុជា បាននាំយកកណ្តុរចំនួន២១ក្បាលសម្រាប់ជួយហិតរកមីន ក្នុងប្រតិបត្តិការបោសសម្អាតមីន
ខេត្ដសៀមរាប ៖ នៅថ្ងៃទី១៦ ខែមីនា អាជ្ញាធរមីនកម្ពុជា បាននាំយកកណ្តុរចំនួន២១ក្បាលសម្រាប់ជួយហិតរកមីន ក្នុងប្រតិបត្តិការបោសសម្អាតមីន និងយុទ្ធភណ្ឌមិនទាន់ផ្ទុះសល់ពីសង្គ្រាមនៅកម្ពុជា ។ អ្នកគ្រប់គ្រងគម្រោងមានផែនការបង្កើតមជ្ឈមណ្ឌលបង្កាត់ពូជកណ្តុរនេះនៅកម្ពុជា សម្រាប់ជួយដល់ប្រតិបត្តិការដោះមីនដល់គ្រប់កងឯកភាពក្នុងប្រទេសកម្ពុជាផងដែរ ។
លោក លី ធុជ ទេសរដ្ឋមន្ត្រី ទទួលបន្ទុកបេសកកម្មពិសេស និងជាអគ្គលេខាធិការអាជ្ញាធរមីនកម្ពុជា រួមជាមួយគណៈប្រតិភូក្រុមការងារ បានអញ្ជើញទៅកាន់មជ្ឈមណ្ឌលសកម្មភាពកម្ចាត់មីនកម្ពុជា ស្ថិតក្នុងឃុំត្រពាំងធំស្រុកប្រាសាទបាគង ដើម្បីពិនិត្យពីសកម្មភាពកណ្តុរហិតរាវរកមីននិងយុទ្ធភណ្ឌមិនទាន់ផ្ទុះសល់ពីសម័យសង្គ្រាម ដែលជាពូជកណ្តុរអាហ្វ្រិកនាំចូលមកកម្ពុជាតាមរយៈអង្គការអាប៉ូប៉ូ ។
តាមរយៈសកម្មភាពនៃការហិតរកមីនរបស់កណ្តុរទាំងនោះ លោក លី ធុជ បានថ្លែងកត់សម្គាល់ថា ក្រៅពីមន្ត្រីក្នុងកងឯកភាពកម្ចាត់មីនកម្ពុជា និងមន្ត្រីក្នុងអង្គភាពដោះមីនផ្សេងៗ ទៀតក្នុងសកម្មភាពប្រតិបត្តិការបោសសម្អាតមីននៅកម្ពុជា យើងនៅមានសុនខ ហើយពេលនេះយើងមានទាំងកណ្តុរដែលនាំចូលមកពីតំបន់អាហ្វ្រិកទៀត ។
លោកទេសរដ្ឋមន្ត្រី បានវាយតម្លៃខ្ពស់ចំពោះប្រសិទ្ធភាព និងអត្ថប្រយោជន៍របស់កណ្តុរក្នុងសកម្មភាពហិតនិងរុករកមីន ដែលវាអាចជួយការងារយើងបានពី៦រហូតដល់ទៅ៨ឆ្នាំ ក្រោយពីធ្វើការបង្វឹក១ឬ២ឆ្នាំ ។ កណ្តុរនេះ មានសមត្ថភាពហិតក្លិនយុទ្ធភណ្ឌមិនទាន់ផ្ទុះក្នុងជម្រៅដី៣ទៅ៤តឹក ដែលក្នុងមួយថ្ងៃកណ្តុរ១១ក្បាលអាចហិតរកបានលើទំហំផ្ទៃដីប្រមាណជាកន្លះហិកតា ។ ការប្រើកណ្ដុរនេះ បានជួយក្នុងការកាត់បន្ថយបញ្ហាប្រឈមនិងហានិភ័យផ្សេងៗ ដល់មន្ត្រីដោះមីនរបស់យើងយ៉ាងច្រើន ។
លោកទេសរដ្ឋមន្ត្រីមានប្រសាសន៍បន្តថា ទស្សនវិស័យដ៏វែងឆ្ងាយរបស់សម្តេចតេជោ នាយករដ្ឋមន្ត្រី ហ៊ុន សែន តែងតែគិតគូរធ្វើយ៉ាងណាឱ្យកម្ពុជាចាកផុតពីយុទ្ធភណ្ឌមិនទាន់ផ្ទុះដែលបន្សល់ពីសង្គ្រាម ។ ហេតុនេះយើងខិតខំប្រឹងប្រែងឱ្យការបោសសម្អាតមីននៅកម្ពុជាបានចប់ជាស្ថាពរ ដោយដាក់ផែនការនៅត្រឹមឆ្នាំ២០២៥បញ្ចប់ការដោះមីនជាស្ថាពរ ។
ក្នុងនាមថ្នាក់ដឹកនាំអាជ្ញាធរមីនកម្ពុជា លោកទេសរដ្ឋមន្ត្រី លី ធុជ បានថ្លែងអំណរគុណក្រុមប្រតិបត្តិករដោះមីនជាតិនិងអន្តរជាតិ ដែលកំពុងសកម្មក្នុងការដោះមីននិងរាវរកយុទ្ធភណ្ឌមិនទាន់ផ្ទុះទាំងអស់ ដោយខិតខំបំពេញភារកិច្ចឆ្លងកាត់ការលំបាក និងប្រឈមទៅនឹងគ្រោះថ្នាក់គ្រប់ពេលវេលា ក្នុងការដោះមីនជួយរំដោះដីស្រែចម្ការជូនជាតិមាតុភូមិយើង និងជួយសម្រួលដល់ប្រជាពលរដ្ឋផងដែរ ។
ទាក់ទងនឹងកណ្ដុរនេះ គឺក្រោយពីបានចិញ្ចឹមបង្វឹកដើម្បីបន្សាំុទៅនឹងអាកាសធាតុក្នុងប្រទេសកម្ពុជាអស់មួយរយៈធំមក កណ្តុរចំនួន២១ក្បាលត្រូវបាននាំយកទៅហិតរកមីននិងយុទ្ធភណ្ឌមិនទាន់ផ្ទុះ ក្នុងតំបន់ស្រែណូយ ស្រុកវ៉ារិន ជាមួយសកម្មភាពប្រតិបត្តិការរាវរកមីនរបស់កងឯកភាពកម្ចាត់មីនកម្ពុជាទី៤ ដែលមានទីបញ្ជាការនៅមជ្ឈមណ្ឌលសកម្មភាពកម្ចាត់មីនកម្ពុជា ស្ថិតក្នុងឃុំត្រពាំងធំ ស្រុកប្រាសាទបាគង ។
តាមរយៈអ្នកបកប្រែភាសា លោក ផូម៉ា កាហ្ស៊ី ជនជាតិអង់គ្លេស ជាប្រធានគម្រោងអង្គការអាប៉ូប៉ូ បានឱ្យដឹងថា មុននឹងនាំយកកណ្តុរទាំងនេះទៅកាន់តំបន់ដែលសង្ស័យថាមានគ្រាប់មីន ត្រូវបន្សាំុវាទៅនឹងអាកាសធាតុ ស្របតាមលក្ខណៈភូមិសាស្ត្រនិងបង្វឹកអស់រយៈពេលពី៦ខែឬក៏រហូតដល់១ឆ្នាំ ។ កណ្តុរដែលនាំចូលមកនេះ សុទ្ធតែទទួលបានអាជ្ញាប័ណ្ណបញ្ជាក់ពីប្រទេសដៃគូ ប្រភពនៃសត្វកណ្តុរ ។
ក្រោយពីពិនិត្យនិងបានការឯកភាពពីប្រទេសដៃគូថា កណ្តុរទាំងនេះមានលទ្ធភាពនិងសមត្ថភាពក្នុងការហិតក្លិនមីននិងយុទ្ធភណ្ឌមិនទាន់ផ្ទុះបានហើយ ប្រទេសដៃគូបានផ្តល់ជូនអាជ្ញាប័ណ្ណបញ្ជាក់សម្រាប់សកម្មភាពប្រតិបត្តិការជាមួយសត្វកណ្តុរទាំងនេះ ។ កណ្តុរនេះមានតម្លៃមួយក្បាលស្មើនឹង៥.០០០យូរ៉ូ បូករួមទាំងប្រាក់ខែសម្រាប់អ្នកមើលថែរក្សានិងអាហាររបស់វាផង ។
ពួកវាមានសមត្ថភាពហិតរកក្លិនសារធាតុផ្ទុះ អាស្រ័យទៅលើទំហំនៃសារធាតុនោះ បើសារធាតុផ្ទុះកាន់តែធំវាកាន់តែមានប្រសិទ្ធភាពក្នុងការហិតក្លិន ។ វាមិនខុសគ្នាពីមនុស្សយើងទេ ក្នុងពេលអាកាសធាតុក្តៅខ្លាំង ឬត្រជាក់ពេក និងមានភ្លៀងធ្លាក់ជាដើម វាមិនអាចធ្វើការបានពេញលេញទេ ក៏ប៉ុន្តែវាអាចធន់ទៅនឹងអាកាសធាតុដល់៣៩អង្សាសេបាន ។ ប៉ុន្តែបើក្តៅខ្លាំងក៏បញ្ជូនវាមកទីសម្រាកសំចតមួយរយៈ ដោយប្តូរផ្លាស់វេនមួយក្រុមម្តងៗ ដើម្បីចៀសវាងពីហានិភ័យចំពោះសុខភាពរបស់ពួកវាផងដែរ ៕
ចែករំលែកព័តមាននេះ