ខេត្តកំពត ៖ ប្រជាពលរដ្ឋបានរិះគន់ចំពោះក្រុមនគរបាលសណ្តាប់ធ្នាប់ក្រុងកំពតដែលមានតួនាទីរៀបចំសណ្តាប់ធ្នាប់សាធារណៈនៅលើផ្លូវជុំវិញផ្សារសាមគ្គីទីរួមខេត្តកំពុងជិះសេះលែងដៃដើរត្រេតត្រតផ្លុំកញ្ចែឲ្យតែឮ
ខេត្តកំពត ៖ ប្រជាពលរដ្ឋបានរិះគន់ចំពោះក្រុមនគរបាលសណ្តាប់ធ្នាប់ក្រុងកំពតដែលមានតួនាទីរៀបចំសណ្តាប់ធ្នាប់សាធារណៈនៅលើផ្លូវជុំវិញផ្សារសាមគ្គីទីរួមខេត្តកំពុងជិះសេះលែងដៃដើរត្រេតត្រតផ្លុំកញ្ចែឲ្យតែឮ ។ ប៉ុន្តែការរៀបចំសណ្តាប់ធ្នាប់នៅលើផ្លូវសាធារណៈជុំវិញផ្សារទីរួមខេត្តគេឃើញស្ទើរតែរាល់ថ្ងៃត្រូវស្ទះចរាចរណ៍នៅលើផ្លូវជាពិសេសផ្លូវខាងជើងផ្សារទីរួមខេត្តនេះតែម្តង ។
មូលហេតុនៃការធ្វើឲ្យស្ទះចរាចរណ៍ជារៀងរាល់ថ្ងៃតាំងពីក្រោយថ្ងៃប្រកាសបើកមុខ និងផ្ទេរតំណែងលោក កែវ មុន្នី មកកាន់អធិការក្រុងកំពតមកថ្មីមក ប្រភពរិះគន់ពីប្រជាពលរដ្ឋអ្នកប្រើប្រាស់យានយន្តបានរិះគន់មកលើសមត្ថកិច្ចដែលមានតួរនាទីរក្សាសណ្តាប់ធ្នាប់នៅលើផ្លូវនេះថា មូលហេតុដែលធ្វើឲ្យស្ទះចរាចរណ៍គឺមិនមែនខុសពីអ្នកចតយានយន្តនោះទេគឺមកពីសមត្ថកិច្ចរៀបចំសណ្តាប់ធ្នាប់តែម្តង ពីព្រោះគេឃើញរ៉ឺម៉កម៉ូតូដែលចតនៅលើផ្លូវសាធារណៈក្រុមសមត្ថកិច្ចដែលរក្សាសណ្តាប់ធ្នាប់នៅទីនោះដើរយកលុយពីអ្នកម៉ូតូរ៉ឺម៉កទាំងនោះ ជាផ្នូរ និងការចតចាំដឹកភ្ញៀវ ។
ចំណែកខាងអ្នកធ្វើអាជីវកម្មផ្ញើរកង់ និងម៉ូតូឯនោះវិញគេឃើញយកចំណីផ្លូវមកធ្វើកន្លែងផ្ញើរម៉ូតូយ៉ាងរំភើយដោយមិនខ្វល់ពីការកកស្ទះចរាចរពីសំណាក់រថយន្តដឹកទំនិញតូចធំនោះឡើយ ។ ជុំវិញករណីរិះគន់ពីសំណាក់ប្រជាពលរដ្ឋអ្នកប្រើប្រាស់យានយន្តមកលើសមត្ថកិច្ចសណ្តាប់ធ្នាប់ខាងលើលោកវរសេនីយត្រី កែវ មុន្នី អធិការនគរបាលក្រុងកំពតឲ្យដឹងថា លោកបានខិតខំប្រឹងប្រែងក្នុងការរៀបចំសណ្តាប់ធ្នាប់ផងដែរ ប៉ុន្តែយើងមើលទិដ្ឋភាពជាក់ស្តែងគឺបរិវេណផ្សារទីរួមខេត្តកំពតយើងមានភាពតូចចង្អៀត រីឯយានយន្តរបស់ប្រជាពលរដ្ឋនៅក្នុងខេត្តកំពតយើងពីមួយថ្ងៃទៅមួយថ្ងៃគឺមានការកើនឡើង ដូច្នេះការរៀបចំសណ្តាប់ធ្នាប់វាអាចមានការកកស្ទះម្តងម្កាលទេមិនអាចរាល់ថ្ងៃនោះទេ ។ ប៉ុន្តែទោះបីយ៉ាងណាលោកនិងខិតខំសហការជាមួយលោកអភិបាលក្រុងកំពតដើម្បីកាត់បន្ថយនូវការកកស្ទះចរាចរណ៍ដែលតែងតែកើតមានឡើងខាងនេះបន្តទៅទៀត ៕
ចែករំលែកព័តមាននេះ