រាជធានីភ្នំពេញ ៖ ធនាគារពាណិជ្ជនានានឹងផ្តោតការសន្សំសំចៃលើការចំណាយរបស់ខ្លួន បន្ទាប់ពីរាជរដ្ឋាភិបាលដាក់ពិដានអត្រាការប្រាក់ពី៣០% មកនៅត្រឹម១៨% ដែលនឹងត្រូវអនុវត្តនៅខែមេសា ខាងមុខនេះ ។
រាជធានីភ្នំពេញ ៖ ធនាគារពាណិជ្ជនានានឹងផ្តោតការសន្សំសំចៃលើការចំណាយរបស់ខ្លួន បន្ទាប់ពីរាជរដ្ឋាភិបាលដាក់ពិដានអត្រាការប្រាក់ពី៣០% មកនៅត្រឹម១៨% ដែលនឹងត្រូវអនុវត្តនៅខែមេសា ខាងមុខនេះ ។
លោកបណ្ឌិត អិុន ចាន់នី ប្រធាននាយកប្រតិបត្តិធនាគារអេស៊ីលីដា ភីអិលស៊ី បានថ្លែងឲ្យដឹងតាមទូរស័ព្ទកាលពីពេលថ្មីៗថា ការដាក់ចេញនូវវិធានការរបស់រាជរដ្ឋាភិបាល នឹងធ្វើឲ្យធនាគារសម្រួលថ្លៃដើមឡើងវិញ ដើម្បីសម្រេចតាមគោលដៅនៃការទទួលបានប្រាក់ចំណេញប្រចាំឆ្នាំ ។ លោកបន្តថា ធនាគារនឹងកាត់បន្ថយការចំណាយមិនចាំបាច់ និងពិនិត្យការចំណាយតាមលទ្ធភាពជាក់ស្តែង ព្រោះចាប់ពីខែមេសាខាងមុខនេះ ទាំងធនាគារ និងមីក្រូហិរញ្ញវត្ថុនានានឹងអនុវត្តតាមប្រកាសរបស់រាជរដ្ឋាភិបាល ។
លោកបន្តថា ៖ « ការដាក់ចេញនូវសេចក្តីប្រកាសនេះ ពិតជាដាក់សម្ពាធដល់ស្ថាប័នហិរញ្ញវត្ថុនានា ខណៈធនាគារនីមួយៗមានស្ថានភាពខុសៗគ្នា ហើយអត្រាការប្រាក់កើនឡើងឬចុះ ខ្ញុំនឹងពិនិត្យតាមស្ថានភាពជាក់ស្តែង » ។
គិតត្រឹមរយៈពេលពីរខែដើមឆ្នាំនេះ ធនាគារអេស៊ីលីដាបានទទួលប្រាក់បញ្ញើ៣.១០០លានដុល្លារអាមេរិក និងផ្តល់ឥណទានក្នុងទំហំទឹកប្រាក់២.៨០០លានដុល្លារអាមេរិក ។
ទោះជាយ៉ាងណា សេដ្ឋវិទូកម្ពុជាបាននិយាយក្នុងភាពប្រយ័ត្នប្រយែងជុំវិញបញ្ហានេះ។
លោកបណ្ឌិត ម៉ី កល្យាណ ទីប្រឹក្សាជាន់ខ្ពស់ឧត្តមក្រុមប្រឹក្សាសេដ្ឋកិច្ចជាតិ ថ្លែងថា ការដាក់ពិដានអត្រាការប្រាក់របស់រាជរដ្ឋាភិបាលកាលពីពេលថ្មីៗនេះមានរឿងល្អ និងរឿងអាក្រក់ ប៉ុន្តែបើគិតអត្រាការប្រាក់ក្នុងកម្រិតនេះជាការសមរម្យ ប៉ុន្តែវាក៏នៅតែខ្ពស់ផងដែរ បើធៀបនឹងកម្លាំងសេដ្ឋកិច្ចរបស់កម្ពុជា ។ លោកបន្តថា ការដាក់ពិដានការប្រាក់បែបនេះ វាមានឥទ្ធិពលខ្លះៗផងដែរដល់ធនាគារនានា ដែលអាចជំរុញឲ្យពួកគេបញ្ចុះអត្រាការប្រាក់បន្ថែម ។
លោកបន្តថា ៖ « ទោះជាយ៉ាងណា ការបញ្ចុះអត្រាការប្រាក់ឬអត់ វាអាស្រ័យលើធនាគារនីមួយៗ ប៉ុន្តែការដាក់ពិដានការប្រាក់នេះ ជារឿងរបស់ស្ថាប័នមីក្រូហិរញ្ញវត្ថុនានាច្រើនជាងធនាគារ » ។
លោកបណ្ឌិត ម៉ី កល្យាណ បន្តថា វិស័យធនាគារបានប្រកួតប្រជែងគ្នាខ្លាំងរួចទៅហើយ ហេតុនេះ ការបញ្ចុះអត្រាការប្រាក់របស់ធនាគារនានាអាចមានតិចតួច ប៉ុន្តែបើបង្ខំឲ្យបញ្ចុះខ្លាំងធនាគារអាចនឹងដួលរំលំផងដែរ ។ លោកមានប្រសាសន៍ថា ៖ « ធនាគារគួរបញ្ចុះអត្រាការប្រាក់ហើយ ប៉ុន្តែការចុះកើតឬមិនកើត វាពាក់ព័ន្ធនឹងប្រាក់ចំណេញ ហើយប្រាក់ចំណេញទទួលបាន គឺទប់ទល់នឹងហានិភ័យប៉ុណ្ណោះ » ៕
ចែករំលែកព័តមាននេះ