ខេត្តត្បូងឃ្មុំ ៖ កន្លងទៅថ្មីៗនេះគេបានឃើញពីសកម្មភាពរបស់ស្ថាប័នកាំកុងត្រូលបានយកចិត្តទុកដាក់ចុះត្រួតពិនិត្យបន្លែ និងផ្លែឈើពីប្រទេសវៀតណាមតាមច្រកត្រពាំងផ្លុង ច្រកដារ ច្រកដូនរ័ត្នដែលជាលទ្ធផលឃើញមានខ្ទឹមក្រហម និងខ្ទឹមសមានសារធាតុគីមីសំណល់ថ្នាំសម្លាប់សត្វល្អិតដែលបង្កឲ្យប៉ះពាល់សុខភាព ។ ទោះជាបែបនេះក្តីក៏នូវតែមានការលួចនាំចូលដដែល តាមច្រកត្រពាំងផ្លុង ស្រុកពញាក្រែក នារសៀលថ្ងៃទី២១ ខែមីនា ឆ្នាំ២០១៧ និងធ្វើឲ្យសុខភាពរបស់ពលរដ្ឋទៅជាយ៉ាងណា ។
អាជីវករម្នាក់បានប្រាប់ឲ្យដឹងថា គាត់បានចេញដឹកបន្លែតាមរឺម៉កម៉ូតូបានទើបតែ១ខែនេះទេ ដោយជាមធ្យមក្នុង១ថ្ងៃដឹកបានតែមួយជើងតាមច្រកត្រពាំងផ្លុង ក្នុងនោះមានដូចជា ដូង ខ្ទឹមបារាំង ខ្ទឹមស ស្ពៃក្តោប ដែលមានទង្ងន់ជាង៧០០គីឡូក្រាមក្នុងពេលដែលដឹកចេញមកនោះមិនមានការត្រួតពិនិត្យពីមន្ត្រីកាំកុងត្រូលប្រចាំច្រកទេ ដោយគ្រាន់តែបង់លុយឲ្យជាការស្រេច ។
លោក មាស មោរ៉ា ប្រធានសាខាកាំកុងត្រូលខេត្តត្បូងឃ្មុំមានប្រសាសន៏ឲ្យដឹងនៅព្រឹកថ្ងៃទី២២ ខែមិនាឆ្នាំ២០១៧ តាមទូរស័ព្ទថា កន្លងមកនេះរូបលោកបានសហការជាមួយនឹងរថយន្តពិសោធន៏របស់អគ្គនាយកដ្ឋានកាំកុងត្រូល ចុះទៅពិនិត្យបន្លែ និងផ្លែឈើដែលបាននាំចូលមកពីប្រទេសវៀតណាមតាមច្រកត្រពាំងផ្លុង ច្រកដារ ច្រកដូនរ័ត្ន ក្នុងខេត្តត្បូងឃ្មុំ ដោយបានរកឃើញមានខ្ទឹមស និងខ្ទឹមក្រហម ដែលមានផ្ទុកនូវសារធាតុគីមីសំណល់ថ្នាំសម្លាប់សត្វល្អិតដែលបង្កឲ្យប៉ះពាល់សុខភាពត្រូវបានហាមមិនឲ្យនាំចូលមកកម្ពុជា ។ បន្លែដែលអាចនាំចូលមកបានលុះត្រាតែមានការបញ្ជាក់ពីអាជ្ញាវៀតណាមដោយមានលិខិតថា គ្មានសារធាតុគីមីទើបអនុញ្ញាតឲ្យនាំចូលបាន ហើយរូបលោកក៏បានឲ្យមន្ត្រីក្រោមឪវាទដែលប្រចាំការតាមច្រកនីមួយៗ ត្រូវតាមដានចំពោះអាជីវករណាដែលនូវតែបន្តនាំចូលបន្លែមានសារធាតុគីមីនឹងត្រូវចាត់វិធានការតាមច្បាប់ ចំពោះករណីខាងលើខ្ទឹមសដែលបានដឹកតាមរឺម៉កម៉ូតូរូបលោកនឹងសាកសួរទៅមន្ត្រីប្រចាំច្រកត្រពាំងផ្លុង ធ្វើយ៉ាងណាឲ្យចេះទទួលខុសត្រូវ ៕
ចែករំលែកព័តមាននេះ