រយៈពេល2ថ្ងៃថៃបញ្ជូនពលករខ្មែរខុសច្បាប់មកវិញទៀតហើយ(មានវីដេអូ)
ខេត្តបាត់ដំបង ៖ ពលករខ្មែរទាំងចាស់ ទាំងក្មេង យ៉ាងតិចជាង២៥០នាក់ត្រូវអាជ្ញាធរថៃចាប់បញ្ជូនត្រឡប់មកប្រទេសកំណើតវិញ
ខេត្តបាត់ដំបង ៖ ពលករខ្មែរទាំងចាស់ ទាំងក្មេង យ៉ាងតិចជាង២៥០នាក់ត្រូវអាជ្ញាធរថៃចាប់បញ្ជូនត្រឡប់មកប្រទេសកំណើតវិញ កាលពីថ្ងៃទី២១ និង២២ ខែមីនា ឆ្នាំ២០១៧ តាមច្រកទ្វាព្រំដែនចំនួន២ ក្នុងខេត្តបាត់ដំបង ដែលអាជ្ញាធរថៃអះអាងថា បានលួចឆ្លងដែនដោយខុសច្បាប់ទៅធ្វើការងារនៅប្រទេសថៃ ។ តាមសេចក្ដីរាយការណ៍ពីមន្ត្រីព្រំដែនបានឲ្យដឹងថា ពលករ៩៣នាក់ក្នុងនោះមានស្ត្រី៣៥នាក់ និងក្មេង១១នាក់ត្រូវអាជ្ញាធរថៃ ចាប់បញ្ជូនត្រឡប់មកខ្មែរវិញតាមច្រកតំបន់ភ្នំដី ស្រកសំពៅលូន កាលពីល្ងាចថ្ងៃទី២១ ខែមីនា ឆ្នាំ២០១៧ ។ រីឯពលករខ្មែរចំនួន១៦៥នាក់ក្នុងនោះស្ត្រី៥១នាក់ ត្រូវអាជ្ញាធរថៃចាប់បញ្ជូនតាមច្រកអន្តរជាតិដូង ក្នុងស្រុកកំរៀង នៅព្រឹកថ្ងៃទី២២ ខែមីនា ឆ្នាំ២០១៧ នេះ ។
ប្រភពដដែលបានបញ្ជាក់ថា ពលករខ្មែរទាំងនោះត្រូវអាជ្ញាធរថៃចោទប្រកាន់ថា បានលួចឆ្លងដែនដោយខុសច្បាប់ចូលទៅធ្វើការក្នុងទឹកដីថៃ ។ បើតាមការសួរនាំពលករខ្មែរទាំងនេះបាននិយាយថា ពួកគេពិតជាមិនមានលិខិត្រឆ្លងដែនទៅធ្វើការនៅប្រទេសថៃមែន ។ ពលករទាំងនេះបានប្រាប់ថា ពួកគេបានចំណាយលុយឲ្យមេខ្យល់ដើម្បីបានឆ្លងដែនតាមច្រករបៀងនានាចូលទៅធ្វើការនៅប្រទេសថៃ ។ ប៉ុន្តែបើតាមចម្លើយពួកគេមួយចំនួនទើបទៅដល់ទឹកដីថៃ និងខ្លះទៀតបានទៅដល់ធ្វើការមួយរយៈហើយ ក៏ត្រូវសមត្ថកិច្ចចាប់ប្រមូលបញ្ជូនត្រឡប់មកប្រទេសកំណើតវិញតែម្ដង ។
សូមបញ្ជាក់ថា បើតាមរបាយការណ៍របស់ភាគីកម្ពុជាចាប់តាំងពីដើមខែមករារហូតដល់ខែមីនា ឆ្នាំ២០១៧នេះ អាជ្ញាធរថៃបានចាប់បញ្ជូនពលករខ្មែរខុសច្បាប់យ៉ាងតិចជាង១ម៉ឺននាក់ហើយបញ្ជូនត្រឡប់មកប្រទេសកំណើតវិញតាមច្រកទ្វាអន្តរជាតិដូង ក្នុងស្រុកកំរៀង និងតាមច្រកតំបន់នានាក្នុងខេត្តបាត់ដំបង ៕
ចែករំលែកព័តមាននេះ