រាជធានីភ្នំពេញ ៖ ក្នុងវត្តមានបង្ហាញខ្លួនរបស់កីឡាករចាន់ វឌ្ឍនាកា នៅក្នុងប្រទេសកម្ពុជាក្រោយចេញទៅហ្វឹកហាត់ និងប្រកួតនៅក្នុងប្រទេសជប៉ុនបានមួយរយៈ គេចាប់អារម្មណ៍ថាកីឡាកររូបនេះបែកសាច់ជាងមុន និង
រាជធានីភ្នំពេញ ៖ ក្នុងវត្តមានបង្ហាញខ្លួនរបស់កីឡាករចាន់ វឌ្ឍនាកា នៅក្នុងប្រទេសកម្ពុជាក្រោយចេញទៅហ្វឹកហាត់ និងប្រកួតនៅក្នុងប្រទេសជប៉ុនបានមួយរយៈ គេចាប់អារម្មណ៍ថាកីឡាកររូបនេះបែកសាច់ជាងមុន និងមានទម្រង់លេងល្អជាងមុន ។ យ៉ាងណាមិញ គ្រូបង្វឹកក្រុមជម្រើសជាតិកម្ពុជាបានអះអាងថា មិនប៉ះពាល់ដល់សមត្ថភាពប្រកួតរបស់គេនោះទេ ផ្ទុយទៅវិញសមត្ថភាពលេងរបស់ចាន់ វឌ្ឍនាកា សមនឹងលេងដល់លីគកំពូលរបស់ជប៉ុនឯណោះ គឺមិនមែនត្រឹមលេងក្នុងលីគលំដាប់ទី៣ដូចពេលនេះទេ ។
លោក Leonardo Votorino គ្រូបង្វឹកក្រុមជម្រើសជាតិកម្ពុជាបានថ្លែងក្នុងវេទិកាសន្និសីទកាសែតមុនពេលក្រុមកម្ពុជាប្រកួតជាមួយក្រុមឥណ្ឌាថា កីឡាករចាន់ វឌ្ឍនាកា កាន់តែមានទម្រង់លេងល្អឡើង បន្ទាប់ពីគេបានចេញទៅហ្វឹកហាត់នៅក្នុងប្រទេសជប៉ុន តាមរយៈឱកាសបានលេងឱ្យក្រុមរបស់ជប៉ុន ដែលស្ថិតនៅលីគលំដាប់ទី៣នៅក្នុងប្រទេសនោះ ។ លោកថា ចាន់ វឌ្ឍនាកា មានឧបសគ្គមួយគឺរាងល្អិត និងកម្ពស់ស្ទើរតែវាមិនមានបញ្ហាចោទចំពោះគេនោះទេ ដោយសារតែភាពរហ័ស និងកម្លាំងល្អរបស់គេ បានរុញឱ្យគេប្រកួតល្អជាពិសេសបច្ចេកទេសបណ្ដើរបាល់ បោះបាល់ និងស៊ុតបាល់ ។ លោកថា ផ្អែកតាមសមត្ថភាព កីឡាកររូបនេះគួរតែលេងក្នុងលីគកំពូលរបស់ជប៉ុនទើបសម ដោយមិនមែនត្រឹមលេងឱ្យតែលីគលំដាប់ទី៣ដូចអ្វីដែលបានឃើញទេ ។ ទោះបីយ៉ាងណា លោកថា អ្វីៗវាស្ថិតនៅលើឱកាសដោយចាត់ទុកថា ការចូលលេងឱ្យលីគលំដាប់ទី៣នៅក្នុងប្រទេសជប៉ុន គឺពិតជាធ្វើឱ្យលីគកំពូលៗនៅក្នុងប្រទេសជប៉ុនមានការចាប់អារម្មណ៍ ។ លោកថា ចាន់ វឌ្ឍនាកា គឺជាធនធានកីឡាករកម្ពុជាដែលអាចឈានចូលទីផ្សារអន្តរជាតិនាពេលអនាគត ដោយសារតែផ្អែកលើសមត្ថភាព និងបច្ចេកទេសក្នុងការប្រកួត ។ លោកសរសើរទម្រង់វៃឆ្លាតរបស់ ចាន់ វឌ្ឍនាកា ដែលអាចបត់បែន ហើយលេងបានកាន់តែល្អ នៅពេលបានចូលប្រកួតជាមួយកីឡាករជប៉ុន ។
ចាន់ វឌ្ឍនាកា ត្រូវបានប្រកាសថា កំពុងស្ថិតក្នុងដំណាក់កាលហ្វឹកហាត់ឱ្យលូតកម្ពស់ជាងមុន ដោយចប់ការប្រកួតកាលពីល្ងាចថ្ងៃទី២២ មីនា ម្សិលមិញ លោកនឹងត្រៀមឡើងយន្តហោះត្រឡប់ទៅកាន់ប្រទេសជប៉ុនវិញ ដោយសារតែលោកបានកុងត្រាជាមួយជប៉ុន គឺចុះមកតែអំឡុងពេលជម្រើសជាតិឈុតធំរបស់កម្ពុជាត្រូវប្រកួតជាមួយកីឡាករបរទេស និងការប្រកួតធំរបស់ក្រុមបឹងកេតអង្គរ ដែលលោកជ្រកកោន ។
លោកប្រកាសថា របបអាហារ អាកាសធាតុ និងការហ្វឹកហាត់ច្រើនខុសបច្ចេកទេស គឺជាកត្តាដែលធ្វើឱ្យលោកឡើងធាត់ តែលោកក៏បានប្រកាសថា បញ្ហាឡើងទម្ងន់មិនប៉ះពាល់ចំពោះរាងកាយដូចគ្នានឹងការបញ្ជាក់របស់គ្រូបង្វឹកជម្រើសជាតិ ។ លោកត្រូវគេឃើញលេចធ្លោយ៉ាងខ្លាំងក្នុងការបង្ហាញខ្លួនក្រោយបានទៅរស់នៅប្រទេសជប៉ុនមួយរយៈលើកនេះ ។ ក្នុងនោះលោកក៏មានគម្រោងឡើងចុះៗបែបនេះក្នុងពេលបន្តបន្ទាប់ផងដែរ លើកលែងតែការប្រកួតសំខាន់ៗនៅក្នុងប្រទេសកម្ពុជាប៉ះចំថ្ងៃគ្នាជាមួយនឹងការប្រកួតលីគដែលលោកលេងឱ្យនៅក្នុងប្រទេសជប៉ុន ។ លោកថា ខ្លួននឹងចប់កុងត្រានៅក្នុងប្រទេសជប៉ុននៅអំឡុងដើមឆ្នាំ២០១៨ គឺរយៈពេលមួយឆ្នាំ តែអាចអស់ការប្រកួតនៅអំឡុងឆ្នាំ២០១៧ ក៏ថាបានដោយសារតែពេលវេលានៅឆ្ងាយនៅឡើយ ។
លោកក៏បានប្រកាសថា ស្ថានភាពរស់នៅរបស់លោកនៅក្នុងប្រទេសជប៉ុនចាប់ផ្ដើមផ្សាំខ្លួនបានល្អជាថ្មីហើយ បន្ទាប់ពីអាកាសត្រជាក់ និងរបបអាហារធ្វើឱ្យលោកពិបាកខ្លះកាលពីដំបូង ។ លោកក៏ទទួលបានការរីកចម្រើនផ្នែកភាសាជប៉ុនក្នុងការទំនាក់ទំនងផងដែរ ដោយរំពឹងថា ទម្រាំចប់បេសកកម្ម១ឆ្នាំនៅក្នុងប្រទេសជប៉ុន គឺនឹងអាចនិយាយបានច្រើន ។ លោកមិនទាន់រំពឹងថាខ្លួននឹងទទួលបានការចាប់អារម្មណ៍សម្រាប់ការបោះជំហានទៅប្រកួតក្នុងលីគកំពូលនៅក្នុងប្រទេសជប៉ុនក្រោយចប់កុងត្រាលេងឱ្យក្រុមក្នុងលីគលំដាប់ទី៣នោះទេ តែលោកប្រកាសថានឹងប្រឹងឱ្យអស់ពីសមត្ថភាពសម្រាប់រយៈពេលមួយឆ្នាំនេះ ។
យោងតាមការទម្លាយឱ្យដឹងពីសមាជិករួមក្រុម កីឡាករកម្ពុជាចាន់ វឌ្ឍនាកា ក្នុងជំហានទៅលេងឱ្យក្លិបល្បីឈ្មោះរបស់ជប៉ុនពេញមួយឆ្នាំក្នុងពេលខាងមុខនោះ គឺទទួលបានតម្លៃខ្ពស់ ដោយតម្លៃរបស់លោកមិនក្រោមកីឡាករនៅក្នុងតំបន់អាស៊ីដែលល្បីឈ្មោះឡើយ ។ យ៉ាងណាមិញ ទិន្នន័យលម្អិតត្រូវបានបិទជិត ដោយត្រឹមតែមានការអះអាងថា តម្លៃខ្លួនរបស់កីឡាកររូបនេះគឺមិនធម្មតា ។ ប្រភពក្លិបបឹងកេតដែលកីឡាករចាន់ វឌ្ឍនាកា ជ្រកកោនបានអះអាងថា បើទោះជាភាគីជប៉ុន គឺលោកJun Koyama ប្រធានក្លិបបាល់ទាត់Fujieda MYFC បានត្រឹមតែជ្រើសរើសកីឡាកររូបនេះក្នុងលក្ខខណ្ឌខ្ចីជើង ដោយមិនបានកុងត្រាទិញយកទៅលេងផ្ដាច់មុខរយៈពេលមួយកំណត់ដូចគ្នានឹងកីឡាករដែលលេងនៅក្នុងក្លិបជប៉ុនផ្សេងទៀតក្ដី ក៏តម្លៃខ្លួនរបស់គេត្រូវបានបង្ហើបថា មិនក្រោមម៉ឺនដុល្លារទម្រាំតែចប់កុងត្រាមួយឆ្នាំ ។ តម្លៃនេះនឹងបន្តឈានឡើងសម្រាប់ការព្រមព្រៀងក្នុងឆ្នាំទី២ និងពេលកីឡាករចាន់ វឌ្ឍនាកា អាចឈានទៅលេងក្នុងក្លិបលំដាប់អឺរ៉ុប និងពិភពលោកក្រោយការអភិវឌ្ឍសមត្ថភាពនោះផង ទើបអ្នកណាក៏ចាត់ទុកវត្តមានទៅបង្ហាញខ្លួនក្នុងក្លិបជប៉ុនរបស់ជើងខ្លាំងកម្ពុជារូបនេះ បង្ហាញយ៉ាងច្បាស់ថា វិស័យបាល់ទាត់កម្ពុជារីកចម្រើននិងបង្ហាញថា កីឡាករកម្ពុជាមិនធម្មតាលើឆាកអន្តរជាតិ ។
តាមគោលការណ៍របស់ក្លិបជប៉ុន Fujieda MYFC ក្រោយកិច្ចកុងត្រាខ្ចីជើងរយៈមួយឆ្នាំ(២០១៧) ចាន់ វឌ្ឍនាកា នឹងមានសមត្ថភាពកាន់តែខ្ពស់លើឆាកអន្តរជាតិ ដើម្បីយកបច្ចេកទេសទាំងនោះមកបង្ហាត់បង្ហាញដល់កីឡាករកម្ពុជាក្នុងវិស័យបាល់ទាត់ ៕
ចែករំលែកព័តមាននេះ