ខេត្តរតនគិរី ៖ មន្ត្រីសាលាក្រុងចាប់រថយន្តពីរគ្រឿងយកលុយពីឈ្មួញរួចប្រលែងវិញ ហេតុការណ៍នេះបានកើតឡើងនៅវេលាម៉ោង១រសៀល ថ្ងៃទី២២ ខែមីនា ឆ្នាំ២០១៧ រហូតដល់ម៉ោង២ជាងរសៀលថ្ងៃដដែលទើបក្រុមឈ្មួញបាននិយាយត្រូវថ្លៃគ្នារួចដោះលែង
ខេត្តរតនគិរី ៖ មន្ត្រីសាលាក្រុងចាប់រថយន្តពីរគ្រឿងយកលុយពីឈ្មួញរួចប្រលែងវិញ ហេតុការណ៍នេះបានកើតឡើងនៅវេលាម៉ោង១រសៀល ថ្ងៃទី២២ ខែមីនា ឆ្នាំ២០១៧ រហូតដល់ម៉ោង២ជាងរសៀលថ្ងៃដដែលទើបក្រុមឈ្មួញបាននិយាយត្រូវថ្លៃគ្នារួចដោះលែងរថយន្តសាំយ៉ុងចំនួន២គ្រឿងដែលផ្ទុកឈើប្រណិតពេញរថយន្តតែម្តង ក្នុងសកម្មភាពជាក់ស្តែងគេបានឃើញរថយន្តរបស់លោក កៃ សាវិន ជាមន្ត្រីទទួលបន្ទុករដ្ឋបាលសាលាក្រុងដាក់រថយន្តរបស់ខ្លួនកាងមុខទ្វារចេញចូលជាកន្លែងរថយន្តយកមកស្តុកទុកនៅក្នុងភូមិអភិវឌ្ឍន៍ សង្កាត់ឡាបានសៀក ក្រុងបានលុង ។
បើតាមប្រភពព័ត៌មានពីអ្នកបើកបររថយន្តទាំង២ខាងលើបានឱ្យដឹងថា នៅថ្ងៃកើតហេតុនោះក្រុមពូកគេមានរថយន្តចំនួន៤គ្រឿងម៉ាកសាំយ៉ុងបានស៊ីឈ្នួលដឹកឈើប្រណិតចេញពីខេត្តស្ទឹងត្រែង ស៊ីឈ្នួលឈ្មោះ ស្រី ជីង ជាជនជាតិវៀតណាម នៅក្នុងខណៈនោះដែរពេលរថយន្តម៉ាកសាំយ៉ុងទាំងពីរមកដល់ទីរួមក្រុងបានលុង ស្រាប់តែលិចចេញរថយន្តម៉ាកបាឡែន ពាក់ស្លាកលេខ ភ្នំពេញ 2AK-0018 ពណ៌ស របស់លោក កៃ សាវិន បានដេញតាមពីក្រោយជាប់តែម្តង ហើយបានរត់ចូលកន្លែងឃ្លាំងស្តុកឈើដែលមានទីតាំងខាងលើរួចធ្វើការចរចាគ្នាអស់រយៈពេលជិត២ម៉ោងទើបត្រូវរ៉ូវគ្នាគឺសេវាបង់ទៅឱ្យលោក កៃ សាវិន អស់៣.០០០ដុល្លារ និងសុំក្រៅ៥០០ដុល្លារថែមទៀត សរុប៣.៥០០ដុល្លារ ។
អ្នកបើកបររថយន្តទាំង២បានបន្តទៀតថា រថយន្តចំនួន៤គ្រឿងម៉ាកសាំយ៉ុងនោះមន្ត្រីសាលាក្រុងខាងលើចាប់បានតែ២គ្រឿងនោះទេ ដោយពីរគ្រឿងទៀតរត់គេចបាត់ ។ ដោយឡែកម្ចាស់ដីឡូត៍បានឱ្យដឹងថា ដោយមានបញ្ជាពីម្ចាស់ឈើឱ្យខលទូរស័ព្ទហៅលោក កៃ សាវិន មកនិយាយគ្នាខាងក្រៅដើម្បីកំណត់ឱ្យម្ចាស់ឈើដែលមានឈ្មោះខាងលើប្រគល់ថវិការជូនលោក កៃ សាវិន ចាប់ពីម៉ោង២រសៀលតែមកដល់ម៉ោង៣រសៀលថ្ងៃដដែលនេះឈ្មោះស្រី ជីង ជាម្ចាស់ឈើអត់បានប្រគល់លុយមកឱ្យគាត់(ម្ចាស់ដីឡូត៍) ដើម្បីយកមកឱ្យឈ្មោះ កៃ សាវិន នោះឡើយធ្វើឱ្យម្ចាស់ដីឡូត៍មានការព្រួយបារម្មណ៍ ក្នុងខណៈនេះគឺឈើប្រណិតក្នុងដីឡូត៍របស់គាត់ និងរថយន្តសាំយ៉ុងបានទំលាក់ឈើចេញអស់បើករថយន្តគេចបាត់ ។ ដោយឡែកលោក កៃ សាវិន ជាមន្ត្រីសាលាក្រុងទទួលបន្ទុករដ្ឋបាលបានឱ្យដឹងថា គាត់អត់បានទទួលលុយពីក្រុមឈ្មួញដូចការចោទប្រកាន់នោះទេ ដោយមូលហេតុម្ចាស់ឈើ និងម្ចាស់ដីឡូត៍ជាអ្នកស្គាល់គ្នា ៕
ចែករំលែកព័តមាននេះ