ខេត្តសៀមរាប ៖ មានហេតុការណ៍ភ្ញាក់ផ្អើលមួយបានកើតឡើងក្រោយពីពលរដ្ឋឈ្មោះ ធុត យីន ភេទប្រុស អាយុ៣៧ឆ្នាំ នៅភូមិធ្លក ឃុំស្លែងស្ពាន ស្រុកស្រីស្នំ បានទៅឃ្វៀលគោនៅលើដីស្រែរបស់ខ្លួនចម្ងាយពីស្ពានប្រមាណជា៥.២០០ម៉ែត្រ ខណៈពេលនោះក៏ប្រទះឃើញស្ត្រីចំណាស់ម្នាក់បានដេកស្លាប់សល់តែស្បែក និងឆ្អឹង នៅកណ្តាលវាលស្រែ រួចក៏ត្រឡប់មកវិញបានទៅប្រាប់បងប្អូនដែលរស់នៅជិតនោះដើម្បីឱ្យរាយការជូនទៅសមត្ថកិច្ចចុះមកជួយអន្តរាគមន៍ ។
ហេតុការណ៍ពលរដ្ឋប្រទះឃើញសាកសពស្ត្រីនោះបានកើតឡើងវេលាម៉ោង១២ថ្ងៃត្រង់ ថ្ងៃទី២០ ខែមីនា ឆ្នាំ ២០១៧ ស្ថិតនៅចំណុចវាលស្រែខាងជើងភូមិធ្លក ឃុំស្លែងស្ពាន ស្រុកស្រីស្នំ ខេត្តសៀមរាប ចម្ងាយ៥.២០០ម៉ែត្រនៅលើដីស្រែរបស់ឈ្មោះ ធុត យីន ។
លោកវរសេនីយ៍ទោ អ៊ុន ស្រស់ អធិការនគរបាលស្រុកស្រីស្នំបានឱ្យដឹងនៅរសៀលថ្ងៃទី២១ ខែមីនា ឆ្នាំ២០១៧នេះថា ក្រោយពីទទួលបានសេចក្តីរាយការណ៍ពីប្រពលរដ្ឋរួចមកលោកបានឱ្យកម្លាំងជំនាញចុះទៅពិនិត្យនៅកន្លែងកើតហេតុ ក៏ឃើញសាកសពស្ត្រីចំណាស់ម្នាក់ រួចក៏នាំគ្នាធ្វើការត្រួតពិនិត្យទៅលើខ្លួនជនរងគ្រោះ តែពុំមានអ្វីគួរឱ្យគត់សំគាល់នោះទេ ប៉ុន្តែនៅក្នុងខ្លួនសាកសពជនរងគ្រោះនោះឃើញមានលុយជាប់នៅនឹងដងខ្លួនចំនួន៤៨៧.៩០០រៀលផងដែរ ។ លោកបានបន្តថា សពស្ត្រីរងគ្រោះ មានឈ្មោះ និល ហាន អាយុ៧១ឆ្នាំ រស់នៅភូមិធ្លក ឃុំស្លែងស្ពាន ស្រុកស្រីស្នំ ខេត្តសៀមរាប ។
ចំណែកក្រុមគ្រួសារបានរៀបរាប់ប្រាប់សមត្ថកិច្ចថា ម្តាយរបស់គាត់មានជម្ងឺប្រចាំកាយមុនគាត់ដើរចេញពីផ្ទះប្រាប់ថា គាត់ទៅរកគេ ប៉ុន្តែមិនដឹងទៅរកនរណាទេ តាំងពីថ្ងៃទី៣ ខែមីនា ឆ្នាំ២០១៧ រហូតមកដល់ថ្ងៃកើតហេតុនេះទើបមានគេមកប្រាប់ថា ម្តាយខ្លួនស្លាប់នៅកណ្តាលវាលស្រែបាត់ទៅហើយ ខណៈពេលនោះក៏នាំគ្នាទៅមើលស្រាប់ឃើញពិតប្រាកដជាម្តាយមែន ។ លោកបានបញ្ជាក់ថា បន្ទាប់ពីបានពិនិត្យ និងធ្វើកោសល្យវិច្ឆ័យរួចមកកម្លាំងជំនាញបានសន្និដ្ឋានថា មកពីគាត់មានជម្ងឺប្រចាំកាយផងហើយប្រហែលវង្វេងផ្លូវផង ទើបគ្មានអ្វីហូប បានជាគាត់ខ្យល់គស្លាប់តែម្តងទៅ ប៉ុន្តែនៅលើដងខ្លួនពុំមានអ្វីគួរឱ្យកត់សម្គាល់ទេ ៕
ចែករំលែកព័តមាននេះ